ރާއްޖެއިން ފުރަތަމަ ފަހަރަށް ކޮވިޑް-19 ޖެހިފައިވާ މީހަކު ނިޔާވުމާއި ގުޅިގެން، ކަމާބެހޭ އެއްވެސް އިދާރާއެއްގެ އިހުމާލުވޭތޯ ބެލުމަށް ހިންގުނު ތަހުގީގުގައި އެއްވެސް އިދާރާއެއްގެ ނުވަތަ މުއައްސަސާއެއްގެ އިހުމާލެއް އޮތް ކަމަށް ނުފެންނަކަމަށް ރިޕޯޓުން ހާމަވެއްޖެ އެވެ.
މި ރިޕޯޓާއި ގުޅިގެން ހޯމަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ނަޒްލާ ރަފީގް ވިދާޅުވީ މަރުގެ މައްސަލައިގެ ތަހުގީގު ހެލްތު މިނިސްޓްރީގެ ކޮލިޓީ އިމްޕްރޫވްމެންޓު ޑިވިޝަނުން ނިންމާފައިވާކަމަށެވެ. އަދި ތަހުގީގުން އެއްވެސް ބައެއްގެ އިހުމާލެއް އޮތްކަމަށް ނުދައްކާ ކަމަށެވެ.
ސިއްޙީ ފަރުވާ ދެމުން ދަނިކޮށް މީހަކު މަރުވެއްޖެނަމަ ނުވަތަ މަރުވި މީހެއްގެ ސިއްޙީ މައްސަލަތައް ތަހުގީގު ކުރަނީ ހެލްތު މިނިސްޓްރީގެ ކޮލިޓީ އިމްޕްރޫވްމެންޓު ޑިވިޝަނުންނެވެ.
އެއްވެސް އިދާރާއެއްގެ އިހުމާލެއް ނެތް ކަމަށް ރިޕޯޓުގައި ބުނެފައިވީނަމަވެސް ނިޔާވި އައިމިނަތު އާދަމަށް ފަރުވާ ދިނުމުގައި ކަންކަން ލަސްވެފައިވާކަން ހާމަވެފައިވާ ކަމަށް ރިޕޯޓާއި ހަވާލާދީ ޑރ. ނަޒްލާ ވިދާޅުވި އެވެ. އެގޮތުން ވައިރަހަށް ޓެސްޓްކުރުމަށް ސާމްޕަލް ނެގުން ލަސްވެފައިވާ ކަމަށާއި ސާމްޕަލްގެ ނަތީޖާ ލިބުން ލަސްވެފައިވާ ކަމަށެވެ.
މީގެ އިތުރުން، މިކަންތައްތަކާއި ގުޅިގެން ރިޕޯޓުގައި ރަނގަޅުކުރަން ކަންތައްތަކެއް ކަނޑައަޅާފައިވާ ކަމަށް ވެސް ޑރ. ފާހަގަކުރެއްވިއެވެ. އެގޮތުން، ވައިރަހަށް ޕޮޒިޓިވްވާ މީހުންގެ ކޮންޓެކްޓް ޓްރޭސް ކުރާއިރު، އުމުރުން ދުވަސްވީ މީހަކު ފާހަގަކުރެއްވިޖެ ނަމަ، އެމީހާގެ ފުށުން ބަލީގެ އަލާމާތެއް ނެތްކަމުގައި ވީނަމަވެސް ސާމްޕަލް ނެގުން އަވަސް ކުރުމަށް ރިޕޯޓުގައި ވާކަމަށެވެ.
މި މައްސަލައިގައި އެއްވެސް ފަރާތެއްގެ އިހުމާލެއް އޮތް ކަމަށް ރިޕޯޓުގައި ނެތް ނަމަވެސް، އިހުމާލެއް ވެފައި ވާނަމަ، ކަމާގުޅުން ހުރި އިދާރާތަކުން އެ މައްސަލަތައް ބަލާ ފިޔަވަޅު އަޅާނެ ކަމަށްވެސް ޑރ.ނަޒްލާ ވިދާޅުވި އެވެ.
ރާއްޖޭގައި ފުރަތަމަ ފަހަރަށް ކޮވިޑް-19 ޖެހިފައިވާ މީހަކު ނިޔާވިކަމަށް ރިޕޯޓުކޮށްފައިވަނީ އޭޕްރިލް މަހުގެ 30 ވަނަ ދުވަހު އެވެ. މަރުޙޫމާ އައިމިނަތު އާދަމް އަށް ބަލިޖެހިފައިވާކަމަށް ބެލެވޭތީ، އޭނާގެ ސާމްޕަލް ނަގާފައިވަނީ އޭޕްރިލް 27 ގެ ދަންވަރު އެވެ. ޓެސްޓުގެ ނަތީޖާ ލިބުނުއިރު، އައިމިނަތު އާދަމް ވަނީ ދެމިއޮތުމުގެ ޢާލަމަށް ދަތުރުކޮށްފަ އެވެ. މަޢުލޫމާތު ލިބިފައިވާގޮތުގައި އައިމިނަތު ހޮސްޕިޓަލަށް ގެންދިޔައީ ނޭވާލުމުގައި ދަތިތަކެއް ހުރެގެންނެވެ.
