ގާނޫނުއަސާސީ އިސްލާހު ކުރުން: ބިލު ފޮނުވާނީ މުޅި މަޖިލީހުގެ ކޮމެޓީއަށް، ބުރާސްފަތި ދުވަހު މަޖިލީހުން ގޮތެއް ނިންމާނެ!
26 މެއި 2020 | އަންގާރަ 11:16ޖޫން މަހުގެ 3 ވަނަ ދުވަހުގެ ނިޔަލަށް މިހާރު ހިނގަމުންދާ ކައުންސިލަރުންގެ ދައުރު ހަމަވާނެ
ރައްޔިތުންގެ މަޖިލީހުގެ މިއަދުގެ ޖަލްސާގެ ތެރެއިން: އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާން ކުރުމާއެކު މާރޗު މަހުގެ 30 ވަނަ ދުވަހުން ފެށިގެން މަޖިލީހުގެ ޖަލްސާތައް ކުރިއަށް ގެންގޮސްފައިވ
މިހާރު ހިނގަމުންދާ ކައުންސިލްތަކުގެ ދައުރު ދިގު ދައްމާލުމާއި، ގުޅޭގޮތުން، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ގާނޫނުއަސާސީއަށް އިސްލާހު ގެނައުމުގެ ބިލުގެ މަސައްކަތް ބުރާސްފަތި ދުވަހުގެ މަޖިލީހުގެ ޖަލްސާއިން ގޮތެއް ނިންމޭނެ ކަމަށް އުއްމީދު ކުރައްވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި، ޤާނޫނު ނަންބަރު 22/2019 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤާނޫނު) އަށް އިޞްލާޙު ގެނައުމުގެ ބިލު މަޖިލީހަށް ހުށަހެޅުއްވީ އެ ބިލު ސްޕޮންސަރ ކުރެއްވި ބިލަތްދޫ ދާއިރާގެ މެންބަރު އަހުމަދު ހަލީމް އެވެ. އަދި އެ ބިލު ހުށަހެޅުމާއެކު ބަހުޘްކުރުމުގެ ފުރުސަތު ވަނީ ހުޅުވާލާފަ އެވެ. އަންގާރަ ދުވަހުގެ މަޖިލީހުގެ ޖަލްސާ ހެނދުނު 11ން ފެށިން މެންދުރުފަހު 2 ޖަހަންދެން ކުރިއަށް ގެންގޮސްފައި ވަނީ އެ ބިލަށް ބަހުޘް ކުރުމަށެވެ.
އަންގާރަ ދުވަހުގެ ޖަލްސާ ނިންމަވާލައްވަމުން މަޖިލީހުގެ ރައީސް، ރައީސް ނަޝީދު ވިދާޅުވީ، އެ ބިލަށް ބަހުޘް ކުރުމުގެ ފުރުސަތަށް އެދިފައިވަޑައިގަންނަވާފައިވާ ހުރިހާ މެންބަރުންނަށް ބުދަ ދުވަހުގެ ޖަލްސާގައި ފުރުސަތު އަރުވާ ނިމޭނެ ކަމަށެވެ. އަދި އެ ބިލު މަޖިލީހަށް ބަލައިގަތުމާ މެދު ވޯޓަށް އައްސަވައި، ބަލައިގަންނަން ފާސްވެއްޖެނަމަ، މުޅި މަޖިލީހުގެ ކޮމެޓީއަށް އެބިލު ދިރާސާ ކުރުމަށް ފޮނުއްވޭނެ ކަމަށްވެސް މަޖިލީހުގެ ރައީސް ވިދާޅުވި އެވެ.
މަޖިލީހުގެ ރައީސް، ރައީސް ނަޝީދު ވިދާޅުވީ، މުޅި މަޖިލީހުގެ ކޮމެޓީން އެ ބިލާމެދު ގޮތެއް ނިންމައި، ބުރާސްފަތި ދުވަހު ބާއްވާ ރައްޔިތުންގެ މަޖިލީހުގެ ޖަލްސާއިން އެބިލު ފާސްކުރުމާމެދު ގޮތެއް ނިންމުމަށް އެޖެންޑާ ކުރެއްވޭނެ ކަމަށް އުއްމީދު ކުރައްވާ ކަމަށެވެ.
އަންގާރަ ދުވަހުގެ ޖަލްސާ ބާއްވާފައި ވަނީ މަޖިލީހުގެ އިދާރާގަ އެވެ. އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާން ކުރުމާއި ގުޅިގެން މިދިއަ މާރޗު މަހުގެ 30 ވަނަ ދުވަހުން ފެށިގެން މަޖިލީހުގެ ޖަލްސާތައް ކުރިއަށް ގެންގޮސްފައި ވަނީ މަޖިލީހުގެ ރައީސް މަޖިލީހުގެ ޖަލްސާކުރާ މާލަމުގެ ރިޔާސަތުގައި އިންނަވައި، އަދި މަޖިލީހުގެ މެންބަރުން އެ މެންބަރަކު ހުންނެވި ތަނެއްގައި ހުންނަވައިގެން، ވެބް ކޮންފަރެންސް މެދުވެރިކޮށެވެ.
ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤާނޫނަށް އިޞްލާޙު ގެނައުމުގެ މި ބިލަކީ ރައްޔިތުންގެ މަޖިލީހުގެ މެންބަރުންގެ މެދުގައި ބޮޑެތި ހިޔާލުތަފާތުވުންތަކެއް ހުރި ބިލެކެވެ.
އެގޮތުން، ބައެއް މެންބަރުން ވިދާޅުވަނީ ރާއްޖޭގައި ކޮވިޑް-19 ރޯގާއިން ރައްކާތެރިވުމަށްޓަކައި، ޢާންމު ޞިއްޙަތުގެ ކުއްލި ނުރައްކާ އިޢުލާނުކޮށްފައި ވާތީ، މި ޙާލަތުގައި ޤާނޫނުއަސާސީ އިޞްލާޙު ނުކުރެއްވޭނެ ކަމަށެވެ. ބައެއް މެންބަރުން ވިދާޅުވަނީ، މިއީ ޤާނޫނުއަސާސީގައި ބުނާ ކުއްލި ނުރައްކަލުގެ ޙާލަތު ނޫން ކަމަށާއި މި ޙާލަތުގައި ޤާނޫނުއަސާސީ އިޞްލާޙު ކުރެވޭނެ ކަމަށެވެ. އަދި ބައެއް މެންބަރުން ޤަބޫލު ކުރައްވާ ގޮތުގައި މިއީ ޤާނޫނުއާސާސީގައި ބުނާ ކުއްލި ނުރައްކަލުގެ ޙާލަތު ނޫންކަމަށް ވިޔަސް، މި ޙާލަތަކީ ރައްޔިތުންގެ ޙައްޤުތަކެއް ހިފެހެއްޓި، ގެއިން ބޭރަށް ނުނިކުމެވޭ، އެއްވެ ނޫޅެވޭ، ނުވަތަ ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގެ ދަށުންވެސް މީހުން ހައްޔަރުކޮށް، ޙައްޤުތަކެއް ހިފެހެއްޓިފައިވާ ޙާލަތެއް ކަމަށްވާތީ، މި ޙާލަތުގައި ޤާނޫނުއަސާސީ އިޞްލާޙު ކުރުމަކީ އެއްގޮތަކަށް ވެސް ކޮށްގެންވާނެ ކަމެއް ނޫންކަމަށެވެ.
މި ޚިޔާލު ތަފާތުވުންތައް ނައްތާލުމަށާއި ޤާނޫނީ އެހެން ޙައްލެއް ގެނައުމަށްޓަކައި ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ވަނީ މަޖިލީހަށް އިތުރު ބިލެއް ހުށަހަޅުއްވާފަ އެވެ. އެއީ "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" އެވެ.
ޙަސަން ލަޠީފް ހުށަހެޅުއްވި ބިލާމެދުވެސް ރައްޔިތުންގެ މަޖިލީހުގެ މެންބަރުންގެ މެދުގައި ޚިޔާލު ތަފާތުވުން ތަކެއް ވަނީ އުފެދިފަ އެވެ.
