ފިޠުރު އީދު ދުވަހަކީ އާދިއްތަ ދުވަސް

މިއަހަރުގެ ފިތުރު އީދު ދުވަހަކީ އާދިއްތަ ދުވަސް ކަމަށް އިސްލާމިކް މިނިސްޓްރީން ކަނޑައަޅައިފި އެވެ.

ޝައްވާލު މަހުގެ ހަނދު ސާބިތު ކުރުމަށް އިސްލާމިކް މިނިސްޓްރީގައި ބޭއްވި ބައްދަލުވުމަށް ފަހު، އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވީ ރަމަޟާން މަހުގެ 29 ވާ ހުކުރު ދުވަހު އިރުއޮއްސޭއިރު، ރާއްޖެ އާއި އިސްލާމީ އެއްވެސް ގައުމެއްގެ އުދަރެހުން ޝައްވާލު މަހުގެ ހަނދު ފެންމަތިވެފައި ނުވާނެކަން ކަމަށް އިތުބާރު ހުރި ފަލަކީ ހިސާބުތަކުން ޔަގީންވާ ކަމަށެވެ.

އެގޮތުން ރަމަޟާން މަހާއި ޝައްވާލު މަހުގެ ހަނދު ބެލުމުގައި ރާއްޖޭގައި އަމަލު ކުރަމުންދާ އުސޫލުގައިވާ ގޮތުގެ މަތިން ހޮނިހިރު ދުވަހަކީ ރަމަޟާން މަހުގެ 30 ވަނަ ދުވަސް ކަމުގައި ކަނޑައަޅައި، އީދު ދުވަހަކީ އާދިއްތަ ދުވަސް ކަމުގައި ނިންމާފައިވާ ކަމަށް އިސްލާމިކް މިނިސްޓަރު ޑރ. ޒާހިރު ވިދާޅުވި އެވެ.

މި އަހަރުގެ ފިތުރު އާދިއްތަ ދުވަހަށް ކަނޑައަޅާފައިވާއިރު، 25 ރަށެއް ފިޔަވާ ޖަމާއަތުގައި އީދު ނަމާދު ކުރުމުގެ ފުރުސަތު ވަނީ ދީފަ އެވެ. އީދު ނަމާދު ކުރުމުގެ ފުުރަސަތު ނެތް ރަށްތަކަކީ ކޮވިޑް-19 އާ ގުޅިގެން މީގެ ކުރިން މޮނިޓަރިންގެ ހާލަތަށް ލެވިފައިވާ ރަށްތަކެެވެ. އޭގެ ތެރޭގައި ލޮކްޑައުން ކޮށްފައިވާ ގްރޭޓާ މާލެ ސަރަހައްދު ހިމެނޭ އެވެ.