ޕާކިސްތާން އިންޓަރނޭޝަނަލް އެއަރލައިންގެ ފްލައިޓެއް ވެއްޓިއްޖެ

ޕާކިސްތާން އިންޓަރނޭޝަނަލް އެއަރލައިންގެ ފްލައިޓެއް ވެއްޓިއްޖެ އެވެ.

އެކަމާ ގުޅޭގޮތުން "އަލް އަރަބިއާ ނިއުސް"ގައި ރިޕޯޓު ކޮށްފައިވާ ގޮތުން މި ހާދިސާ ހިނގާފައި ވަނީ ހުކުރު ދުވަހުގެ ވަގުތެއްގަ އެވެ. އެގޮތުން ފްލައިޓް ވެއްޓިފައި ވަނީ ކަރާޗީގެ މީހުން ދިރިއުޅޭ ސަރަޙައްދަކަށް ކަމަށާއި، ވެއްޓިފައި ވަނީ ޕާކިސްތާން އިންޓަރނޭޝަނަލް އެއަރލައިން (ޕީއައިއޭ)ގެ ފްލައިޓެއް ކަމަށް އެ ޤައުމުގެ ނޫސްތަކާ ޙަވާލާދީ އަލް އަރަބިއާ ނިއުސްގައި ރިޕޯޓު ކޮށްފައި ވެއެވެ.

ޕީއައިއޭގެ ތަރުޖަމާނާ ޙަވާލާދީ ޑެއިލީ ސްޓަރގައި ރިޕޯޓު ކޮށްފައިވާ ގޮތުން ފްލައިޓް ވެއްޓުނު އިރު، ފްލައިޓުގައި 107 ފަސިންޖަރުން ތިއްބެވެ.

ޖީއީއޯ ނިއުސްގައި ރިޕޯޓު ކޮށްފައިވާ ގޮތުން ފްލައިޓް ވެއްޓުނު ސަރަޙައްދަކީ ޖިއްނާ އިންޓަރނޭޝަނަލް އެއަރޕޯޓު ވެސް އޮންނަ ސަރަޙައްދެވެ. އެގޮތުން އެ ސަރަޙައްދުގެ ބައެއް ގެތަކަށް ވެސް ގެއްލުންވެފައި ވާއިރު، ޕާކިސްތާނުގެ ސިފައިންނާއި، ފުލުހުން އެ ސަރަޙައްދުގައި ހަރަކާތްތެރިވަމުންދާ ކަމަށް ރިޕޯޓުތައް ބުނެއެވެ. ނަމަވެސް ހަދިސާގެ ސަބަބުން ލިބުނު ގެއްލުންތަކުގެ ތަފްސީލުތައް އަދި ހާމަކޮށްފައެއް ނުވެއެވެ.