އަންދާޒާކުރި 17.2 ބިލިއަން ރުފިޔާގެ އާމްދަނީ، 8.95 ބިލިއަނަށް ތިރިވެއްޖެ

މި އަހަރު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން އާމްދަނީގެ ގޮތުގައި ލިބޭނެ ކަމަށް ބެލެވެނީ ޖުމުލަ 8.95 ބިލިއަން ރުފިޔާ ކަމަށް އެ އިދާރާ އިން ހާމަކޮށްފި އެވެ.

މީރާ ގެ މަސައްކަތްތަކާއި ގުޅޭގޮތުން އާންމުންނަށް މައުލޫމާތު ދިނުމުގެ ގޮތުން ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ކޮމިޝަނަރ ޖެނެރަލް އޮފް ޓޭކްސޭޝަން ފަތުހުﷲ ޖަމީލް ވިދާޅުވީ މިއީ ކުރީގެ ނަޒަރުކުރުންތަކާއި އަޅާ ކިޔާއިރު، %48 ދަށްވުމެއް ކަމަށެވެ. މި އަހަރުގެ ބަޖެޓުގައި އަންދާޒާ ކުރެވުނީ، ދައުލަތަށް 17.2 ބިލިއަން ރުފިޔާގެ އާމްދަނީ އެއް ލިބޭނެ ކަމަށެވެ.

މިހާރު އަންދާޒާކުރާ 8.5 ބިލިއަން ރުފިޔާއަކީ މީރާ އިން އެކުލަވާލާ، ފިނޭންސް މިނިސްޓްރީ އަދި ރައްޔިތުންގެ މަޖިލީހާއި ހިއްސާކޮށްފައިވާ ސިނޭރިއޯތަކުގެ ތެރެއިން ތިންވަނަ ސިނޭރިއޯގައި އިގްތިސާދު ފެށިއްޖެނަމަ، ލިބޭނެ އާމްދަނީ އެވެ. ތިންވަނަ ސިނޭރިއޯގައި ފަތުރުވެރިކަން ފެށުމަށް ބޯޑަރު ހުޅުވާލާނީ ޖުލައި މަހުގަ އެވެ.

އެހެން ސިނޭރިއޯތަކަށް ބަލާއިރު ސިނޭރިއޯ 4 ގައި ލިބޭނެ ކަމަށް އަންދާޒާ ކޮށްފައިވަނީ 7.67 ބިލިއަން ރުފިޔާގެ އާމްދަނީ އެކެވެ. މި ސިނޭރިއޯގައި ރާއްޖޭގެ ބޯޑަރުތައް ހުޅުވާލާނީ، އޮކްޓޫބަރު މަހު އެވެ. ސިނޭރިއޯ 5 ނުވަތަ އެންމެ ގޯސް ހާލަތުގައި ލިބޭނެ ކަމަށް އަންދާޒާ ކޮށްފައިވަނީ 6.62 ބިލިއަން ރުފިޔާގެ އާމްދަނީ އެކެވެ. މި ހާލަތުގައި، ރާއްޖޭގެ ބޯޑަރު ހުޅުވާނީ އަންނަ އަހަރު އެވެ.

އާމްދަނީ ދަށަށް ދިޔައީ ފަތުރުވެރިކަން ހުއްޓުމަކަށް އައުމުން ކަމަށް ކޮންޓްރޯލަރ ޖެނެރަލް ވެސް ވަނީ ފާހަގަކުރައްވާފަ އެވެ. ދައުލަތަށް ލިބޭ އާމްދަނީގެ ތެރެއިން މީރާ އިން ބަލައިގަންނަ ފައިސާގެ 60 އިންސައްތައަކީ ފަތުރުވެރިކަމުން ލިބޭ އާމްދަނީ އެވެ.

އަހަރުގެ މިހާތަނަށް މީރާ އަށް ލިބިފައިވާ ފައިސާގެ އަދަދުތައް ހިއްސާކުރައްވަމުން ފަތުހުﷲ ވިދާޅުވީ، މި އަހަރުގެ ޖެނުއަރީ މަހު 1.8 ބިލިއަން ރުފިޔާގެ އާމްދަނީ އެއް ލިބިފައިވާއިރު، އޭޕްރިލް މަހު އާމްދަނީގެ ގޮތުގައި ލިބުނީ 527 މިލިއަން ރުފިޔާގެ ކަމަށެވެ. މެއި މަހުގެ 17 ވަނަ ދުވަހާ ހަމައަށް 109 މިލިއަން ރުފިޔާގެ އާމްދަނީ އެއް ލިބިފައިވާ ކަމަށް ވެސް މައުލޫމާތު ދެއްވި އެވެ.