ޓޭޒަރ ގަން އާއި ގުޅިގެން ރައްޔިތުންގެ ހުރި ކަންބޮޑުވުން ބަލައިގަންނަން: ސީޕީ
އޮޕަރޭޝަން ގައި ބޭނުންކުރަން އަދި ނިންމާފައެއް ނުވޭ
ކޮމިޝަނަރ އޮފް ޕޮލިސް މުހައްމަދު ހަމީދު
ޓޭޒަރ ގަން އާއި ގުޅިގެން ރައްޔިތުންގެ ހުރި ކަންބޮޑުވުންތައް ބަލައިގަންނަ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.
ރާއްޖޓީވީގެ ކޮވިޑް-19 ކަވަރޭޖް އަށް ދެއްވި އިންޓިވައުއެއްގައި ސީޕީ ވިދާޅުވީ، ފުލުހުންގެ އޮޕަރޭޝަންގައި ޓީޒަރ ގަން ބޭނުންކުރަން މިހާތަނަށް ނިންމާފައިނުވާކަމަށާއި، މިހާރު ކުރިޔަށް ދަނީ އެ އާލާތްތައް ތަޖުރިބާކުރުން ކަމަށެވެ.
ފުލުހުން ޓީޒަރ ގަން ބޭނުންކުރާނެ ގޮތެއް ދައްކުވައިދޭ ވީޑިއޯއެއް އާއްމު ކުރުމާއިއެކު ގިނަ ބަޔަކު ވަނީ އެކަމާއިމެދު ކަންބޮޑުވުން ފާޅުކޮށްފައެވެ.
ސީޕީ ވިދާޅުވީ، ރާއްޖެ ނޫން އެހެން ގައުމުތަކުގައިވެސް އާއްމު މުޖުތަމައުގައި ފުލުހުން ބޭނުންކުރާ އާލާތްތަކާއި އަދި އެ އާލާތްތައް ބޭނުންކުރާ ގޮތާއި މެދު އާއްމުން ސުވާލު އުފައްދާ ކަމަށެވެ. އެގޮތަށް ހަމަ ރާއްޖޭގައިވެސް ފުލުހުން ޓޭޒަރ ގަން ބޭނުންކުރުމާއި މެދު ރައްޔިތުންގެ ތެރޭގައި ހުރި ކަންބޮޑުވުންތައް ގަބޫލްކުރައްވާ ކަމަށާއި، އެއީ ބަހުސް ކުރެވެންޖެހޭ ކަމެއް ކަމަށް ދެކިވަޑައިގަންނަވާ ކަމަށް ހަމީދު ވިދާޅުވި އެވެ.
ހަމީދު ވިދާޅުވީ، ރާއްޖޭގެ ފުލުހުންގެ ހިދުމަތަށް 15 އަހަރު ވެފައިވާއިރު މާޒީގައި ފުލުހުން އަމަލުކޮށްގައިވާ ގޮތުން ރައްޔިތުންގެ ސުވާލުތަކެއް ހުންނާނެ ކަމަށެވެ. އޭނާ ވިދާޅުވީ، ހަތިޔާރު ބޭނުން ކުރަން އަދި ނިންމާފައި ނުވިޔަސް ބޭނުންކުރާނެ ގޮތުގެ އުސޫލުތަކާއި ތަމްރީނުތައް ދެވިފައިވާ ކަމަށާއި، އެކަމާއި މެދު ގޮތެއް ނިންމާނީ ސަރުކާރުގެ އިތުރުން ފުލުހުންނާއި ގުޅުންހުރި އެހެނިހެން މުއައްސަސާތަކުން ކަމަށެވެ. އަދި އެ ޑިވައިސް ބޭނުންކުރުމާއި ގުޅޭގޮތުން އާއްމު ރައްޔިތުންގެވެސް ދެކޭގޮތް ބަލައި ހޯދާނެކަން ފާހަގަކުރެއްވި އެވެ.
ޓީޒަރ ގަން އާ ބެހޭގޮތުން ބަހުސް ކުރެވޭއިރު، ރައްޔިތުންގެ ސަލާމަތާއި ރައްކާތެރިކަމަށް ފުލުހުންގެ ހުރި ކެޕޭސިޓީއަކީވެސް މުހިއްމު ކަމެއް ކަމަށް ސީޕީ ހަމީދު ވިދާޅުވިއެވެ. ހުޅުމާލޭގައި ބިދޭސީންތަކަކަށް ދީނީ ހަރުކަށި ފިކުރުގެ މީހުން ދިން ހަމަލާއިން މިސާލު ނަންގަވައި ސީޕީ ވިދާޅުވީ، އެފަދަ ނުރައްކާތެރި ހަމަލާތައް ނިކުންނައިރު ރައްކާތެރިކަމުގެ ވަސީލަތްތައް ހުންނަން ޖެހޭ ކަމަށެވެ. ސީޕީ ވިދާޅުވީ، ރައްޔިތުންގެ ރައްކާތެރިކަމުގެ އިތުރުން ފުލުހުންގެ ރައްކާތެރިކަން ވެސް މުހިއްމު ކަމަށެވެ.
ފުލުހުންނަށް ޓޭޒަރ ގަން ފޯރުކޮށްދޭން ނިންމާފައި ވާތީ، ރައްޔިތުންގެ މަޖިލީހަށް އެ މައްސަލަ ބަލައި ދިނުމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ވަނީ ހުށައަޅުއްވާފައެވެ. ސީޕީ ވިދާޅުވީ، އެކަމާއި ގުޅޭ ގޮތުން ޖަވާބުދާރީ ވާންޖެހޭ ހުރިހާ ކަމަކަށް ފުލުހުން ޖަވާބުދާރީވާނެ ކަމަށެވެ.
ފުލުހުން ބުނީ، ޓޭޒަރ ގަން ބޭނުންކުރާނީ، އެކަމުގެ ތަމްރީނު ލިބި މަތީ މިންޑަގަނޑުތަކަކަށް ބެލުމަށްފަހު ކަމަށެވެ. އަދި ހަވާލުކުރެވޭ މީހާއަކީ އެފަދަ ދަނޑިވަޅުތަކުގައި އެ ތަކެތި ބޭނުންކުރެވޭވަރުގެ ގާބިލް އޮފިސަރެއްތޯ ބެލުމަށް ފަހު ކަމަށް ފުލުހުން ބުންޏެވެ.
