ކޮވިޑް-19 ފެތުރޭ ނިސްބަތް 3.8ން 1.4ށް ދަށްކުރެވިއްޖެކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ދަރުބާރުގޭގައި ގާއިމްކޮށްފައިވާ ނޭޝަނަލް އިމަރޖެންސީ އޮޕަރޭޝަން ސެންޓަރގައި ބޭއްވި ނޫސްވެރިންގެ ބައްދަލުވުމުގައެވެ.

މިނިސްޓަރ އަމީން ވިދާޅުވީ، ލުއިތަކެއް ދިނުމަށް ނިންމާފައިވަނީ މިހާތަނަށް ކުރެވުނު މަސައްކަތުން ގިނަ ކުރިއެރުންތަކެއް ލިބުމާއި ގުޅިގެން ކަމަށެވެ. އެގޮތުން، ރައްޔިތުން ހޭލުންތެރި ކުރުވައި ކުރެވުނު މަސައްކަތުގެ ތެރެއިން، ޑައިރެކްޓް ކޮންޓެކްސްގެ ގޮތުގައި ފާހަގަކުރެވިފައިވާ މިންވަރާއި ބަލި ފެތުރޭ ނިސްބަތް ބޮޑުތަނުން ދަށް ކުރެވިފައިވާކަމަށެވެ.

މިނިސްޓަރ ވިދާޅުވީ އެކަކުގެ ކިބައިން އަނެކަކަަށް ބަލި ފެތުރުމުގެ ނިސްބަތް 3.8ން 1.4ށް ދަށް ކުރެވިފައިވާކަމަށެވެ. އަދި އެކަކު އަނެކަކާއި ބައްދަލުކުރެވޭ ނިސްބަތް 33 މީހުންނާއި ހިސާބުން 6 މީހުންނަށް ދަށްކުރެވިފައިވާކަމަށެވެ.

ގިނަ ކާމިޔާބީއެއް ލިބުނުކަން ފާހަގަކޮށް މިނިސްޓަރ އިތުރަށް ވިދާޅުވީ، ބަލި ފެންނަ މިންވަރާއި، އަލާމާތްތައް ފެނި ފްލޫ ކިލްނިކަށް ދައްކައި ހެދޭ ޓެސްޓްތަކުގެ ނަތީޖާ ނެގެޓިވްވެ މަދުވަމުން އަންނަކަމަށެވެ.

އިތުރު މައުލޫމާތު ހާމަކުރަމުން ޑރ އަލީ ލަތީފް ވިދާޅުވީ ކޮވިޑް ޕޮޒިޓިވްވާ ރޭޓް ދަނީ ދަށަށްކަމަށާއި ލުއިތައްދޭއިރު ވަރަށް ބޮޑެތި ތައްޔާރީތަކެއް ވެފައިވާކަމަށެވެ. އެގޮތުން، މިހާރު ކޭސްތައް ފެނިއްޖެނަމަ އެޑްމިޓް ކޮށްގެން ފަރުވާ ދެވޭނެ ކެޕޭސިޓީ ވަރަށް ބޮޑަށް އިތުރުކުރެވިފައިވާކަން ޑރ ފާހަގަކުރެއްވިއެވެ.

ރާއްޖޭގެ ޓެސްޓިން ކެޕޭސިޓީ އިތުރުކުރުމަށް ގިނަ މަސައްކަތެއް ކުރަމުން އަންނައިރު، ސަރުކާރަށް މި ދަނޑިވަޅުގައި އެހީތެރިކަން ފޯރުކޮށްދިނުމަށް ޕްރައިވެޓް ހޮސްޕިޓަލުތަކުންވެސް އަންނަނީ އެހީތެރިކަން ފޯރުކޮށްދެމުންނެވެ.