7 ރަށެއް ފިޔަވައި އެހެން ހުރިހާ ރަށެއްގައި ޖަމާއަތުގައި ނަމާދު ކުރުމުގެ ހުއްދަ ދީފި
23 މެއި 2020 | ހޮނިހިރު 21:17ހުއްދަ ދީފައިވާ ރަށްތަކުން ކުރެ ރަށެއް މޮނިޓަރިންގެ ހާލަތަށް ގެނެސްފިނަމަ އެރަށެއްގައި ޖަމާއަތުގައި ނަމާދުކުރުން މަނާކުރާނެ
މީގެކުރިން މާލެ ސިޓީ އިސްލާމީ މަރުކަޒުގައި ހުކުރު ނަމާދުކުރަނީ
7 ރަށެއް ފިޔަވައި އެހެން ހުރިހާ ރަށެއްގައި ޖަމާއަތުގައި ނަމާދު ކުރުމުގެ ހުއްދަ ދީފިއެވެ.
މިކަން ހާމަކޮށް އިސްލާމިކް މިނިސްޓްރީން ނެރެފައިވާ ނޫސްބަޔާނެއްގައި ބުނެފައިވަނީ، މޮނީޓަރިންގެ ޙާލަތުގައި ހުރި ރަށްރަށާއި އެ ރަށެއްގައި މީހަކު ކަރަންޓީނު ކޮށްފައިވާ ރަށްތައް ފިޔަވައި އެހެން ރަށްރަށުގައި ޖަމާޢަތުގައި ނަމާދުކުރުން ހުއްދަދީފައިވީ ނަމަވެސް، މޮނީޓަރިންގެ ޙާލަތުގައި އޮތް ރަށެއް، މޮނީޓަރިންގެ ޙާލަތުން ދޫކޮށްލާތާ 14 (ސާދަ) ދުވަސް ނުވާނަމަ، އެ ރަށެއްގެ މިސްކިތްތަކުގައިވެސް ޖަމާޢަތް ނުހެދުމަށް، ހެލްތް ޕްރޮޓެކްޝަން އެޖެންސީން ލަފާދެއްވާފައިވާތީ، އެ ރަށްރަށުގެ މިސްކިތްތަކުގައި ޖަމާއަތުގައި ނަމާދު ނުކުރުމަށް ނިންމާފައިވާނެކަމަށެވެ.
މި ވަގުތު ރާއްޖޭގައި ފުރަބަންދުގެ ޙާލަތުގައި ހުރި ރަށްރަށާއި، އެ ޙާލަތުގައި އޮތް އެއްވެސް ރަށެއްގައި މިސްކިތުގެ ޖަމާޢަތް ހަދަމުންދާ ނަމަ، އެކަން ހުއްޓާލުމަށް އިސްލާމިކް މިނިސްޓްރީން ވަނީ ގޮވާލާފައެވެ. އަދި އެ ޙާލަތުގައި ވާ އެއްވެސް ރަށެއްގެ މިހާރުގެ ޙާލަތު ބަދަލު ނުވަނީސް މިސްކިތު ޖަމާޢަތް ހެދުމުގެ ހުއްދަ މިނިސްޓްރީއަށް ދެވެން ނޯންނާނެކަމަށް ބުނެފައި ވެއެވެ.
އެގޮތުން އެފަދަ ޙާލަތްތަކުގައި ވާ ރަށްތަކާއި ރިސޯޓުތައް ފިޔަވައި އެހެން ރަށްތަކުގައި މިސްކިތުގައި ޖަމާޢަތް ހެދުން ހުއްދަ ދީފައިވާކަމަށާއި މިސްކިތަތްތައް ނުހުޅުވާ ރަށްތަކާއި ރިސޯޓުތަކުގައި، ލޮކްޑައުންގައި އަމަލުކުރަމުން އަންނަ އުސޫލުތަކަށް އަމަލު ކުރުމަށް ވަނީ އިލްތިމާސްކޮށްފައެވެ.
ޖުމްލަ 7 ރަށެއްގައި ޖަމާއަތުގައި ނަމާދުކުރުން ހުއްދަ ދީފައި ނުވާއިރު، އޭގެ ތެރެއިން 3 ރަށެއް ފިޔަވައި ބާކީ ހުރި ރަށްތަކަކީ މޮނީޓަރިންގ ހާލަތު އުވާލިތާ 14 ދުވަސް ހަމަނުވާ ރަށްތަކެވެ.
އިސްލާމިކް މިނިސްޓްރީން ބުނީ މިސްކިތްތައް ހުޅުވާލުމުގައި ސަމާލުކަން ދިނުމަށް ފާހަގަ ކޮށްފައިވާ ކަންކަމަކީ މިހާރުގެ ޙާލަތަށް ރިޢާޔަތް ކުރެވިގެން، ބަޔާން ކުރެވިފައިވާ ކަންތައްތަކަށް ވެފައި މިސްކިތްތައް ހުޅުވާލާއިރު ލުއި ދިނުމުގައި ކުރު ޙަލާތަކަކަށް ބަހާލެވިގެން ކުރިއަށް ގެންދިއުމަށް ނިންމާފައިވާތީ، މިހާރުގެ ޙާލަތު ރަގަޅުވަމުންދާ ކަމަށް އެޗްޕީއޭއިން ކަޑައަޅައިފި ޙާލަތެއްގައި ޖަމާއަތުގައި ނަމާދު ކުރުމާއި ގުޅޭގޮތުން އިތުރު ލުއިތައް ދެމުން ދާނެ ކަމަށެވެ.
