ދުވާލެއްގެ މައްޗަށް 50 ކޭސް ފެނުނު ނަމަވެސް އެއީ މަތީ އަދަދެއް ނޫން: ޑރ. އަފްޒަލް
26 މެއި 2020 | އަންގާރަ 23:18މަސައްކަތް ކުރަނީ ޑަބްލިއުއެޗްއޯއިން ކަނޑައަޅާފައިވާ އުސޫލުގެ ތެރެއިން
ކޮވިޑް-19އާ ގުޅޭ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި، ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް
ދުވާލަކަށް ކޮވިޑް-19ގެ 50 ކޭސް ފެނުނު ނަމަވެސް އެއީ މަތި އަދަދެއް ނޫން ކަމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް ވިދާޅުވެއްޖެއެވެ.
އަންގާރަ ދުވަހުގެ ރޭ ނޭޝަނަލް އިމަރެޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ކޮވިޑް-19ގެ މިހާލަތުގައި އަމަލު ކުރަމުންދަނީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯއިން އަމަލުކުރުމަށް ކަނޑައަޅާފައިވާ އުސޫލުގެ ތެރެއިން ކަމަށެވެ.
ޑރ. އަފްޒަލް ވިދާޅުވީ މާލެ ސިޓީގައި އިއުލާންކޮށްފައިވާ ލޮކްޑައުންއަށް ލުއި ދިނުމަށް ނިންމާފައިވަނީ ވެސް ޑަބްލިއުއެޗްއޯގެ ގައިޑްލައިންއާ އެއްގޮތަށް ކަމަށެވެ.
ޑރ. އަފްޒަލް ވިދާޅުވީ މާލެސިޓީގެ އާބާދީއަށް ބަލާއިރު ދުވާލަކު 50 ކޭސް ފެނުމަކީ ބޮޑު އަދަދެއް ނޫން ކަމަށެވެ.
ޑރ. އަފްޒަލް ވިދާޅުވީ ކޭސްއެއް ނުފެނުން އެއީ އެންމެން ވެސް އެދޭ ގޮތް ކަމަށާއި، ނަމަވެސް "ބެކްޓު ނޯމަލް"އަށް ދިއުމުގައި މަޑުމަޑުން ލުއިތައް ދޭން ޖެހޭ ކަމަށެވެ. އަދި ވިދާޅުވީ ނިއު ނޯމަލްއަށް ދަތުރު ފަށާނީ ވަކި މިންގަނޑެއްގައި ހިފެއްޓުމުން ކަމަށާއި، ސްޓޭޖް ބައި ސްޓޭޖަށް ދާނީ ހާސިލް ކުރަން ބޭނުންވާ މިންގަނޑު ހާސިލްވުމުން ކަމަށެވެ.
