އުމުރުން ދެ އަހަރުން ދަށުގެ ކުދިން މާސްކް އަޅުވައިގެން ނުވާނެ: ޑރ.އަފްޒަލް
26 މެއި 2020 | އަންގާރަ 21:06މާސްކް އަމިއްލައަށް ނުނެއްޓޭ ހާލަތުގައި ތިބޭ މީހުން ވެސް މާސްކް އަޅާކަށް ނުޖެހޭ
ކުޑަކުއްޖަކު މާސްކް އަޅައިގެން - ކުޑަކުދިން މާސްކް އުޅެވުމުގައި ޚާއްސަ ސަމާލުކަމެއް ދޭންޖެހޭ
އުމުރުން ދެ އަހަރުން ދަށުގެ ކުދިން މާސްކް އަޅުވައިގެން ނުވާނެ ކަމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް ވިދާޅުވެއްޖެއެވެ.
އަންގާރަ ދުވަހުގެ ރޭ ނޭޝަނަލް އިމަރެޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ އުމުރުން ދެ އަހަރުން ދަށުގެ ކުއްޖަކު މާސްކް އެޅުވުމަކީ ރައްކާތެރި ގޮތެއް ނޫން ކަމަށާއި، އެކުދިންނަށް މާކްސް ނައްޓަން ނޭނގޭނެއެވެ. އަދި ދެ އަހަރުން ދަށުގެ ކުދިން މާސްކް ނޭޅުވުމަށް ޑރ. އަފްްޒަލް އިލްތިމާސްކުރެއްވިއެވެ.
ޑރ. އަފްޒަލް ވިދާޅުވީ ކުޑަ ކުދިންގެ އިތުރުން އަމިއްލައަށް މާސްކް ނުނެއްޓޭ ހާލަތުގައި ތިބި މީހުން މާސްކް އެޅުމެއް ނޯންނާނެ ކަމަށާއި، އެމީހުންގެ ރައްކާތެރިކަމަށްޓަކައި މާސްކް އަޅަންޖެހޭނީ އެހެން މީހުން ކަމަށެވެ.
މާކްސްގައި ހުންނަން ޖެހޭ ޚާއްސަ ސިފަތަކަށް އަލިއަޅުއްވާލައްވާ ޑރ. އަފްޒަލް ވިދާޅުވީ މާސްކުން ރަނގަޅަށް އަގަޔާއި ނޭފަތް ނިވާވާން ޖެހޭ ކަމަށާއި، ކަންފަތުގައި އަޅުވާނެ ލޫޕް ނުވަތަ ފަހަތުން އައްސާލެވޭ ގޮތަށް ހުންނަން ޖެހޭ ކަމަށެވެ. އަދި ވިދާޅުވީ މާސްކްގައި މަދުވެގެން ދެލޭޔަރ ނުވަތަ ތިން ލޭޔަރ ހުންނަން ޖެހޭ ކަމަށެވެ.
ޑރ. އަފްޒަލް ވިދާޅުވީ މާސްކް ނަގާއިރުވެސް ޚާއްސަ ސަމާލު ކަމެއް ދޭންޖެހޭ ކަމަށެވެ. އެގޮތުން މާސްކް ނަގާއިރު، މޫނުގައި އަތްލައިގެން ނުވާނެ ކަމަށާއި، މާސްކް ނެގުމަށްފަހު ރަނގަޅަށް އަތް ދޮންނަން ޖެހޭ ކަމަށް ޑރ. އަފްޒަލް ފާހަގަކުރެއްވިއެވެ.
