ކޮވިޑް-19 އާގުޅިގެން ދައުލަތުން ކުރާ ޚަރަދުތައް އޮޑިޓްކުރަން މަޖިލީހުން ފާސްކޮށްފި

ކޮވިޑް-19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން ޢާއިލާ ތަކާއި, ވިޔަފާރިތަކުގެ ޢާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގުރާމު ތަންފީޒުކުރުމަށް ރައްޔިތުންގެ މަޖިލީހުން ދެކޭގޮތް ކަނޑައެޅުމުގެ މައްސަލާގައި، މަޖިލީހުގެ މާލިއްޔަތު ކޮމެޓީން ނިންމިގޮތުގެ ރިޕޯޓަށް މަޖިލީހުގެ ނައިބު ރައީސް އީވާ ޢަބްދުﷲ ހުށަހެޅުއްވި ތިން ނުކުތާގެ މައްޗަށް އެކުލެވޭ އިސްލާހު ރައްޔިތުންގެ މަޖިލީހުން ފާސްކޮށްފި އެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި، އިވާ ހުށަހަޅުއްވާ ފައިވާ އިޞްލާޙުގައި ބުނެފައިވަނީ، ކޮވިޑް-19 އާ ގުޅިގެން ދިވެހިރާއްޖޭގެ އިޤުތިޞާދަށާއި ދައުލަތުގެ ޢާމްދަނީއާއި ޚަރަދާއި ދަރަންޏަށް އާދަޔާ ޚިލާފު ޙާލަތެއް ދިމާވަމުންދާ މިފަދަ ދަނޑިވަޅެއްގައި، ކޮވިޑް-19 އާ ގުޅިގެން ދައުލަތުގެ ބަޖެޓުން ކުރެވޭ ޚަރަދުތަކާއި، އެ ޙާދިސާއާ ގުޅިގެން ލިބޭ ހިލޭ އެހީއާއި ދަރަނިތައް އޮޑިޓްކޮށް އެ ރިޕޯޓުތައް ދައުލަތުގެ ކަމާބެހޭ އިދާރާތަކަށް ފޮނުވައި ހާމަކުރުމަކީ ރައްޔިތުންގެ މުދަލާއި ފައިސާއަށް ޖަވާބުދާރީ ވުމަށްޓަކައި އެހާމެ މުހިންމު ކަމެއްކަމުގައި ޤަބޫލު ކުރައްވާ ކަމަށެވެ.

އެގޮތުން އީވާ ހުށަހަޅުއްވާފައިވާ އިޞްލާޙުގައި ވަނީ:

1. ކޮވިޑް-19 އާ ގުޅިގެން ދައުލަތުގެ އެންމެހައި މުއައްސަސާތަކުން ކޮންމެ ކުއަރޓާއެއްގައި ކުރާ ޚަރަދާއި ހިލޭ އެހީއާއި ދަރަނީގެ މާލީ ރިޕޯޓުތަކުގައި ފައިނޭންޝަލް އޮޑިޓްކޮށް ކޮންމެ ކުއަރޓާއެއް ނިމޭތާ ލަސްވެގެން 30 ދުވަހުގެ ތެރޭގައި، އޮޑިޓަރ ޖެނެރަލް، އޮޑިޓް ރިޕޯޓު ތައްޔާރުކޮށް ނިންމުން.

2. ކޮވިޑް-19 އާ ގުޅިގެން ދައުލަތުގެ މުއައްސަސާތަކުން ކުރާ ޚަރަދާއި ހޯދާ ހިލޭ އެހީގެ ޚާއްޞަ އޮޑިޓްތަކާއި ޕާރފޯމަންސް އޮޑިޓްތައް ޚާއްޞަ އިސްކަމެއްދީގެން ވަގުތުގައި ކުރުން.

3. މި އޮޑިޓްތައް ކުރުމަށްޓަކައި ބޭނުންވާ ލިޔެކިޔުމާއި މަޢުލޫމާތާއި އެހީތެރިކަން އޮޑިޓް ޤާނޫނުގައި ކަނޑައަޅާފައިވާ ގޮތުގެމަތިން ލަސްވުމެއް ނާންނާނެ ގޮތުގެ މަތިން ދައުލަތުގެ އެންމެހައި އިދާރާތަކުންނައި ކަމާގުޅުންހުރި ފަރާތްތަކުން އޮޑިޓަރ ޖެނެރަލްއަށް ފޯރުކޮށް ދިނުން.

ކޮވިޑް-19 ގެ ސަބަބުން ރާއްޖޭގެ އޤުތިޞާދަށް ކުރާ ނޭދެވޭ އަސަރުތަކުން ވިޔަފާރިތަކާއި ޢާންމު ފަރުދުންނަށް ގެއްލުން ފޯރާ ކުޑަކުރުމަށް ސަރުކާރުން ވަނީ އިޤުތިޞާދީ ޕެކޭޖުތަކެއް ތަޢާރަފު ކޮށްފަ އެވެ.

ކޮވިޑް-19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން ޢާއިލާތަކާއި ވިޔަފާރިތަކުގެ ޢާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގުރާމު ތަންފީޒުކުރުމަށް ރައްޔިތުންގެ މަޖިލީހުން ދެކޭގޮތް ބެލުމަށް މަޖިލީހަށް ހުށަހެޅުއްވީ އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި މަޖިލީހުގެ މެޖޯރިޓީ ލީޑަރު ޢަލީ އާޒިމެވެ.

މިމައްސަލަ މަޖިލީހުގެ ކަމާގުޅުން ހުރި ހުރިހާ ކޮމެޓީއަކުން ވަނީ ދިރާސާ ކޮށްފަ އެވެ. އެގޮތުން އެ ކޮމިޓީތަކުން ސަރުކާރަށް ހުށައެޅުމަށް 300 އަށްވުރެ ގިނަ ހުށަހެޅުން ރިޕޯޓުތަކުގައި ހިމަނާފައި ވެއެވެ.

ކޮމެޓީތަކުން އެރިޕޯޓުތައް މަޖިލީހުގެ ޖަލްސާއަށް ހުށަހަޅަމުންދާ ވަރަކަށް މަޖިލީހުން ދަނީ އެރިޕޯޓްތައް ފާސްކުރަމުން ނެވެ.