ގެއިން ބޭރަށް ނުކުމެ އުޅުމަށް ހުއްދަދީ މިސްކިތްތަކާއި ކެފޭތައްވެސް ހުޅުވާލަނީ
20 މެއި 2020 | ބުދަ 16:13މާލެ ސަރަޙައްދުގައި އޮތް ފުރަބަންދުގެ މުއްދަތު ހަމަވުމުން، ލުއިތަކެއް ދޭނެ
ލޮކްޑައުންއަށް ލުއި ދިނުމުން ގެއިން ބޭރަށް ނުކުމެ އުޅުމަށް ހުއްދަދީ އާންމު ވިޔަފާރިތައްވެސް ހުޅުވާލާނެ
ރާއްޖޭގައި އިއުލާނު ކޮށްފައިވާ ފުުރަބަންދުގެ މުއްދަތު ހަމަވުމުން، ފުރަބަންދަށް ލުއިތަކެއް ދިނުމަށް ތައްޔާރުވަމުން އަންނަ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ވިދާޅުވެއްޖެ އެވެ.
ބުދަ ދުވަހުގެރޭ ޤައުމާ މުޙާތަބުކުރައްވާ ދެއްކެވި ވާހަކަފުޅުގައި ރައީސް ސޯލިޙު ވިދާޅުވީ، މިހާރު އަޅާފައިވާ ފިޔަވަޅުތައް ރައްޔިތުންގެ އެއްބާރުލުމާ އެކު، ރަނގަޅަށް ތަންފީޒުވަމުން ދާނަމަ ޞިއްޙީ ޚިދުމަތްތެރިންގެ ލަފަޔާ އެއްގޮތަށް މާލެ ސަރަޙައްދުގައި އޮތް ފުރަބަންދުގެ މުއްދަތު ހަމަވުމުން، ލުއިތަކެއް ދެއްވުމަށް ތައްޔާރުވަމުންދާ ކަމަށެވެ.
އެގޮތުން އެކަން ކުރައްވާނީ ފިޔަވަހިތަކަކަށް ބައްސަވައިގެންކަން ފާހަގަކުރައްވައި ރައީސް ވިދާޅުވީ، ފުރަތަމަ ކަމަކީ، ގެއިން ބޭރަށް ނުކުމެ އުޅުމަށް ލުއިތަކެއް ދިނުމާއި، މިހާރަށް ވުރެ ފަސޭހަ އިންތިޒާމަކުން ޢާންމު ވިޔަފާރިތަކަށް ފުރުޞަތު ހުޅުވާލުން ކަމަށެވެ. އަދި އެހެން ފިޔަވަހިތަކުގައި މީހުން އެއްވެ އުޅުމުގެ ކަންކަމަށް ލުއިތަކެއް ދެވޭނެކަން ރައީސް ފާހަގަ ކުރެއްވި އެވެ.
އޭގެ އިތުރުން، މިސްކިތްތައް ހުޅުވާލުމާއި، ހޮޓާތަކާއި ކެފޭތައް ހުޅުވުމަށާއި، ސްކޫލްތަކުގެ ކިޔަވައިދިނުން ފެށުމަށް ވެސް ވަކި އިންތިޒާމުތަކެއްގެ ދަށުން ހުއްދަ ދެވޭނެކަމަށާއި، ސަރުކާރުގެ އޮފީސްތަކާއި އަމިއްލަ އޮފީސްތަކުގެ ވަޒީފާއަށް ނުކުތުމަށް ވެސް ޚާއްޞަ އިންތިޒާމުތަކެއް ހަމަޖެއްސޭނެކަމަށް ރައީސް ވިދާޅުވިއެވެ. އަދި އެކަމުގެ ތަފްސީލުތައް ކަމާބެހޭ ފަރާތްތަކުން ހާމަ ކުރައްވާނެ ކަމަށް ރައީސް ވިދާޅުވ އެވެ.
ރައީސް ވިދާޅުވީ، ރަށްރަށުގައިވެސް އަޅާފައިވާ ފިޔަވަޅުތަކަށް ލުއި ދިނުމަށް ނިންމަވާފައިވާ ކަމަށެވެ.
ރައީސް ވިދާޅުވީ، ފުރަބަންދަށް ދެވޭ ލުއިތަކުގެ ސަބަބުން ރާއްޖޭގައި މި ބަލީގެ ޙާލަތު އިތުރަށް ގޯސްވާ ނަމަ، ފުރަބަންދުގެ ޙާލަތަށް އެނބުރި ދާންޖެހުމަކީ އެކަށީގެންވާ ކަމެއް ކަމަށެވެ. އަދި ފުރަބަންދަށް ދެވޭ ލުއިތަކަކީ، ކުރިން އުޅެމުން ދިޔަ ޢާންމު ދިރިއުޅުމަށް މުޅިން ބަދަލުވުން ކަމުގައި ދެކިގެން ނުވާނެކަން ފާހަގަ ކުރައްވައި ރައީސް ވިދާޅުވީ، ލުއިތަކެއް ދިނުމުގެ މާނައަކީ، ކޯވިޑް ބަލި ރާއްޖެއިން ފިލައިގެން ދިއުން ނޫން ކަމަށެވެ.
