މިމަހުގެ 28 ގެ ކުރިން ކައުންސިލްތަކުގެ ދައުރު ދިގުދައްމާލަން ގާނޫނުއަސާސީއަށް ގެންނަ އިސްލާހު ނިންމާނެ!
ދެން އެންމެ އަވަހަށް ވެސް މަޖިލީހުގެ ޖަލްސާއެއް ބޭއްވޭނީ ފިތުރު އީދު ބަންދު ނިމި، މިމަހުގެ 26 ވަނަ ދުވަހު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު: ކޮވިޑް-19ގެ މިހާލަތުގައި ގާނޫނުއަސާސީއަށް އިސްލާހު ގެނައުމާމެދު މެމްބަރުންނަށް ފުޅާދާއިރާއެއްގައި ބަހުސް ކުރުމަށް ފުރުސަތު ހުޅުވާލެއްވި
މިހާރު ހިނގަމުންދާ ލޯކަލް ކައުންސިލްތަކުގެ ދައުރު ދިގު ދަންމާލުމަށް ގާނޫނުއަސާސީއަށް ހުށަހަޅާފައިވާ އިޞްލާާޙާމެދު މިމަހުގެ 28 ވަނަ ދުވަހުގެ ކުރިން ރައްޔިތުންގެ މަޖިލީހުން ގޮތެއް ނިންމާނެ ކަމަށް މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.
ބުދަ ދުވަހުގެ މަޖިލީހުގެ ޖަލްސާގައި، ސަރުކާރުގެ ފަރާތުން ބިލަތްދޫ ދާއިރާގެ މެންބަރު އަޙްމަދު ހަލީމް ހުށަހަޅުއްވާފައިވާ، ޤާނޫނު ނަންބަރު 22/2019 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤަނޫނު)ށް އިޞްލާޙު ގެނައުމުގެ ބިލާމެދު ވާހަކަ ދައްކަމުން، މަޖިލީހުގެ ރައީސް، ރައީސް ނަޝީދު ވިދާޅުވީ، މިމަހުގެ 26، 27 އަދި 28، މި ތިންދުވަހު މި މައްސަލައަށް ގޮތެއް ނިންމަވާނެ ކަމަށެވެ.
އެގޮތުން ޤާނޫނުއަސާސީއަށް އިޞްލާޙު ގެންނަ ނިންމަވާނީ މަޖިލީހުގެ މެންބަރުން ކަމަށާއި، ނަމަވެސް މިމަހުގެ 28 ގެ ކުރިން މަޖިލީހުން ކޮންމެވެސް ގޮތެއް ނިންމަވާނެކަމަށް މަޖިލީހުގެ ރައީސް ވިދާޅުވިއެވެ. ދެން އެންމެ އަވަހަށް ވެސް މަޖިލީހުގެ ޖަލްސާއެއް ބޭއްވޭނީ ފިޠުރު ޢީދު ބަންދަށް ފަހު، މި މަހުގެ 26ގައި ކަމަށްވެސް ރައީސް ނަޝީދު ވިދާޅުވި އެވެ.
މި ބިލުގެ ފުރަތަމަ ކިޔުން އިއްވާފައި ވަނީ މިމަހުގެ 18 ވަނަ ދުވަހުގެ ބޭއްވި މަޖިލީހުގެ ޖަލްސާގަ އެވެ. ނަމަވެސް މި ބިލަކީ ޤާނޫނުއަސާސީއަށް ގެނެވޭ އިޞްލާޙެއް ކަމަށްވާތީ، މި ބިލާމެދު ސުވާލު އުފެދި، ޢާންމު ޞިއްޙަތުގެ ކުއްލި ނުރައްކަލުގެ މި ޙާލަތުގައި ޤާނޫނުއަސާސީއަށް އިޞްލާޙު ގެނެވިދާނެތޯ ސުވާލު އުފެދި، މިދިޔަ އޭޕްރީލް މަހުގެ 6 ވަނަ ދުވަހުގެ ޖަލްސާގައި ގިނަ މެންބަރުން ވަނީ ބަހުޘް ކުރައްވާފަ އެވެ.
އެ ބިލާ ގުޅިގެން ގިނަ މެންބަރުންގެ މެދުގައި ޚިޔާލު ތަފާތުވެ، ޢާންމު ޞިއްޙަތުގެ ކުއްލި ނުރައްކަލުގެ މި ޙާލަތުގައި ޤާނޫނުއަސާސީ އިޞްލާޙު ކުރުމަކީ ކޮށްގެންވާނެ ކަމެއް ނޫންކަމަށް ގިނަ މެންބަރުން ވަނީ ވިދާޅުވެ ބަހުޘް ކުރައްވާފަ އެވެ.
"ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" އަކީ މި ޚިޔާލު ތަފާތުވުންތައް ނައްތާލުމަށާއި ޤާނޫނީ އެހެން ޙައްލެއް ގެނައުމަށްޓަކައި ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް މަޖިލީހަށް ހުށަހެޅުއްވި ބިލެކެވެ. ޙަސަން ލަޠީފް ވެސް ވިދާޅުވެފައިވަނީ، މިޙާލަތުގައި ޤާނޫނުއަސާސީއަށް އިޞްލާޙު ގެނައުމަކީ ކުރަން ހެޔޮވާވަރުގެ ކަމެއް ނޫންކަމާއި، ރާއްޖެއަށް މިހާރު ދިމާވެފައިމިވާ ޙާލަތަކީ ޤާނޫނުއަސާސީއަށް އިޞްލާޙު ގެނެވޭނެ ޙާލަތެއްކަމަށް ޤަބޫލު ނުކުރައްވާ ކަމަށެވެ.
ނަމަވެސް، އެޓަރނީ ޖެނެރަލް އިބްރާހީމް ރިފްޢަތު އަދި މަޖިލީހުގެ ކައުންސެލް ޖެނެރަލް ފާތިމަތު ފިލްޒާ ވިދާޅުވެފައިވާ ގޮތުގައި، ޤާނޫނުއަސާސީގެ 253 ވަނަ މާއްދާގައި ބުނާ ކުއްލި ނުރައްކަލުގެ ޙާލަތެއް ރައީސުލްޖުމްހޫރިއްޔާ އިޢުލާނު ކުރައްވާފައި ނުވާކަމަށާއި އެހެންކަމުން މިޙާލަތުގައި ޤާނޫނުއަސާސީއަށް އިޞްލާޙު ގެނައުމަށް އެއްވެސް ހުރަހެއް ނެތްކަމަށް ވިދާޅުވެފަ އެވެ.
މީގެ އިތުރުން އެޓަރނީ ޖެނެރަލް ރިފްޢަތާއި، މަޖިލީހުގެ ކައުންސެލް ޖެނެރަލް ފިލްޒާ ވެސް ވިދާޅުވެފައިވަނީ، ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤާނޫނުގެ 4 މާއްދާ އެފަދައިން އޮތްހާ ހިނދަކު، އެމާއްދާ އިޞްލާޙު ކުރުމަކާ ނުލައި މިހާރު 3 އަހަރަށް އިންތިޚާބު ކޮށްފައިވާ ކައުންސިލްތަކުގެ ދައުރު، ރައްޔިތުންގެ މަޖިލީހުން ފާސްކުރާ ޢާންމު ޤާނޫނަކުން އެއަށްވުރެ އިތުރު މުއްދަތަކަށް އިތުރު ކުރެވިދާނެ ކަމަކަށް ނުފެންނަ ކަމަށެވެ.
މިހާރު ހިނގަމުންދާ ލޯކަލް ކައުންސިލްތަކުގެ ދައުރު އަންނަ ޖޫން މަހުގެ 3 ގެ ނިޔަލަށް ހަމަވާނެ އެވެ.
