ނަރުދޫ މީހެއްގެ ބަނޑަށް ދަރިފުޅު މަރުވި މައްސަލަ ތަހުގީގު ކުރަނީ!
25 މެއި 2020 | ހޯމަ 21:17ނިލަންދޫ ސިއްހީ މަރުކަޒަށް ދެއްކިއިރު ވެސްދަރިފުޅު މަރުވެފައިވާކަމުގެ މައުލޫމާތު ލިބޭ
އެޗްޕީއޭގެ ޑޮކްޓަރު ނަޒުލާ ރަފީގު، މިފަދަ މައްސަލަތައް ހެލްތް މިނިސްޓްރީގެ އޮންނަ އުސޫލުގެ ތެރެއިން ބަލާނެ ކަމަށް ވިދާޅުވެފައިވޭ
ށ. ނަރުދޫ މާބަނޑު އަންހެން މީހާ ނިލަންދޫ ސިއްހީ މަރުކަޒަށް ޑޮކްޓަރަށް ދެއްކުމަށް ދިޔައިރު ވެސް ދަރިފުޅު މަރުވެފައިވާ ކަމުގެ މައުލޫމާތު ލިބިފައިވާ ކަމަށާއި، އެމައްސަލަ ހެލްތް މިނިސްޓްރީން ބަލާނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ޑޮކްޓަރު ނަޒުލާ ރަފީގު ވިދާޅުވެއްޖެ އެވެ.
ހޯމަ ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ.ނަޒްލާ ވިދާޅުވީ މި ކޭސްއާ ގުޅިގެން ހޯދަންޖެހޭ މައުލޫމާތުތައް ހޯދަމުންދާ ކަަމަށެވެ.
ށ. އަތޮޅު ހޮސްޕިޓަލްގެ މެނޭޖަރާ ހަވާލާދީ ޑރ.ނަޒްލާ ވިދާޅުވީ ޕޭޝަންޓު ފުރަތަމަ ޑޮކްޓަށް ދެއްކުމަށް ށ. އަތޮޅު ހޮސްޕިޓަލަށް ދިއުމަށް އެދުމުން އެތަނުގައި ކޮވިޑް-19 ގެ ހޮސްޕިޓަލަކަށް ބަދަލު ކުރުމުގެ މަސައްކަތް ކުރިއަށް ދާތީވެ، އެރަށުގެ ތިއޭޓަރަށް އެކްސެސްވުމުގައި މިހާރު ވަގުތީ ދަތިތަކެއް އެބަހުރި ކަމަށް އެންގުނު ކަމަށެވެ.
ބަލި މީހާ ހދ. ކުޅުދުއްފުށި ހޮސްޕިޓަލަށް ގެންދިއުމަށް ރިފަރކޮށް ހުރިހާ އިންތިޒާމްތަކެއް ހަމަޖައްސައި ދިނުމުން ބަލި މީހާ ގޮސްފައި ނުވާކަމަށް ޑރ. ނަޒްލާ ވިދާޅުވި އެވެ. ކުޅުދުއްފުއްޓަށް ނުގޮސް ޑޮކްޓަރަށް ދެއްކުމަށް ދިޔައީ ށ. މިލަންދޫ އަށް ކަމަށާއި، ނިލަންދޫ މަރުކަޒަށް ދެއްކި އިރު، ދަރިފުޅު މަރުވެފައިވާ ކަމުގެ މައުލޫމާތު ލިބިފައިވާ ކަމަށް ޑރ. ނަޒްލާ ވިދާޅުވި އެވެ.
ބަލި މީހުން ޑޮކްޓަށް ދެއްކުމާ ގުޅޭ ގޮތުން ހަމަޖެހިފައިވާ އިންތިޒާމްތަކާއި ގުޅޭ ގޮތުން ޑރ. ނަޒްލާ ވިދާޅުވީ އާންމު ގޮތެއްގައި ލިބެން ޖެހޭ ސިއްހީ ޚިދުމަތް ހަމަ މެދުކެނޑުމެއް ނެތި ފޯރުކޮށް ދިނުމަކީ އެއް އަމާޒު ކަމަށެވެ.
ޑރ. ނަޒްލާ ވިދާޅުވީ އިމަރޖެންސީ ހާލަތްތަކުގައި ސިއްހީ މަރުކަޒު އަދި ހޮސްޕިޓަލްތަކަށް ޕޭޝަންޓް ރިފިއުސް ނުކުރެވޭނެ ކަމަށާއި، އެޕޭޝަންޓަކަށް ދޭން ޖެހޭ ފަރުވާ ދިނުމަށް އެޚިދުމަތް ދެވޭ ގޮތަށް އިންތިޒާމްތައް ހަމަޖައްސައިދޭން ޖެހޭ ކަމަށެވެ.
