ސިއްހީ ހިދުމަތްތެރިންނަށް ސީއެސްސީން ކަންތައްކުރީ ބޭއިންސާފުން: ވިސާމް
20 މެއި 2020 | ބުދަ 10:04މަޖިލީހުން ކޮމިޝަންގެ މައްސަލަ ބަލާފައިވޭ
ގަމު ދާއިރާގެ މެމްބަރު މުހައްމަދު ވިސާމް
ކޮވިޑް-19 ޕެންޑެމިކްގެ މި ދަނޑިވަޅުގައި ފްރޮންޓްލައިންގައި މަސައްކަތް ކުރާ ސިއްހީ ދާއިރާގެ މަސައްކަތްތެރިންނަށް ސިވިލް ސަރވިސް ކޮމިޝަން (ސީއެސްސީ)ން ކަންތައްކުރީ ބޭއިންސާފުން ކަމަށް ވިދާޅުވެ، އެ ކޮމިޝަނުގެ މެންބަރުން ވަކި ކުރުމަށް ގަމު ދާއިރާގެ މެންބަރު މުހައްމަދު ވިސާމް ގޮވާލައްވައިފި އެވެ.
ބުދަ ދުވަހުގެ ޖަލްސާގައި ރައްޔިތުންގެ މަޖިލީހުން ކަނޑައަޅަން ޖެހޭ މުސާރަތައް ކޮވިޑް-19އާ ގުޅިގެން ކުޑަކުރުމަށް 18 މާރޗު 2020 ގައި ނިންމަވާފައިވާ ނިންމުން އަލުން މުރާޖަޢާ ކުރުމުގެ މައްސަލަ، މާލިއްޔަތު ކޮމިޓީން ދިރާސާކޮށް ނިންމިގޮތުގެ ރިޕޯޓަށް ބަހުޘް ކުރައްވަމުން ވިސާމް ވިދާޅުވީ ސީއެސްސީން މުސާރައާއި ގުޅިގެން ނެރުނު ސަރުކިއުލަރގައި ސިއްހީ ޚިދުމަތްތެރިންނާއި ސީއެސްސީގެ އެހެނިހެން މުވައްޒަފުންނަށް އަމަލުކުރުމަށް ކަނޑައަޅާފައި ވަނީ އެއް ހަމަޔަކުން ކަމަށެވެ.
ވިސާމް ވިދާޅުވީ މިއީ ބަލައިގަނެވޭނެ ކަމެއް ނޫން ކަމަށެވެ. ކުރީ ސަފުގައި މަސައްކަތް ކުރާ ސިވިލް ސަރވިސްގެ މުވައްޒަފުންނާއި ގޭގައި ތިބެގެން މަސައްކަތް ކުރާ އެ ކޮމިޝަނުގެ މުވައްޒަފުންނާއި މުސާރައިގެ ގޮތުން އަދި އެހެނިހެން ގޮތް ގޮތުންވެސް ތަފާތުވާން ޖެހޭނެ ކަމަށް ގަބޫލު ކުރައްވާކަމަށް ވިސާމް ވިދާޅުވި އެވެ.
ސިވިލް ސަރވިސް ކޮމިޝަނަށް ވަރަށް ބޮޑަށް ފާޑު ވިދާޅުވެ ވިސާމް ވަނީ ސިއްޙީ ޚިދުމަތްތެރިންގެ ތެރެއިން 19 ގިންތިއެއްގައި މަސައްކަތް ކުރަމުންދާ މުވައްޒަފުންގެ މުސާރައިގެ އޮނިގަނޑު އަދިވެސް އެކުލަވާ ނުލާކަން ފާހަގަ ކުރައްވާފަ އެވެ.
ވިސާމް ވިދާޅުވީ މިފަދަ ކަންކަން ނުވެ ހުރުމަކީ ސީއެސްސީ ފެއިލް ވެފައި އޮތްކަމުގެ ހެއްކެއް ކަމަށެވެ. ސީއެސްސީގެ މުވައްޒަފުންނަށް ކުރަމުންދާ އަސަރުތަކަށް އެ ކޮމިޝަނުން ޒިންމާ ނަގަންޖެހޭ ކަން ފާހަގަކުރައްވާ ވިސާމް ވިދާޅުވީ ސީއެސްސީގެ މަސައްކަތްތައް ހުރީ މި ސަރުކާރުގެ މަސައްކަތްތަކާއި އެއް މިސްރާބަކަށް ނޫން ކަމަށެވެ. އަދި އެ ކޮމިޝަނުގެ މެންބަރުން މަގާމުން ވަކި ކުރަން ޖެހޭކަމަށް ވިދާޅުވި އެވެ.
މަގާމުގެ ޒިންމާ އަދާ ނުކުރެވޭކަމަށް ގަބޫލު ކުރެވޭތީ ސިވިލް ސަރވިސް ކޮމިޝަންގެ 4 މެންބަރަކު ވަކި ކުރުމަށް، މެންބަރު ވިސާމް ހިމެނިވަޑައިގަންނަވާ މިނިވަން މުއައްސަސާތަކުގެ ކޮމެޓީން މާރޗު މަހުގެ 1 ވަނަ ދުވަހު ފާސްކުރި އެވެ. ކޮމިޓީން މަޤާމުން ވަކިކުރުމަށް ނިންމާފައި ވަނީ ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމާއި، ކޮމިޝަންގެ ނައިބު ރައީސް ޝަހީދު މުހައްމަދާއި، މެންބަރު އިބްރާހިމް ޝަހީގުގެ އިތުރުން އަލްއުސްތާޛު ޒަކަރިއްޔާ ޙުސައިނެވެ.
އެހެންނަމަވެސް، ކޮމިޝަންގެ 4 މެންބަރުން ވަކިކުރުމުގެ މައްސަލަ ކޮމިޓީން ނިންމިގޮތުގެ ރިޕޯޓު ކޮމިޓީއަށް އަނބުރާ ފޮނުވާލާފައި ވާތީ ކޮމިޓީގެ މެންބަރުންގެ މެދުގައި މަޝްވަރާ ކުރެއްވުމަށް ފަހު ކޮމެޓީން ނިންމީ 4 މެންބަރުން ވަކިކުރުމުގެ މައްސަލައިގެ ރިޕޯޓު ނިންމާއިރު، އެ ކޮމިޝަންގެ މެންބަރު ފާޠިމަތު އާމިރާގެ މައްސަލަވެސް ބެލުމަށް ފަހު 5 މެންބަރުން ވެސް ހިމެނޭގޮތަށް ރިޕޯޓު ތައްޔާރުކޮށް ހުށަހެޅުމަށެވެ. އެ މަސައްކަތް މިހާރު ވަނީ މަޑުޖައްސާލާފަ އެވެ.
