ރާއްޖެއިން ކޮވިޑް-19 ޖެހިގެން 5 ވަނަ މީހަކު މަރުވެއްޖެއެވެ.
އަންގާރަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ހޭ ނެތިގެން މަގު މައްޗަށް ވެއްޓިފައި އޮތް ބަންގްލަދޭޝްގެ މީހަކު ހޯމަ ދުވަހުގެރޭ 22:40 ހާއިރު އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންގޮސްފައިވާ ކަމަށެވެ. ހޮސްޕިޓަލަށް ގެންދިޔައިރުވެސް އެމީހާ އޮތީ ނިޔާވެފައި ކަމަށާއި، އެ ބިދޭސީ މީހާގެ ސާމްޕަލް ނަގައި ކޮވިޑް-19 އަށް ޓެސްޓު ކުރުމުން އޭނާ އެ ބައްޔަށް ޕޮޒިޓިވްވެފައިވާ ކަމަށް ވިދާޅުވި އެވެ.
މަބްރޫކް ވިދާޅުވީ، އެ މީހާއާ ގުޅުންހުރި ހަތަރު މީހަކު ކަރަންޓީނު ކުރެވިފައިވާ ކަމަށާއި، ކޮންޓެކްޓް ޓްރޭސިން ހެދުމުގެ މަސައްކަތް ކުރިޔަށްދާ ކަމަށެވެ.
އެ ބިދޭސީ މީހާއަކީ ދިވެއްސެއްގެ ގާތުގައި މަސައްކަތްކުރާ މީހެއް ކަމަށް މައުލޫމާތު ލިބިފައިވާ ކަމަށާއި، އެމީހާ އަކީ ހިތުގެ ބަލީގެ ހުންނަ މީހެއް ކަމަށް މަބްރޫކް ވިދާޅުވި އެވެ.
ރޭގައި އޭނަ ދިހައެއް ޖެހިއިރު ފަރީދީ މަގުގައި ހުރި ތަނަކަށް ދިޔަ ކަމަށް. އަދި އޭނައަކީ ހާޓް ޕޭޝަންޓެއް ކަމަށް މިހާރު މަސައްކަތަށް ނުނިކުންނަތާ ދެ މަސް ދުވަސް ވަރު ވެދާނެ ކަމަށް.
އޭނާ ވިދާޅުވީ، ނިޔާވީ މީހާގެ ފަރާތުން ކޮވިޑް-19 ގެ އެއްވެސް އަލާމާތެއް ފެނިފައިވާ ކަމަށް އަދި މިހާތަނަށް އެނގިފައިނުވާ ކަމަށެވެ.
މަބްރޫކް ވިދާޅުވި ގޮތުގައި، އެމީހާ ދިރިއުޅެމުންދަނީ ބަންގްލަދޭޝްގެ އިތުރު ބަޔަކާއި އެކު އެވެ. ނަމަވެސް ތޮއްޖެހިގެން ބިދޭސީން ދިރިއުޅޭ ތަނެއްގައި އުޅެމުން ދިޔަ މީހެއް ނޫން ކަމަށް މަބްރޫކް ވިދާޅުވި އެވެ.
