ހަތަރު ދަންފަޅިއަަށް ސްކޫލްތަކުގައި ކިޔަވައިދިނުމަށް ނުނިންމަން: މިނިސްޓަރ
23 މެއި 2020 | ހޮނިހިރު 21:27ސްކޫލްތަކުގައި ކިޔަވާ ދަރިވަރުން ތިބީ އެކި އަދަދުތަކުގައި
ފައިލް ފޮޓޯ: އެޑިއުކޭޝަން މިނިސްޓަރު އައިޝަތު ދަރިވަރުންތަކަކާ ވާހަކަދައްކަވަނީ
ނިއު ނޯމަލްގައި ހަތަރު ދަންފަޅިއަަށް ބަހާލައިގެން ސްކޫލްތަކުގައި ކިޔަވައިދިނުމަށް ނުނިންމާ ކަމަށާއި، ގިނަ އަދަދެއްގެ ދަރިވަރުން ކިޔަވަމުންދާ ސްކޫލުތަކުގައި ހާލަތަށް ރިޔާއަތް ކުރުމަށްފަހު ދަންފަޅިތަކަށް ބަހާލަގައިގެން ކުރިއަށް ގެންދާނެ ކަމަށް އެޑިއުކޭޝަން މިނިސްޓަރު ޑރ.އައިޝަތު އަލީ ވިދާޅުވެއްޖެ އެވެ.
ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި އިންޓަވިއުއެއްގައި މިނިސްޓަރު އައިޝަތު ވިދާޅުވީ ރާއްޖޭގެ ސްކޫލްތަކުގައި ކިޔަވާ ދަރިވަރުން ތިބީ އެކި އަދަދުތަކުގައި ކަމަށެވެ.
އެގޮތުން ބައެއް ސްކޫލުތަކުގައި 100ށް ވުރެ މަދު ދަރިވަރުން ތައުލީމް ހާސިލް ކުރަމުން ދާއިރު، އަނެއް ބައި ސްކޫލު ތަކުގައި ތިބީ 500ށް ވުރެ މަދު ދަރިވަރުން ކަމަށެވެ. އަދި އަނެއް ބައި ސްކޫލުުތަކުގައ 500ށް ވުރެ ގިނަ ދަރިވަރުން ތައުލީމް ހާސިލް ކުރަމުންދާއިރު، 2000 ދަރިވަރުން ތައުލީމް ހާސިލް ކުރަމުންދާ ހަތަރު ސްކޫލެއް އެބަހުރި ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ސްކޫލުގެ ދަރިވަރުން ހުރި އެކި އަދަދަށް ކަމަށްވާއިރު، ކަންކަން ތަންފީޒު ކުރަމުންދާނީ ވެސް ދަރިވަރުން ތިބި އަދަދަށް ބެލުމަށްފަހުގައި ކަމަށެވެ.
މިނިސްޓަރު ވިދާޅުވީ ނިއު ނޯމަލްގައި ސްކޫލުތަކުގައި އަމަލުކުރާ ގޮތް ތަފާތު ވާނެ ކަމަށެވެ.
އެގޮތުން ކޮވިޑް-19 އިން ރައްކާތެރިވުމަށް އިޖްތިމާއީ ގައިދުރުކަން ބެހެއްޓުމާއި، އަތް ދޮވުމުގެ ކަންކަން އިންތިޒާމު ކުރެވިފައި ހުރުމުގެ އިތުރުން ވެސް ގިނަ ކަންތައްތައް ތަންފީޒު ކުރެވިގެންދާނެ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ނިއު ނޯމަލްގައި ކިޔަވައިދިނުމުގެ ގޮތްތަކަށް ބަދަލު ތަކެއް އަންނާނެ ކަމަށާއި، ގްރޭޑް އަށަކުން ދަށުގެ ހުރިހާ ގްރޭޑެއްގެ ކަރިކިއުލަމްއަށް ބަދަލު އަންނާނެ ކަމަށެވެ. ކަމާބެހޭ ފަރާތްތަކުގެ މަޝްވަރައެކު ކަރިކިއުލަމްގެ ބައެއް އުނިކޮށްފައިވާ ކަމަށް މިނިސްޓަރު ވިދާޅުވިއެވެ. އަދި ސްކޫލްތަކުގެ ޓީޗަރުން ނިއު ނޯމަލް އަށް ތައްޔާރު ވުމަށް އެކި ތަމްރީންތައް ދެވެމުންދާ ކަމަށެވެ.
ސްކޫލުތައް ހުޅުވާލިކަމުގައި ވިޔަސް ކުރީގައި ކިޔަވައި ދެމުން ދިޔަ ގޮތަށް އަންނަން ދުވަސްކޮޅެއް ނަގާނެ ކަމަށެވެ. އަދި ހުރިހާ ގަޑިއެއް ސްކޫލުގައި ނުނެގިދާނެ ކަން މިނިސްޓަރު ފާހަގަކުރެއްވި އެވެ.
މީގެ އިތުރުން މިނިސްޓަރު ވިދާޅުވީ މިހާލަތުން އަރައި ގަނެވުމުން ވެސް ޑިސްޓެންސް މޯޑްގައި ހަފްތާއަކު އެއްދުވަހު ކިޔަވާ ދިނުން ކުރިއަށް ގެންދާނެ ކަމަށެވެ. އަދި ޑިސްޓެންސް މޯޑްގައި ތައުލީމް ހާސިލް ކުރުމުގެ ޝައުގުވެރިކަން ވެސް އުފައްދަން ޖެހޭ ކަމަށް މިނިސްޓަރު ވިދާޅުވި އެވެ.
