ޓްރާންސީޓް ކަރަންޓީން ފެސިލިޓީސްތަކަށް ޖުމްލަ 2053 މީހަކު ވަނީ ގެންދެވިފަ: އެންއީއޯސީ
25 މެއި 2020 | ހޯމަ 18:37ހޯމަ ދުވަހު 115 މީހަކު ބަދަލުކުރެވިފައިވޭ
މީގެކުރިން ކަރަންޓީން ފެސިލިޓީއިން ދޫކުރި ފަރާތްތަކަށް އެމްއެންޑީއެފުން އެހީތެރިކަން ފޯރުކޮށްދެނީ
ރަށްރަށުން ކުރު މުއްދަތަށް މާލެ އައިސް, މާލޭގައި ތާށިވެފައި ތިބި މީހުންގެ ތެރެއިން ޖުމްލަ 2053 މީހަކު "ޓްރާންސިޓް ކަރަންޓީން ފެސިލިޓީސް" ތަކަށް މިހާތަނަށް ގެންގޮސްފައިވާކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާން މަބްރޫކް އަޒީޒް ވިދާޅުވެއްޖެ އެވެ.
ހޯމަ ދުވަހުގެ ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ، ހޯމަ ދުވަހު ޓްރާންސިޓް ކަރަންޓީން ފެސިލިޓީސްތަކަށް 115 މީހަކު ގެންގޮސްފައިވާކަމަށާއި އެއާއިއެކު ޖުމްލަ 2053 މީހުން މިހާރު ޓްރާންސިޓް ކަރަންޓީންގައި އެބަތިބި ކަމަށެވެ. އަދި ކުރު މުއްދަތަކަށް މާލެ އައިސް ތާާށިވެފައި ތިބި މީހުންގެ ތެރެއިން އިތުރު މީހުން ޓްރާންސިޓް ކަރަންޓީން ފެސިލިޓީއަށް ގެންދިއުމުގެ މަސައްކަތް ލޯކަލް ގަވަރމަންޓް އެތޯރިޓީ (އެލްޖީއޭ)ން ކުރަމުންދާކަމަށް މަބްރޫކް ވިދާޅުވިއެވެ.
ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުން ރަށަށް ދިއުމުގެ ކުރިން ކަރަންޓީން ވުމަށް "ޓްރާންސިޓް ކަރަންޓީން ފެސިލިޓީސް" ގެ ގޮތުގައި ޖުމުލަ 7 ރިސޯޓެއް އަންނަނީ ބޭނުން ކުރަމުންނެވެ. ޓްރާންސިޓް ކަރަންޓީން ފެސިލިޓީގެ ގޮތުގައި އައްޑޫ، ދ، ޅ، އަދި ރ އަތޮޅުގައިވާ ރިސޯޓުތަކެއް ދަނީ ބޭނުން ކުރަމުންނެވެ.
ހދ، ފ، އަދި މ އަތޮޅުން 3 ރިސޯޓު ވަނީ ހަމަޖެހިފަ އެވެ. އެއީ ހދ. އަތޮޅުން ހޮނޑާފުށި އައިލެންޑް ރިސޯޓު، ފ. އަތޮޅުން ފިލިތެޔޮ އައިލެންޑް ރިސޯޓު އަދި މ. އަތޮޅުން މެދުފުށި އައިލެންޑް ރިސޯޓެވެ.
އައްޑޫ ސިޓީގައި ހެރެތެރެ އައިލެންޑް ރިސޯޓު ހަމަޖައްސާފައި ވާއިރު، ދ. އަތޮޅުން ސަން އަކުއާ އިރުވެލި، ޅ. އަތޮޅުން ފުށިފަރު މޯލްޑިވްސް އަދި ރ. އަތޮޅުން ފުރަވެރި އައިލެންޑް ރިސޯޓް އެންޑް ސްޕާ ވަނީ ހަމަޖައްސާފަ އެވެ.
ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުން އަނބުރާ ރަށަށް ފޮނުވުމުގައި ލަސްތަކެއް އުޅެނީ ވަޞީލަތްތައް ނެތިގެން ނޫންކަމަށާއި، ބަލިމަޑުކަމެއްގެ ތެރޭގައި 'ރިސްކް' ނަގަން ބޭނުން ނުވާތީ ކަމަށް ސަރުކާރުން މީގެކުރިންވެސް ވަނީ ފާހަގަކޮށްފަ އެވެ. މިހާރު ރާއްޖޭގެ ހާލަތު ބަދަލުވެ، އަންނަނީ ގިނަ ލުއި ތަކެއް ދެމުންނެވެ. އެގޮތުން، މޮނީޓަރިންގ ހާލަތައް ނުލާ، ރަށްތަކުގައި ޖަމާއަތުގައި ނަމާދު ކުރުމުގެ ހުއްދަވެސް ވަނީ ދީފަަ އެވެ.
ސަރުކާރުގެ މައިގަނޑު ޢަމާޒަކީ އަތޮޅުތެރެއަށް ބަލި ފެތުރުނަ ނުދީ ކޮންޓްރޯލްކުރުން ކަމަށްވާއިރު، ރަށަށް ދާން ބޭނުންވާ މީހެއްގެ ފުށުން އެ ބަލި ރަށުތެރޭގައި ފެތުރިއްޖެނަމަ، ރަށުގައި ދިރިއުޅޭ އެންމެން ނުރައްކަލެއްގެ ތެރެއަށް ހުށަހެޅިގެން ދާނެ އެވެ. މޮނިޓަރިނގް ހާލަތު އުވާލިތާ 14 ދުވަސް ހަމަނުވާ 4 ރަށް އަދި މިހާރު މޮނިޓަރިންގ ހާލަތުގައިވާ 3 ރަށެއް ފިޔަވައި ހުރިހާ ރަށެއްގައި ޖަމާއަތުގައި ނަމާދު ކުރުމުގެ ހުއްދަ ދީ ލުއި ދިނުމުގެ މަސައްކަތް އަންނަނީ ކުރަމުންނެވެ.
