އިންޑިއާގެ ދަށުގައިވާ ސަރަހައްދުތަކުގެ ތެރެއިން ކޮވިޑް-19 ކޭސް އެއް ރިޕޯޓު ނުކުރާ ހަމައެކަނި ސަރަހައްދަކީ ލަކްޝަދީބެވެ. ވައިރަސް ނުފެންނަ ހަމައެކަނި ސަރަހައްދަކަށް ލަކްޝަދީބް ވެގެން ދިޔައީ، ވައިރަސް ނުފެނި އޮތް ސަރަހައްދެއް ކަމުގައިވާ ނާގަލޭންޑުން ޕޮޒިޓިވް ކޭސް އެއް ފެނުމާއި ގުޅިގެންނެވެ.

އާބާދީގައި 65،000 މީހުންގެ ލަކްޝަދީބު އިންޑިއާގެ ބާރުގެ ދަށުގައި އޮންނަނީ ޔޫނިއަން ޓެރިޓަރީއެއްގެ ގޮތުގަ އެވެ. އިންޑިއާގެ ސްޓޭޓުތަކާއި ޚިލާފަށް މި ސަރަހައްދުތަކުގެ ހުރިހާ ކަމެއް ބަލަހައްޓަނީ މަރުކަޒީ ސަރުކާރުންނެވެ. ލަކްޝަދީބުގެ ގިނަ ބޭނުންތައް ފުއްދައި ދިނުމުގައި އެހީތެރިވަނީ އަވަށްޓެރި ކެރެލާ ސްޓޭޓުންނެވެ. ޘަގާފީ ގޮތުންނާއި ބަހުރުވައިގެ ގޮތުން ދިވެހިންނާއި ގާތް ގުޅުމެއް އޮންނަ މަލިކަކީ ލަކްޝަދީބުގެ 36 ރަށުގެ ތެރެއިން ރަށެކެވެ.

އިންޑިއާގެ ގިނަ ސަރަހައްދުތަކުން ވައިރަސް ފެނުނު ކަމުގައިވީ ނަމަވެސް، ގިނަ ކޭސްތައް ނިސްބަތްވަނީ އެއް ސަރަހައްދުތަކަށެވެ. މިހާތަނަށް އެންމެ ގިނަ އަދަދެއްގެ ކޭސްތަކެއް ފެނިފައިވަނީ މުމްބާއި ނިސްބަތްވާ މަހާރާޝްތުރަ ސްޓޭޓުންނެވެ. ދެން އެންމެ ގިނަ އަދަދަކަށް ކޭސްތައް ފެނިފައިވަނީ ޓެމިލް ނާޑޫ ސްޓޭޓާއި، ގުޖުރާތު ސްޓޭޓުގެ އިތުރުން ވެރިރަށް ނިއު ދިއްލީންނެވެ.

މި ވަގުތު އެކްޓިވް ކޭސްއެއް ނެތް ސަރަހައްދުތަކަށް ބަލާއިރު، އެ ލިސްޓުގައި އިންޑިއާގެ އަރޫނާޗަލް ޕްރަދޭޝް ސްޓޭޓް ހިމެނެ އެވެ. އެ ސްޓޭޓުން ފެނުނު ހަމައެކަނި ބަލި މީހާ އަށް ފަރުވާދިނުމަށް ފަހު ވަނީ ދޫކޮށްލާފަ އެވެ.

ނިމިދިޔަ ހަފުތާގެ ތެރޭގައި ފުރަބަންދަށް ލުއިތަކެއް ދީފައި ވާއިރު، އެތެރޭގެ އުދުހުންތަކާއި ރޭލު ދަތުރުތައް ފެށުމުގެ ހުއްދަ އިންޑިއާ ސަރުކާރުން ވަނީ ދީފަ އެވެ. އެ ދުވަހު ބޮޑުވަޒީރު ނަރެންދުރަ މޯދީ ވިދާޅުވީ، ވައިރަހާ އެކު އުޅެން ދަސްކުރަން ޖެހޭ ކަމަށެވެ.