ޗައިނާގެ އިރުމަތީގައި ކޮރޯނާވައިރަސް ފެތުރެމުންދަނީ ތަފާތު ގޮތަކަށް ކަމަށް މާހިރުން ބުނެފި

ޗައިނާގެ އިރުމަތީ ހިސާބުތަކުގައި މިހާރު ފެތުރެމުންދާ ކޮރޯނާވައިރަސް ފެތުރެނީ ކުރީގައި ވައިރަސް ފެތުރެމުންދިޔަ ގޮތަށް ނޫންކަމަށް މިކަމުގައި ހަރަކާތްތެރިވާ އިސް ޑޮކްޓަރަކު ވިދާޅުވެއްޖެ އެވެ.

ޗައިނާގެ ގިނަ ހިސާބުތަކުގައި ވައިރަސް ފެތުރުން ކޮންޓްރޯލް ކުރެވިފައި ވީނަމަވެސް އިރުމަތީ ބޯރޑަރ އޮންނަ ޖިލިން ޕްރޮވިންސް ގައި ވަނީ އައު ކުލަސްޓަރ އެއް ފެނިފަ އެވެ. އެއާއެކުގައި ދެ ވަނަ ވޭވެއް އައުމުގެ ބިރު ވަނީ ހީވެފަ އެވެ.

ނޭޝަނަލް ހެލްތު ކޮމިޝަންގެ އެކްސްޕަރޓް ގްރޫޕްގައި މަސައްކަތް ކުރައްވާ ކްރިޓިކަލް ކެއަރ މެޑިސިންގެ ދާއިރާގައި މަސައްކަތްކުރައްވާ ޗިއު ހައިބޯ ވިދާޅުވީ އިރުމަތީ ސަރަހައްދުގައި ވައިރަސް ޖެހޭ މީހުން އިންކިޔުބޭޝަންގެ މުއްދަތު ވުހާންގައި ވައިރަސް ޖެހިގެން ރިޕޯޓްކުރި މީހުންނަށް ވުރެ އިތުރު ކަމަށެވެ.

އިރުމަތީ ސަރަހައްދުގައި ފެންނަ ކްލަސްޓަރ ތަކުގައި ވައިރަސް އެމީހުންގެ ހަށިގަނޑުގައި ހުންނަ ވަގުތުވެސް ވުހާން އިން ފެނުނު ކުލަސްޓަރ ތަކަށްވުރެ ގިނަ ކަމަށާއި އެހެންވުމުގެ ސަބަބުން ރަނގަޅުވާން ގިނަ ވަގުތު ނަގާ ކަމަށް ހައިބޯ ވިދާޅުވި އެވެ. އަދި މިތަނުން ފެންނަ ބަލި މީހުންގެ ހުން ހުންނަކަން ބޭރަށް ނުފެންނަ ކަމަށާއި އެއާއެކު ބޮޑަށް ގެއްލުންދެނީ އެހެން ގުނަވަންތަކަށް ވުރެ ފުއްޕާމެއަށް ކަމަށް ހައިބޯ ވިދާޅުވި އެވެ.

ހައިބޯ ވިދާޅުވީ އިރުމަތީ ސަރަހައްދުން ފެންނަ ކްލަސްޓަރ ތަކަކީ އެސަރަހައްދަށް އެތެރެވި މީހުންގެ ފަރާތުން ފެނިގެންއުޅޭ ކްލަސްޓަރތައް ކަމަށެވެ. އެކަމުގެ ސަބަބުން ތަފާތުވާ ކަމަށްވެސް ހައިބޯ ވިދާޅުވި އެވެ.

އެތަނަށް ވައިރަސް އައީ ސީދާ ކޮން ސަރަހައްދަކުން ކަމެއް ހައިބޯ ވިދާޅެއްނުވެ އެވެ. އެހެންނަމަވެސް ޖިލިން އަކީ ރަޝިޔާ އާ އިންވެގެން އޮންނަ ސަރަހައްދެކެވެ.

ޗައިނާ އިން ބުދަ ދުވަހު ފަސް މީހަކަށް ވަނީ ވައިރަސް ޖެހިފަ އެވެ. މީގެ ތެރެއިން ހަތަރު މީހުންނަކީ ޗައިނާގެ ތެރެއިން ފެނުނު ކޭސްތަކެވެ. އެކަކީ ޗައިނާއަށް އެތެރެވި މީހުންނެވެ.

ޗައިނާގައި މިހާތަނަށް ވައިރަސް ޖެހިފައިވާ 82،965 މީހުން ވަނީ ފެނިފަ އެވެ. މަރުވެފައިވަނީ 4،634 މީހުންނެވެ.