ރާއްޖޭގައި ކޮވިޑް-19 ފެތުރޭ މިންވަރު ކުރިޔާ އަޅައި ބަލާއިރު ހާލަތު ރަނގަޅުވެފައި ވަނީ ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އިރުޝާދުތަކަށް އާއްމުން ބޯލެނބުމުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ކޮންސަލްޓެންޓް ޑރ. ޝީނާ މޫސާ ވިދާޅުވެއްޖެ އެވެ.

ގްރޭޓަރ މާލެ ސަރަހައްދުގައި އިއުލާން ކޮށްފައިވާ ލޮކްޑައުން އަށް ލުއި ދިނުމާއި ގުޅޭގޮތުން ބުދަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ރާއްޖެ ހާލަތާއި ބެހޭ ގޮތުން އެޗްޕީއޭގެ ކޮންސަލްޓެންޓް ޑރ. ޝީނާ ވިދާޅުވީ، ކޮމިއުނިޓީ ސްޕްރެޑެއް އުޅޭތާ ހަ ހަފްތާ ވެފައިވާއިރު، ބަލި ފެތުރުމުގެ ރޭޓަށް ބަދަލުތަކެއް އައިސްފައިވާ ކަމަށެވެ.

ފަހަކަށް އައިސް މާލެއިން ފެންނަ ކޭސްތަކުގެ ކޮންޓެކްޓްތައް ދަށްވެފައިވާ ކަމަށް ޓެކްނިކަލް އެޑްވައިޒަރީ ގްރޫޕް (ޓެގް) އިންވެސް ވަނީ ބުނެފަ އެވެ.

ޑރ. ޝީނާ ވިދާޅުވީ، ގޭގައި މީހުން ކަރަންޓީނު ކުރެވިގެން ދިޔުމުން އެ މީހުންގެ ފަރާތުން އެހެން މީހުންނަށް ބަލި ފެތުރޭ މިންވަރު ވަރަށް ދަށް ކުރެވިފައިވާ ކަމަށާއި، ލޮކްޑައުން އަށް ލުއިތަކެއް ލިބިގެންދާއިރު ވެސް އެ ގޮތުގައި ހިފަހައްޓަން ޖެހޭނެ ކަމަށެވެ.

އޭނާ ވިދާޅުވީ ގޮތުގައި މިހާރު ބަލި ކޮންޓްރޯލް ކުރެވިފައިވާ މިންވަރު ދަށް ކުރެވިފައިވަނީވެސް އެޗްޕީއޭގެ އިރުޝާދުތަކަށް ބޯލަނބައިގެން ގިނަ ބަޔަކު އެގޮތަށް އަމަލު ކުރުމުންނެވެ. ހަމަ އެ އިރުޝާދުތަކުގެ މަތީގައި ދެމިތިބެ މަގުމައްޗަށް ނިކުމެ އުޅޭއިރުވެސް ވިހާވެސް ބޮޑަށް ގައިދުރުކަމަށް އިސްކަން ދިނުމަށް ޑރ. ޝީނާ އިލްތިމާސް ކުރެއްވި އެވެ.

މީގެ ކުރިން ހައްދާވާފައިވާ އަންދާޒާ ތަކަށް އަލިއަޅުއްވާލަމުން ޑރ. ޝީނާ ވިދާޅުވީ، ދުނިޔޭގެ އެވްރޭޖަށްވުރެ ރާއްޖޭގައި، ބަލީގައި ބޮޑުވަރުވާ މީހުންގެ އަދަދު ދަށް ކަމަށާއި، އަދި އައިސީޔޫގައި ފަރުވާދޭން ޖެހޭ މީހުންގެ އަދަދުވެސް ދަށް ކަަމަށެވެ. ސަބަބެއް ގޮތުގައި އޭނާ ފާހަގަކުރެއްވީ، ދިވެހިންގެ އާބާދީގެ އިތުރުން ބިދޭސީންގެ އާބާދީއަކީވެސް ޒުވާން އުމުރުގެ އާބާދީއަކަށް ވާތީ އެވެ.

ރާއްޖެއިން ކޮވިޑް-19 އަށް އެއް ހާހަށްވުރެ ގިނަ މީހުން ވަނީ ޕޮޒިޓިވްވެފަ އެވެ. އޭގެ ތެރެއިން ފަސް މީހަކު ވަނީ ބަލި ޖެހިގެން މަރުވެފައި އެވެ.