ޚާއްސަ އުސޫލުތައް ހިނގާ ހާލަތްތަކުގައި ދައުވާގެ މުއްދަތު ނުހިނގާ ގޮތަށް ޖިނާއީ އިޖުރާއަތުގެ ޤާނޫނަށް ގެންނަން ހުށައަޅާފައިވާ އިސްލާހު ފާސްވެއްޖެނަމަ ޕްރޮސެކިއުޓަރ ޖެނެރަލް އޮފީސް (ޕީޖީ) އޮފީހުގެ ބައެއް ޚަރަދުތައް ކުޑަ ކުރެވޭނެ ކަމަށް އެ އޮފީހުން ބުނެފި އެވެ.

އެކަމާ ގުޅޭގޮތުން ޕީޖީ ހުސައިން ޝަމީމް ކުރެއްވި ޓްވީޓެއްގައި ވަނީ ފާއިތުވި އަހަރު ޕީޖީ އޮފީހުން އެކި މައްސަލަތަކާއި ގުޅިގެން ރަށްރަށަށް ކުރި ދަތުރުތަކުގެ ތަފްސީލުތައް ހިއްސާ ކުރައްވާފަ އެވެ. އެގޮތުން 2019 ވަނަ އަހަރު ޕީޖީ އޮފީހުން 210 ދަތުރެއް ކޮށްފައިވާ އިރު، މައްސަލަތަކާއި ގުޅިގެން ރަށްރަށުގައި ހޭދަވި ދުވަސްތަކުގެ ޖުމުލަ އަދަދު 949ށް އަރާ ކަމަށް ޕީޖީ ވިދާޅުވި އެވެ.

ޕީޖީ ވިދާޅުވީ، މި ދަތުރުތަކަށް ކޮށްފައިވާ ޚަރަދުތަކުގެ ޖުމުލަ އަދަދު 3،131،607.39 ( ތިން މިލިއަން އެއްލައްކަ ތިރީސް އެއްހާސް ހަސަތޭކަ ހަތް ރުފިޔާ ތިރީސް ނުވަ ލާރިއަށް) އަރާ ކަމަށެވެ. އެއާއެކު ޚާއްސަ އުސޫލުތައް ހިނގާ ހާލަތްތަކުގައި ދައުވާގެ މުއްދަތު ނުހިނގާ ގޮތަށް ހެދުމަށް ޖިނާޢީ އިޖުރާޢަތުގެ ޤާނޫނަށް ގެނެވުނު އިސްލާޙު ފާސްވެއްޖެ ނަމަ މި ޚަރަދުތައް 20 އިންސައްތައަށް ކުޑަ ކުރެވޭނެ ކަމަށް ޕީޖީ ވިދާޅުވިއެވެ.

ޕީޖީ އެހެން ވިދާޅުވެފައި ވާއިރު، ސަރުކާރުގެ ފަރާތުން ފޮނަދޫ ދާއިރާގެ މެންބަރު މޫސާ ސިރާޖު މަޖިލީހަށް މި ބިލު ހުށަހަޅުއްވަމުން ވިދާޅުވީ، މި އިޞްލާޙުގެ ދަށުން ވީޑިއޯ ކޮންފެރެންސް މެދުވެރިކޮށް ޝަރީޢަތް ކުރިޔަށް ގެންދިޔުމުގެ މަގު ފަހިވެގެންދާނެ ކަމަށެވެ.

ވީޑިއޯ ކޮންފަރެންސިންގެ ޒަރިއްޔާއިން ޝަރީއަތްތައް ކުރިއަށް ގެންދިއުމަކީ ޕީޖީ އޮފީހުގެ ޚަރަދުތައް ބޮޑުތަކުން ކުޑަވާނެ ކަމެއްކަން މަޖިލީހުގެ ޖުޑީޝަރީ ކޮމިޓީގައި ޕީޖީ ހުސައިން ޝަމީމްވެސް ފާހަގަ ކުރައްވާފައި ވެއެވެ.