ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން ޕްރިމިއާ ލީގުގެ ކްލަބުތަކަށް ހުއްދަ ދީފި
މިދިޔަ ހަފުތާގައި ވަނީ ކުދި ގްރޫޕުތައް ހިމެނޭ ގޮތަށް ފަރިތަކުރަން ހުއްދަ ދީފައި
ލިވަަޕޫލުން ކުރިއަށް ގެންދިޔަ ފަރިތަކުރުންތަކުގެ ތެރެއިން ފޯވާޑް ރޮބާޓޯ ފިރްމީނޯ: ޖޫން 19 ގައި ޕްރިމިއާ ލީގު ފަށަން އަންނަނީ މަސައްކަތް ކުރަމުން
ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން އިނގިރޭސި ޕްރިމިއާ ލީގުގެ ކްލަބުތަކަށް ހުއްދަ ދޭން އިނގިރޭސިވިލާތުގެ ސަރުކާރުން ނިންމައިފި އެވެ.
ޕްރިމިއާ ލީގު އަލުން ފަށަން މަސައްކަތް ކުރަމުން އަންނައިރު، މިދިޔަ ހަފުތާގައި ވަނީ ކުދި ގްރޫޕްތައް ހިމެނޭ ގޮތަށް ފަރިތަކުރުންތައް ކުރިއަށް ގެންދަން ހުއްދަ ދީފައެވެ. އަދި ހޯމަ ދުވަހުގެ ވަގުތެއްގައި އިނގިރޭސިވިލާތުގެ ސަރުކާރުން ވަނީ ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރުމުގެ ހުއްދަ ކްލަބުތަކަށް ދީފައެވެ.
އެކަމަކު ރައްކާތެރިކަމުގެ ގޮތުން ފަރިތަކުރުންތައް ކުރިއަށް ގެންދަން ވަނީ އުސޫލުތަކެއް ކަނޑައަޅާފައެވެ.
ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން ހުއްދަ ދިންއިރު، މީގެ ކުރިން ޕްރިމިއާ ލީގުން އަށް މީހަކު ވަނީ ކޮރޯނާވައިރަސް (ކޮވިޑް-19)ށް ޕޮޒިޓިވް ވެފައެވެ. ޕްރިމިއާ ލީގު އަލުން ފެށުމަށް ތައްޔާރުވަމުން އަންނާތީ ކްލަބުތަކުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރަމުން އަންނައިރު، މިހާތަނަށް ދެ ބުރެއްގެ މަތިން ހުރިހާ ކްލަބެއްގެ ކުޅުންތެރިންނާއި އޮފިޝަލުން ވަނީ ޓެސްޓު ކޮށްފައެވެ.
ދެ ބުރުން ޖުމްލަ އަށް މީހަކު ޕޮޒިޓިވް ވިއިރު، ޓެސްޓު ކުރުމުގެ ތިންވަނަ ބުރެއްވެސް ކުރިއަށްގެންދާނެ ކަމަށް ޕްރިމިއާ ލީގުން ވަނީ ހާމަކޮށްފައެވެ.
ޕްރިމިއާ ލީގުގެ މެޗުތައް ސަޕޯޓަރުން ނުވައްދާ ކުޅޭ ގޮތަށް ޖޫން މަހުގެ 19 ވަނަ ދުވަހު ފަށަން މަސައްކަތް ކުރަމުން އަންނައިރު، ލީގު ކުރިއަށްގެންދިޔުމަށް ހުރިހާ ކްލަބުތަކުން މިހާރު ވަނީ އެއްބަސްވެފަ އެވެ.
