އޭސީ މިލާނަށް ކުޅެމުން އަންނަ ސްވިޑަންގެ ފޯވާޑް ޒްލަޓާން އިބްރަހިމޮވިޗަށް ލިބުނު އަނިޔާ ސީރިއަސް ނޫން ކަމަށް އެ ކްލަބުން ބުނެފި އެވެ.

އިބްރަހިމޮވިޗްގެ ފައިގެ ކުޑަކަޅުވާއަށް އަނިޔާވީ ހޯމަ ދުވަހު އޭސީ މިލާނުން ކުރިއަށް ގެންދިޔަ ފަރިތަކުރުންތަކުގެ ތެރެއިންނެވެ. އަނިޔާއާ ގުޅިގެން އިބްރަހިމޮވިޗް ވަނީ އަންގާރަ ދުވަހު ޓެސްޓްތަކެއް ހަދާފައެވެ. އެ ޓެސްޓު ތަކަށްފަހު އޭސީ މިލާނުން ބުނީ އިބްރަހިމޮވިޗްގެ ފައިގެ ކުޑަކަޅުވާއަށް ލިބުނު އަނިޔާ ސީރިއަސް ނޫން ކަމަށާއި، އޭނާ އެނބުރި ކުޅުމަށް އަންނަން މާ ގިނަ ދުވަހެއް ނުނަގާނެ ކަމަށެވެ.

އިބްރަހިމޮވިޗަށް ލިބުނު އަނިޔާގެ ތަފްސީލު ބަލަން 10 ދުވަސް ފަހުން އިތުރު ޓެސްޓުތަކެއް ހަދާނެއެވެ.

ރިޕޯޓުތައް ބުނާ ގޮތުން ކުޑަކަޅުވާ އަށް ލިބުނު އަނިޔާގެ ސަބަބުން އޭނާ އަށް ހަތަރު ހަފުތާ ނުކުޅެ ހުންނަން ޖެހިދާނެ އެވެ. އިޓާލިއަން ލީގު އަންނަ ޖޫން މަހުގެ މެދުތެރޭގައި ފަށާނެ ކަމަށް ބެލެވޭއިރު، އެ އަނިޔާގެ ސަބަބުން އިބްރަހިމޮވިޗަށް ފުރަތަމަ ދެ ހަފުތާއެއްގައި ނުކުޅެވިދާނެ ކަމަށްވެސް ރިޕޯޓުތައް ބުނެއެވެ.

އިބްރަހިމޮވިޗަށް އަނިޔާ މިވީ، ކޮރޯނާވައިރަސް (ކޮވިޑް-19) އާ ގުޅިގެން ގިނަ ދުވަސްތަކެއް ވަންދެން ސްވިޑަންގައި ހުރުމަށް ފަހު އެނބުރި އިޓަލީއަށް ދިޔަތާ ކުޑަ ދުވަސްކޮޅެއްގެ ތެރޭގައެވެ.

ސްވިޑަންގައި ހުރި މުއްދަތުގެ ތެރޭގައި ފިޓްނަސް ހިފެހެއްޓުމުގެ ގޮތުން އެ ގައުމުގެ ކްލަބަކާއެކު ބައެއް ފަރިތަކުރުންތަކުގައި އިބްރަހިމޮވިޗް ވަނީ ބައިވެރިވެފައެވެ. އިޓަލީއަށް ދިޔުމުން 14 ދުވަހަށް އިބްރަހިމޮވިޗް ކަރަންޓީނު ކުރިއިރު، ފަރިތަކުރުންތަކަށް ނުކުތީ ކޮވިޑް-19ށް ނެގެޓިވް ވުމުންނެވެ.

ކޮވިޑް-19 އާ ގުޅިގެން މާޗު މަހުގެ ނުވަވަނަ ދުވަހު އިޓާލިއަން ލީގުގެ ކުޅުން މެދުކަނޑާލިއިރު، ރިޕޯޓުތައް ބުނާ ގޮތުން ޖޫން މަހުގެ މެދުތެރޭގައި ލީގުގެ ކުޅުން އަލުން ފަށަން މިހާރު އަންނަނީ މަސައްކަތް ކުރަމުންނެވެ.