ފުލުހުންނަށް އިލެކްޓްރިކަލް ވެޕަން ފޯރުކޮށްދޭން ނިންމާފައިވާތީ އެމައްސަލަ މަޖިލީހަށް ހުށަހަޅައިފި

ދިވެހިި ފުލުހުންނަށް ކޮންޑަކްޓަޑް އިލެކްޓްރިކަލް ވެޕަން ނުވަތަ ޓޭޒަރ ގަން ފޯރުކޮށްދޭން ނިންމާފައި ވާތީ، ރައްޔިތުންގެ މަޖިލީހަށް އެމައްސަލަ ބަލާދެއްވުމަށް ހުށަހަޅުއްވައިފި އެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އެޑްރެސްކުރައްވައި، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ، ފޮނުއްވާފައިވާ ސިޓީގައި ވިދާޅުވެފައި ވަނީ، ދިވެހި ފުލުުހުން މީގެކުރިން ޢާންމުކޮށް ބޭނުންކޮށްފައި ނުވާ، ހަތިޔާރެއް ކަމަށްވާ، ކޮންޑަކްޓަޑް އިލެކްޓްރިކަލް ވެޕަން ނުވަތަ ޓޭޒަރ ގަން ބޭނުންކުރުމަށްޓަކައި، އެ ހަތިޔާރު ފޯރުކޮށްދިނުމުގެ ތައްޔާރީތައް ވަމުންދާކަމަށް ފުލުހުންގެ މުއައްސަސާއިން ހާމަކޮށްފައިވާ ކަމަށެވެ.

އިމްތިޔާޒުގެ އެސިޓީގައި އިތުރަށް ވިދާޅުވެފައި ވަނީ، އެ ހަތިޔާރު ފުލުހުންނަށް ފޯރުކޮށްދެވެނީ، ޢާންމުންނަށާއި އަދި ފުލުހުންނަށް ވެސް ކުރިމަތިވެދާނެ އަނިޔާވެރި ޢަމަލަކުން ރައްކާތެރިކަމުގެ ފިޔަވަޅެއްގެ ގޮތުގައި ކަމަށް ފުލުހުން ހާމަކޮށްފައިވާ ކަމަށެވެ.

އެގޮތުން، މި ހަތިޔާރު ފުލުހުންނަށް ދޫކުރުމަށް ހުއްދަ ކުރެވުނީ ކޮން އުޞޫލަކުންތޯއާއި، އަދި ސިޗުއޭޝަން ކޮންޓްރޯލްކުރުމަށް މިހާތަނަށް ފުލުހުންނަށް ކުރިމަތިވީ ކިހާވަރެއްގެ ގޮންޖެހުންތަކަކާއި ނުރައްކަލުގެ މައްޗަށް ރިޢާޔަތް ކުރެވިގެންތޯ ބަލަން ޖެހޭ ކަމަށް އިމްތިޔާޒު ވިދާޅުވެފައި ވެއެވެ.

މީގެއިތުރުން، ފުލުހުން މި ހަތިޔާރުގެ ބޭނުން ނަހަމަގޮތުގައި ނުހިފާނެ ކަމުގެ ކިހާވަރެއްގެ ޔަޤީންކަމެއް އޮވެގެންތޯއާއި ރައްޔިތުންނަށް އެކަން ޔަޤީންކޮށް ދެވޭނެ ކިހާ އިތުބާރު ހިފޭ ނިޒާމެއް ފުލުހުންގެ ތެރޭގައި އޮވެގެންތޯ ބައްލަވާ ދެއްވުމަށް، ރައްޔިތުންގެ މަޖިލީހުގެ ސަލާމަތި ޚިދުމަތްތަކާ ބެހޭ ކޮމެޓީއަށް މި މައްސަލަ ހުށަހަޅުއްވައި ދެއްވުމަށް މެންބަރު އިމްތިޔާޒު ފަހުމީ ވަނީ އެދި ވަޑައިގެންފަ އެވެ.

ފުލުހުންނާ މެދު ރައްޔިތުންގެ މެދުގައި އިތުބާރު ގެއްލި، އަދި މިހާތަނަށް ރައްޔިތުންގެ އިތުބާރު ހޯދިފައި ނުވާއިރު، މިފަދަ ހަތިޔާރެއް ފުލުހުންނަށް ފޯރުކޮށްދިނުމާ މެދު ބައެއް ރައްޔިތުންގެ މެދުގައި ކަންބޮޑުވުން އެބައޮތެވެ.

ޚާއްޞަކޮށް، ކުރީގެ ރައީސް މުޙައްމަދު ނަޝީދުގެ ވެރިކަން ބަޣާވާތަކުން ބަދަލުކުރި އިރު، ފުލުހުންގެ ދައުރު އެކަމުގައި ވަރަށް ބޮޑަށް އޮތެވެ. ޚާއްޞަކޮށް، އޭގެ ފަހުން ރައްޔިތުންނަށް ފުލުހުންގެ ފަރާތުން ކުރަމުންދިޔަ އަނިޔާތައް އިންތިހާއަށް އިތުރުވެ، ގޭގެއިން ފޭރުމުގައި ވެސް ފުލުހުން އުޅެފައި ވެއެވެ. އެފަދަ އެއް

މައްސަލައިގެ ޝަރީޢަތް ކްރިމިނަލް ކޯޓުގައި ހިންގާފައި ވެއެވެ. އެއީ ބިދޭސީން އުޅުނު ގެއަކަށް ފުލުހަކު ޔުނީފޯމުގައި ވަދެ، ޕެޕަރ ސްޕްރޭ ބޭނުންކޮށްގެން ފޭރުން އުޅުނު މައްސަލަ އެކެވެ. ދާދި ފަހުން ވެސް ބިދޭސީންތަކަކަށް ފުލުހުން އަނިޔާ ކުރަމުންދިޔަ ވީޑިއޯއެއް ސޯޝަލް މީޑިއާގައި ވަނީ ޢާންމުވެފަ އެވެ.

މިފަދަ މައްސަލަތަކާ ގުޅިގެން، އިމްތިޔާޒު ފަހުމީ ކުރެއްވި ޓްވީޓެއްގައި ވިދާޅުވެފައިވަނީ، މިހާތަނަށް ފެނިފައިވަނީ ފުލުހުން ރައްޔިތުންނަށް ޙަމަލާދީ އަނިޔާ ކުރިތަން ކަމަށެވެ. އެ ފުލުހުން ފުރަތަމަ ރީހެބިލިޓޭޓް ނުކޮށް، "ތިޔަ ހަތިޔާރެއް ދިނުން ރައްކާތެރިބާ އޭ" ވިދާޅުވެ، އިމްތިޔާޒު ފަހުމީ ވަނީ ސުވާލު އުފައްދަވާފަ އެވެ.