މަރޗް މަހުގެ 19 އާ ޖޫން މަހުގެ 30 ދެމެދު ވިސާ ގެ މުއްދަތު ހަމަވާ ފަރާތްތަކަށް ވީސާ ފީގެ ޖޫރިމަނާ ދައްކަން ނުޖެހޭ ގޮތަށް އިމިގްރޭޝަނުން ހަމަޖައްސައިފި އެވެ.
އިމިގްރޭޝަނުން ބުނީ، މާލެ 'ލޮކްޑައުން' ކުރުމާއި ގުޅިގެން ސަރުކާރު އޮފީސްތައް ބަންދުކުރުމުގެ ސަބަބުން އެކި ކަހަލަ ވިސާގައި ރާއްޖޭގައި އުޅޭ ފަރާތްތަކުގެ ވިސާގެ މުއްދަތު އިތުރުކުރުމާއި ވިސާ ފައިސާ ދެއްކުމުގައި އާއްމު ރައްޔިތުންނާއި ވިޔަފާރި ކުންފުނިތަކަށް ބޮޑެތި ގޮންޖެހުންތަކާއި ކުރިމަތިވެފައިވާ ކަމަށެވެ.
އަދި ވިސާ ފައިސާ ދެއްކުމަށް ދަތިވެފައިވާކަން ފާހަގަކުރެވިފައި ވާތީ މާރޗް މަހުގެ 19 އިން ފެށިގެން ޖޫން މަހުގެ 30 އާ ދެމެދަށް ވިސާ ގެ މުއްދަތު ހަމަވާ ފަރާތްތަކަށް ވިސާފީގެ ޖޫރިމަނާ ދައްކަން ނުޖެހޭ ގޮތަށް ހަމަޖެހިފައިވާ ކަމަށެވެ.
އިމިގްރޭޝަނުން ވިސާ ފީ މާފްކޮށްދީފައި ވާއިރު، ވިސާ ޖެހުމަށްޓަކައި އިމިގްރޭޝަނަށް ހުށައެޅިފައިވާ ޕާސްޕޯޓްތައް ދޫކުރުން ވަނީ ފަށާފަ އެވެ. އެންމެ ގިނައިން ދޫކޮށްފައިވަނީ ވަރކް ވިސާ އަށް ހުށައަޅާފައިވާ ޕާސްޕޯޓް ތަކެވެ.
