ދައުލަތުން ދައުވާކުރާ މައްސަލަ ފިޔަވައި އިތުރު މައްސަލައެއް ރިޔާޒްއާ ދެކޮޅަށް ހުށަހެޅިފައެއް ނުވޭ: ޕީޖީ އޮފީސް
އިތުރު ފުރުސަތު ދޭނީ ތުހުމަތު ކުރެވޭ ކުށަށް އިއުތިރާފް ވެގެން ނުވަތަ އެ ކުށާ މެދު ދެރަވާ ކަން ހާމަކޮށްގެން
ޖޭޕީގެ ނައިބް ލީޑަރު އަބްދުﷲ ރިޔާޒް
ޖުމްހޫރީ ޕާޓީގެ ނައިބު ލީޑަރު އަދި ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒްއާ ދެކޮޅަށް ދައުލަތުން މިހާރު ދައުވާ އުފުލާފައިވާ މައްސަލަ ފިޔަވައި އިތުރު އެހެން އެއްވެސް މައްސަލައެއް ރިޔާޒްއާ ދެކޮޅަށް ޕީޖީ އޮފީހަށް ހުށަހެޅިފައި ނުވާ ކަމަށް ޕީޖީ އޮފީހުން ބުނެފިއެވެ.
ރިޔާޒްގެ ފޯންގެ ފުލުހުންގެ ބެލުމުގެ ދަށަށް ގެންގޮސް ކުރި ތަހުގީގަށް ފަހު އެ މައްސަލައިގައި ރިޔާޒްގެ މައްޗަށް ދައުވާ ކުރުމަށް މައްސަލަ ޕީޖީ އޮފީހަށް ފޮނުވާފައިވާ ކަަމށް ރިޔާޒްގެ ގާނޫނީ ވަކީލް އަލީ ޒާހިރު ވިދާޅުވެފައި ވާތީ އެކަމާ ގުޅިގެން ރާއްޖެއެމްވީން ސުވާލު ކުރުމުން ޕީޖީ އޮފީހުގެ މީޑިއާ އޮފިޝަލް ވިދާޅުވީ ރިޔާޒްގެ މައްޗަށް އިތުރު ދައުވާ އެއް ކުރުމަށް ފުލުހުންގެ ފަރާތުން ޕީޖީ އޮފީހަށް ފޮނުވާފައި ނުވާ ކަމަށެވެ.
ރިޔާޒްއާ ގުޅޭ ގޮތުން ފުލުހުން ޕީޖީ އޮފީހަށް ފޮނުވާފައިވާ ހަމައެކަނި މައްސަލައަކީ މިހާރު ދައުލަތުން ދައުވާ އުފުލާ ޝަރީޢަތް ހިނގަމުންދާ މައްސަލަ ކަމަށް ޕީޖީ އޮފީހުގެ މީޑިއާ އޮފިޝަލް ވިދާޅުވިއެވެ.
ރިޔާޒްގެ މައްޗަށް ދައުލަތުން އުފުލާފައިވާ ޤާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރަސް އެޅުމުގެ ކުށުގެ ދައުވާ ދެ ވަނަ ފުރުސަތުގެ ދަށުން އަނބުރާ ގެންދިއުމަށް ރިޔާޒްގެ ފަރާތުން ހުށަހަޅާފައިވާ ކަމަށް ވިދާޅުވެފައި ވާތީ އެކަމަާ ގުޅޭ ގޮތުން ރާއްޖެއެމްވީން ސުވާލު ކުރުމުން ޕީޖީ އޮފީހުގެ މީޑިއާ އޮފިޝަލް ވިދާޅުވީ ދެ ވަނަ ފުރުސަތުގެ ދަށުން މައްސަލަ އަނބުރާ ގެންދިއުމަށް ރިޔާޒްގެ ފަރާތުން ޕީޖީ އޮފީހަށް ފޯމް ހުށަހަޅާފައިވާ ކަމަށާއި ނަމަވެސް އެކަމަާ ގުޅޭ ގޮތުން އަދި ޕީޖީ އޮފީހުން ވަކި ގޮތެއް ނިންމާފައި ނުވާ ކަމަށެވެ.
އަންގާރަ ދުވަހު ބޭއްވި އެ މައްސަލައިގެ އެންމެ ފަހު ޝަރީޢަތުގެ މަޖިލީހުގައި ޚުލާސާ ބަޔާން އިއްވުމަށް ފަހު ރިޔާޒްގެ ވަކީލް އަލީ ޒާހިރު ވިދާޅުވީ ޕީޖީ އޮފީހުގައި އޮންނަ އިތުރު ފުރުސަތު ޕްރޮގްރާމްގެ ދަށުން އެ ދައުވާ އަނބުރާ ގެންދިއުމަށް ޕީޖީ އޮފީހުގައި އެދިފައި ވާނެ ކަމަށާއި އަދި އެ ފުރުސަތަށް އެދުނީ މި މަހުގެ 16 ވަނަ ދުވަހު ކަމަށެވެ. އަދި ޕީޖީ އޮފީހުގައި އިތުރު ފުރުސަތަށް ރިޔާޒް އެދިފައިވާ ކަމުގެ ފޯމް ރިޔާޒްގެ ފަރާތުން ވަނީ ޝަރީޢަތަށް ހުށަހަޅާފައެވެ.
އެހެން ކަމުން ޕީޖީ އޮފީހުން ރިޔާޒަށް އިތުރު ފުރުސަތު ދިނުމާ މެދު ގޮތެއް ނިންމަންދެން ޙުކުމް ކުރުން މަޑުޖައްސާލަން ރިޔާޒްގެ ވަކީލުން އެދިވަޑައިގަތެވެ.
ޕީޖީ އޮފީހުގައި ރިޔާޒް އިތުރު ފުރުސަތަށް އެދި ފޯމް ހުށަހަޅާފައި ވާތީ އެކަމާ ގުޅޭ ގޮތުން ދައުލަތުގެ ވަކީލް ވިދާޅުވީ އެ ފޯމް ރިޔާޒް ހުށަހެޅުއްވި ކަމުގެ މަޢުލޫމާތު ޕީޖީ އޮފީހުގެ ފަރާތުން އޭނާއަށް ލިބިވަޑައިގެންފައި ނުވާ ކަމަށެވެ. އެގޮތުން މައްސަލަ އާއި ހަވާލުވެ ހުންނަވާ ވަކީލާ ހަމައަށް އެ ފޯމް އައުމުގެ ކުރިން އިދާރީ ގޮތުން ފުރިހަމަ ކުރަންޖެހޭ ކަންތައްތަކެއް ހުންނާތީ އެ ފޯމް އޭނާއާ ހަމައަށް އަދި ނާންނަނީކަމަށް ވެދާނެ ކަމަށް ވަކީލް ވިދާޅުވިއެވެ.
ދައުލަތުން އެހެން ބުނުމުން ފަނޑިޔާރުން އެންގެވީ ރިޔާޒް އިތުރު ފުރުސަތަށް އެދިވަޑައިގަތް ކަން ކަށަވަރު ކުރުމަށް ފަހު އެކަން ދެ ދުވަސް ތެރޭގައި ކޯޓަށް އެންގުމަށެވެ.
ރިޔާޒް ޕީޖީ އޮފީހުގައި އިތުރު ފުރުސަތަށް އެދިފައި ވާތީ އެކަމާ ގުޅޭ ގޮތުން ފަނޑިޔާރުންގެ ބެންޗުން ކުރި ސުވާލުތަކަށް ޖަވާބު ދެއްވަމުން ދައުލަތުގެ ވަކީލް ވިދާޅުވީ ޙުކުމާ ހިސާބުގައި އޮންނަ މައްސަލަތަކުގައި އިތުރު ފުރުސަތަށް އެދިއްޖެ ނަމަ އިތުރު ފުރުސަތު ދިނުމާ މެދު ޕީޖީ އޮފީހުން ގޮތެއް ނިމެންދެން ޙުކުމް ކުރުން މަޑުޖައްސާލަން ދައުލަތުން ކޯޓުގައި އެދޭނެ ކަމަށާއި ނަމަވެސް ޙުކުމް ކުރުން މަޑުޖައްސާލަން ކޯޓުން ދެކޮޅު ހަދައިފި ނަމަ އެ މައްސަލައެއް ވަގުތީ ގޮތުން އަނބުރާ ގެންދާނެ ކަމަށް ދައުލަތުގެ ވަކީލް ވިދާޅުވިއެވެ.
މީގެއިތުރުން ދައުލަތުގެ ވަކީލް ވިދާޅުވީ އިތުރު ފުރުސަތު ދޭނީ ވަކި ޝަރުތުތަކެއް ހަމަވާ ނަމަ ކަމަށާއި އަދި ޝަރުތު ހަމަވިޔަސް އެ ފުރުސަތު ދޭނީ ތުޙުމަތު ކުރެވޭ ކުށަށް އިއުތިރާފް ވެގެން ނުވަތަ އެ ކުށާ މެދު ދެރަވާ ކަން ހާމަކޮށްގެން ކަމަށެވެ.
