ތ ގުރައިދޫގައި ބިދޭސީއަކު މަރާލައިފި
20 މެއި 2020 | ބުދަ 20:55މިކަމާ ގުޅިގެން ފުލުހުންގެ ބަހެއް ނުލިބޭ
ތ ގުރައިދޫ ސިއްޙީ މަރުކަޒު- ކައުންސިލުން މައުލޫމާތުދީފައިވާ ގޮތުގައި އޭނާ މިވަގުތު އޮތީ ގުރައިދޫ ސިއްހީ މަރުކަޒުގައި
ތ ގުރައިދޫގައި ބިދޭސީއެއްގެ ގަޔަށް ވަޅި ހަރާ އެއްލާލާފައި އޮއްވައި ފެނިއްޖެއެވެ.
މި މީހަކީ އެ ރަށަށް ދަނޑުވެރި ކަމުގެ މަސައްކަތް ކުރުމަށް ގޮސް އުޅޭ ބަންގްލަދޭޝްގެ ފިރިހެނެއް ކަމަށް ކައުންސިލް އިދާރާއިން މައުލޫމާތު ދީފައި ވެއެވެ.
އެކަމާ ގުޅޭގޮތުން ގުރައިދޫ ކައުންސިލުން "ރާއްޖެއެމްވީ"އަށް މައުލޫމާތު ދެމުން ބުނީ، ބިދޭސީ މީހާގެ ހަށިގަނޑުގެ ދެތިން ތަނަކަށް ވަޅިން ހަމަލާދީފައިވާ ކަމަށާއި، އޭނާ އެއްލާލާފައި އޮއްވައި ފެނުނީވެސް މަސައްކަތް ކުރަމުންދިޔަ ސައިޓުގެ ކުރިމަތީގައި އޮންނަ ސަރަހައްދުން ކަމަށެވެ.
ބުދަ ދުވަހުގެ ރޭގެ ވަގުތެއްގައި އޭނާ ފެނިގެން ފުލުހުންނަށް ރިޕޯޓް ކުރީވެސް އެރަށުގައި މަސައްކަތް ކުރާ ބިދޭސީއެއްކަމަށް އޭނާ ވިދާޅުވިއެވެ.
އޭގެ އިތުރުން، އެމީހާ ސިއްޙީ މަރުކަޒަށް ގެންދެވުނުއިރުވެސް މަރުވެފައިވާ ކަމަށާއި، އޭނާ މިވަގުތު އޮތީ ގުރައިދޫ ސިއްހީ މަރުކަޒުގައިކަމަށް ކައުންސިލުން މައުލޫމާތުދެއެވެ.
މިކަމާ ގުޅިގެން ފުލުހުންގެ ބަހެއް އަދި ލިބިފައެއް ނުވެއެވެ.
