އީވާގެ އިސްލާހާއެކު މާލިއްޔަތު ކޮމެޓީގެ 19 ހުށަހެޅުން މަޖިލީހުން ފާސްކޮށްފި
20 މެއި 2020 | ބުދަ 10:01މިއަހަރު ލިބޭނެ ކަމަށް އަންދާޒާކުރި އާމްދަނީގެ ދެބައިކުޅައެއްބައިވެސް ނުލިބޭނެ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން: ކޮވިޑް-19 އާ ގުޅޭ ގިނަ ކަންކަން މަޖިލީހަށް ހުށަހެޅިގެންދިޔަ، އަދި ގިނަ ކަންކަން ނިންމައި، ސަރުކާރަށް 300 ށްވުރެ ގިނަ ހުށަހެޅުން ހުށަހެޅިފައިވޭ
ކޮވިޑް-19އާ ގުޅިގެން މާލީގޮތުން ދިވެހިރާއްޖެއަށް ކުރާނެ އަސަރުތަކާއި އަދި ދައުލަތުން ކުރާ ޚަރަދުތައް އޮޑިޓްކުރަންރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު، އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރ އަލީ އާޒިމް ހުށަހަޅުއްވާފައިވާ މައްސަލާގައި، މާލިއްޔަތު ކޮމެޓީގެ ދާއިރާގެ ތެރޭގައި ހިމެނޭކަންތައްތައް ދިރާސާކޮށް ނިންމި ގޮތުގެ ރިޕޯޓު ރައްޔިތުންގެ މަޖިލީހުން ފާސްކޮށްފި އެވެ.
ބުދަ ދުވަހުގެ މަޖިލީހުގެ ޖަލްސާގައި މާލިއްޔަތު ކޮމެޓީގެ އެ ރިޕޯޓު ފާސްކުރީ 63 މެންބަރުންގެ އިއްތިފާޤުން ނެވެ. އެރިޕޯޓު ފާސްކުރުމުގެ ކުރިން މަޖިލީހުގެ ނައިބު ރައީސް އީވާ އަަބްދުﷲ އެ ރިޕޯޓަށް ހުށަހެޅުއްވި، ތިން ނުކުތާގެ މައްޗަށް އެކުލެވޭ އިސްލާހު ވެސް 60 މެންބަރުންގެ އިއްތިފާގުން ވަނީ ފާސްކޮށްފަ އެވެ.
މާލިއްޔަތު ކޮމެޓީގެ ރިޕޯޓުގައި ކަމާގުޅުން ހުރި އިދާރާތަކުން ހޯދި މައުލޫމާތުގެ މައްޗަށް ބިނާކޮށް ވަރަށް ފުރިހަމަ ދިރާސާ ރިޕޯޓެއް ވަނީ އެކުލަވާލާފަ އެވެ. އެގޮތުން ކޮމެޓީން އެއްކުރި މައުލޫމާތުތަކުގެ އަލީގައި ސަރުކާރަށް 19 ހުށަހެޅުމެއް ހުށަހެޅުމަށް ކޮމެޓީގެ ރިޕޯޓުގައި ނިންމާފައި ވެއެވެ.
އެގޮތުން، ދައުލަތުގެ އާމްދަނީ މިއަހަރަށް އަންދާޒާ ކުރި މިންވަރުގެ ދެބައިކުޅަ އެއްބަޔަށްވުރެ ދަށްވާނެ ކަމަށް ބެލެވޭތީ، ދައުލަތުގެ ހުރިހާ މުއައްސަސާތަކުގެ ޚަރަދުތައް ކުޑަކުރުމަށް ހުށަހަޅާފައި ވެއެވެ. ދައުލަތުގެ ބަޖެޓު ޑެފިސިޓް ކުޑަކުރުމަށް، ހޯދާ ބޭރުގެ ހިލޭ އެހީއާއި ދަރަންޏަށް ނަގާ ފައިސާގެ ތަފުސީލުތަކާއި ދައުލަތުގެ ރިޒާވާއި އިންފްލޭޝަނަށް އަންނާނެ ބަދަލުތަކާ ގުޅޭގޮތުން ވެސް ހޯދުންތައް ހޯދައި، އިގްތިޞާދު ރަނގަޅުކުރުމަށް ބާރު އަޅާފައި ވެއެވެ.
މީގެއިތުރުން، ދަނޑުވެރިކަން ފަދަ އިތުރު ދާއިރާތައް ތަރައްގީކޮށް، ޓޫރިޒަމް ދާއިރާއިން ވެސް ވޯޓަރ ސްޕޯޓްސް ފަދަ ކަންކަން އިތުރަށް ކުރިއެރުވުމަށްޓަކައި ރާއްޖޭގައި ބައެއް ތަކެތި އުފައްދާ ދުނިޔޭގެ މަރކެޓަށް ނެރުންފަދަ ކަންކަން ތައާރަފުކުރުން ފަދަ އިތުރު މަސައްކަތްތައް ކުރުމަށްވެސް ކޮމެޓީގެ ރިޕޯޓުގައި ފާހަގަ ކޮށްފައި ވެއެވެ.
ކޮމެޓީގެ ރިޕޯޓަށް މަޖިލީހުގެ ނައިބު ރައީސް އީވާ ހުށަހެޅުއްވި އިސްލާހުގައި ވިދާޅުވެފައި ވަނީ، ކޮވިޑް-19އާ ގުޅިގެން ދިވެހިރާއްޖޭގެ އިޤުތިޞާދަށާއި ދައުލަތުގެ ޢާމްދަނީއާއި ޚަރަދާއި ދަރަންޏަށް އާދަޔާ ޚިލާފު ޙާލަތެއް ދިމާވަމުންދާ މިފަދަ ދަނޑިވަޅެއްގައި، ކޮވިޑް-19 އާ ގުޅިގެން ދައުލަތުގެ ބަޖެޓުން ކުރެވޭ ޚަރަދުތަކާއި، މި ޙާދިސާއާ ގުޅިގެން ލިބޭ ހިލޭ އެހީއާއި ދަރަނިތައް އޮޑިޓްކޮށް އެ ރިޕޯޓުތައް ދައުލަތުގެ ކަމާބެހޭ އިދާރާތަކަށް ފޮނުވައި ހާމަކުރުމަކީ ރައްޔިތުންގެ މުދަލާއި ފައިސާއަށް ޖަވާބުދާރީ ވުމަށްޓަކައި އެހާމެ މުހިންމު ކަމެއްކަމުގައި ޤަބޫލު ކުރައްވާ ކަމަށެވެ.
އެގޮތުން، ކޮވިޑް-19 އާ ގުޅިގެން ދައުލަތުގެ އެންމެހައި މުއައްސަސާތަކުން ކޮންމެ ކުއަރޓަރއެއްގައި ކުރާ ޚަރަދާއި ހިލޭ އެހީއާއި ދަރަނީގެ މާލީ ރިޕޯޓުތަކުގައި ފައިނޭންޝަލް އޮޑިޓްކޮށް ކޮންމެ ކުއަރޓަރެއް ނިމޭތާ ލަސްވެގެން 30 ދުވަހުގެ ތެރޭގައި، އޮޑިޓަރ ޖެނެރަލް، އޮޑިޓް ރިޕޯޓު ތައްޔާރުކޮށް ނިންމުމަށް މަޖިލީހުން ފާސްކުރި އިސްލާހު ފާހަގަ ކޮށްލެވެއެވެ.
