އަމީން ހިޔާ ގައި ހަމަނުޖެހުން ހިންގީ ކެއުން ނުލިބިގެން
26 މެއި 2020 | އަންގާރަ 07:16ހެނދުނުގެ ސައި އަދި ރޭގަނޑުގެ ކެއުން ވަނީ ލަހުން ގެންދެވިފައި
އަމީން ހިޔާ، މާލެ ސިޓީގައި ތޮއްޖެހިގެން ދިރިއުޅޭ ގިނަ އަދަދެއްގެ ބިދޭސީން ލޭބާ ކުއާޓާތަކަށް ގެންދެވިފައިވޭ
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބަލަހައްޓަމުންދާ، އަމީން ހިޔާ ކަރަންޓީން ފެސިލިޓީގައި ހަމަނުޖެހުން ހިންގީ ކެއުން ލިބުމުގައި ލަސްތަކެއް ކުރިމަތި ވެގެން ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވެއްޖެ އެވެ.
ހޯމަ ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ އާދިއްތަ ދުވަހު އަމީން ހިޔާގައި ކުރިމަތިވި ކޭސްއަކީ ދެރަކޮށް ދިމާވި ކަމެއް ކަމަށާއި، އާދިއްތަ ދުވަހު އެތަނުގައި ތިބި މީހުން ކެއުން ގެންދެވިފައިވަނީ ލަހުން ކަމަށެވެ.
މަބްރޫކް ވިދާޅުވީ އެދުވަހުގެ ހެނދުނުގެ ސައި އަދި ރޭގަނޑުގެ ކެއުން ވެސް ގެންދިއުމަށް ލަސްތަކެއް ކުރިމަތިވެފައިވާކަން ފާހަގަކުރެވިފައިވާ ކަމަށެވެ. އަދި މިހާރު މި މައްސަލަ ހައްލުކުރެވިފައިވާ ކަމަށާއި، މިފަދަ މައްސަލަތައް ތަކުރާރުނުވާނެހެން އިންތިޒާމްތައް ހަމަޖެހިފައިވާ ކަމަށް އެޗްޑީސީން މައުލޫމާތުދީފައިވާ ކަމަށް މަބްރޫކް ވިދާޅުވި އެވެ.
ކެއުން ލިބުމުގައި ލަސްތަކެއް ކުރިމަތިވެ ބިދޭސީން ހަމަނުޖެހުން ހިންގީ އާދިއްތަ ދުވަހުގެ ރެއެވެ. އެތަނުގައި ތިބި ބިދޭސީން ވަނީ ޑިއުޓީގައި ތިބި ފުލުހުންނާ ދިމާއަށް ގޮނޑި އާއި ދަގަނޑު ބުރި ފަދަ ތަކެތި އުކައިފަ އެވެ. އެ ހަމަނުޖެހުމުގައި އެއްވެސް މީހަކަށް އަނިޔާ ވެފަައި ނުވާ ކަމަށް ފުލުހުން މައުލޫމާތުދެ އެވެ.
އެތަނުން ޕޮޒިޓިވް ކޭސްތަކެއް ފެނުމާއި ގުޅިގެން ތަން ވަނީ ލޮކްޑައުން ކުރެވިފަ އެވެ. މިހާތަނަށް 100ށް ވުރެ އިތުރު ކޭސް އެތަނުން ވަނީ ފެނިފަ އެވެ. ބިދޭސީން ގެންދެވފައިވާ ކަރަންޓީނު ފެސިލިޓީތަކުގެ ބައެއް ކަންކަން އިސްލާހުކުރަން އެޗްއާރްސީއެމް އިން ވެސް ވަނީ އަންގާފަ އެވެ.
