ބަޔާން މިއުނިކްގެ އެއްބަސްވުން ނޯޔާ އާކޮށްފި

ބަޔާން މިއުނިކާއެކު ހަދާފައިވާ އެއްބަސްވުން އެޓީމުގެ ކެޕްޓަން މެނުއެލް ނޯޔާ އާކޮށްފި އެވެ.

ޝަލްކާއިން 2011 ވަނަ އަހަރު ބަޔާނަށް ބަދަލުވި ނޯޔާ، އެކުލަބާއެކު ހަދާފައިވާ އެއްބަސްވުން އަންނަ ސީޒަނުގައި ހަމަވަން އޮތްއިރު، ބުދަ ދުވަހުގެ ވަގުތެއްގައި ނޯޔާ ވަނީ ބަޔާންގެ އެއްބަސްވުން އާކޮށްފައެވެ. އުމުރުން 34 އަހަރުގެ ނޯޔާ އެއްބަސްވުން އާކޮށްފައިވަނީ 2023 ވަނަ އަހަރުގެ ޖޫން މަހުގެ 30 ވަނަ ދުވަހުގެ ނިޔަލަށެވެ.

ބަޔާންގެ ޗެއާމަން ކާލް-ހެއިންޒް ރުމެނިގާ ވިދާޅުވީ ނޯޔާ އަކީ މުޅި ދުނިޔޭގައިވެސް ހުރި އެންމެ މޮޅު ގޯލްކީޕަރު ކަމަށާއި، ބަޔާންގެ އެއްބަސްވުން ނޯޔާ އާކުރުމުން އުފާވާ ކަމަށެވެ.

ބަޔާންގެ އެއްބަސްވުން ނޯޔާ އާކުރިއިރު، މީގެ ކުރިން އެއްބަސްވުން އާކުރުމަށް ދެކެވުނު ވާހަކަތައް މީޑިއާގައި ލީކުވުމުން ނޯޔާ ވަނީ ހިތްހަމަނުޖެހުން ފާޅު ކޮށްފައެވެ.

2023 ގެ ނިޔަލަށް ބަޔާންގައި މަޑުކުރަން ނޯޔާ ނިންމިއިރު، ނޯޔާ ގަތުމަށް ޗެލްސީން ވަނީ މަސައްކަތް ކޮށްފައެވެ.

ޝާލްކާ އިން 2004 ވަނަ އަހަރު ކެރިއަރު ފެށި ނޯޔާ ބަޔާނަށް ބަދަލުވީ 2011 ވަނަ އަހަރުގައެވެ. މިހާތަނަށް ބަޔާނަށް 375 މެޗު ނޯޔާ ކުޅެދީފައިވާއިރު، އޭނާ ވަނީ ބަޔާނާއެކު 18 ތަށި ހޯދާފައެވެ. އޭގެ ތެރޭގައި ޖަރުމަން ލީގު ހަތް ފަހަރު، ޖަރުމަން ކަޕް ހަތަރު ފަހަރު އަދި 2012/2013 ވަނަ އަހަރުގެ ސީޒަނުގެ ޔުއެފާ ޗެމްޕިއަންސް ލީގު ހިމެނެއެވެ.