އިތުރު 13 މީހަކު ބަލިން ފަސޭހަވެ، ޖުމުލަ އަދަދު 104ށް!
21 މެއި 2020 | ބުރާސްފަތި 17:25104 މީހަކު ވަނީ ބަލިން ފަސޭހަވެފައި
ކޮވިޑް-19ށް ޓެސްޓްކުރަނީ
އިތުރު 13 މީހަކު ބަލިން ފަސޭހަވެ، ޖުމުލަ ޢަދަދު 104ށް އަރައިފި އެވެ.
ބުރާސްފަތި ދުވަހުގެ ރޭ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓާސްކްފޯހުގެ ތަރުޖަމާން މަބްރޫކް އަޒީޒް ވިދާޅުވީ މިހާތަނަށް ރާއްޖެއިން ޖުމްލަ 104 މީހަކު ބަލިން ފަސޭހަ ވެފައިވާ ކަމަށާއި މި ވަގުތު ބޭސް ކުރެވެމުންދާ 1106 މީހަކު އެބަތިބިމަށެވެ.
މި ކޭސްތަކާއި ގުޅޭ އިތުރު ތަފްސީލް ނޫސްވެރިންގެ ބައްދަލުވުމުގައި ހިއްސާ ކުރެއްވީ އެތަރަހަށީގެ ބަލިތަކުގެ ހާއްސަ ޑޮކްޓަރ، ޑޮކްޓަރ މޫސާ މުރާދުއެވެ. ޑރ މުރާދު ވިދާޅުވީ 13 މީހެއްގެ ޓެސްޓްގެ ނަތީޖާ ނެގެޓިވްވުމުން އެމީހުންނަކީ ބަލިން ފަސޭހަވެފައިވާ ފަރާތްތަކެއްކަމަށް ނިންމާފައި ވާކަމަށެވެ. އޭގެތެރޭގައި ހިމެނެނީ 12 ދިވެހިންނާއި ބިދޭސީއެއްކަމަށެވެ.
މިހާތަނަށް ރާއްޖެއިން 104 މީހަކު ވަނީ ބަލިން ރަނގަޅުވެފައިވާއިރު މީގެތެރޭގައި ގިނައީ ދިވެހިންނެވެ. އަދި މި އަދަދުގެ ތެރޭގައި ރާއްޖޭގެ ރިސޯޓްތަކުން މި ބަލި ފެނުނުއިރު ފާހަގަކުރެވުނު ބިދޭސީން ވެސް ހިމެނެ އެވެ. މިހާރު ރިކަވަރނުވެ ހުރި ކޭސްތަކުގެ ތެރޭގައި ގިނައީ މާލެ ސިޓީއިން ކޮމިއުނިޓީ ޓްރާންސްމިޝަން ދެނެގަނެވުނު ފަހުން ފެންމަތިވެފައިވާ ކޭސްތަކެވެ.
ރާއްޖޭގައި މީހުން ރިކަވަރވާން ނަގާ ދުވަސްތައް ހީކުރި ވަރަށްވުރެ، އިތުރު ކަމަށް އެޗްޕީއޭ އިން ވަނީ ހާމަކޮށްފަ އެވެ. އަދި މިއީ ކީއްވެގެންކަން ދެނެގަންނަން މަސައްކަތްކުރާއިރު، ރާއްޖެއިން މިހާތަނަށް ރިކަވަރވެފައިވާ ފަރާތްތައް ބަލިން ފަސޭހަވެފައިވަނީ އެވަރެޖްކޮށް 17 ދުވަހުގެ ތެރޭގައި އެވެ.
ރާއްޖެއިން ޕޮޒިޓިވްވި މީހުންގެ އަދަދު ވަނީ 1216ށް އަރާފައެވެ. އޭގެ ތެރެއިން 1119 މީހުންނަށް މިހާރުވެސް ފަރުވާދެމުންދާއިރު، 4 މީހަކު މި ބަލި ޖެހިގެން މަރުވެފައިވެއެވެ.
