ރަށްރަށުން މާލެ އަންނަން 3016 މީހަކަށް ހުއްދަ ދީފި
20 މެއި 2020 | ބުދަ 07:39އެންމެ ގިނައިން ހުއްދަ ދޫކޮށްފައިވަނީ މޭމަހު ހަތް ވަނަ ދުވަހު
މާލެ ސިޓީ ފުރަބަންދު ކުރުމުގެ ކުރިން ގިނަ އަދަދެއްގެ ބަޔަކު ދުވާލެއްގެ މައްޗަށް މާލެ އިން ލަފާފުރާ
ރަށްރަށުގައި ތިބި މާލޭ ރަށްވެހިންގެ ތެެރެއިން 3016 މީހަކު މާލެ އައުމުގެ ހުއްދަ ފުލުހުން ދީފި އެވެ.
މިކަމާ ގުޅޭގޮތުން ފުލުހުންގެ އިދާރާއިން އާންމުކުރި ބަޔާނެއްގައި ވަނީ، އޭޕްރީލް މަހުގެ 24 ވަނަ ދުވަހުން ފެށިގެން މެއި މަހުގެ 19 ވަނަ ދުވަހާ ހަމަޔަށް މާލެ އައުމަށް 3016 ފަރާތަކަށް ހުއްދަ ދޫކޮށްފައިވާ ކަމަށެވެ. ފުލުހުންގެ ތަފާސް ހިސާބުތައް ދައްކާ ގޮތުން އެންމެ ގިނައިން ހުއްދައަށް އެދި ހުށައަޅާފައި ވަނީ މި މަހުގެ ހަތް ވަނަ ދުވަހު އެވެ. އެއީ 277 މީހުންނެވެ.
ފުލުހުންގެ ތަފާސް ހިސާބުތަކުން ދައްކާގޮތުން މާލެ އަންނަން ބޭނުންވެގެން %61 މީހަކު ހުށައަޅާފައި ވަނީ މެއިލްގެ ޒަރީއާއިން ނެވެ. އަދި %39 ހުށައަޅާފައި ވަނީ ޕޯޓަލް މެދުވެރިކޮށެެވެ. ޕޯޓަލް މެދުވެރިކޮށް ހުށައެޅި 1191 މީހަކަށް ހުއްދަ ދޫކޮށްފައިވެ އެވެ.
މާލެ ލޮކްޑައުން ކުރުމާއި ގުޅިގެން ރަށްރަށަށް ނުދެވި މާލޭގައި ތާށިވެފައި ގިނަ ޢަދަދެއްގެ ބަޔަކު އެބަތިއްބެއެވެ. އެ މީހުން ރަށްރަށަށް ގެންދިޔުމުގެ މަސައްކަތް ސަރުކާރުން ދަނީ ކުރަމުންނެވެ. އަދި ޖެންޑަރ މިނިސްޓްރީން ވަނި ރަށްރަށަށް މީހުން ގެންދިޔުމުގައި ޢަމަލުކުރާނެ އުޞޫލެއް ވެސް އެކުލަވާލާފަ އެވެ.
އެހެން ނަމަވެސް ރަށްރަށުގައި ވައިރަސް ފެތުރިދާނެ ކަމުގެ ބިރު އޮތުމާއެކު، މީހުން ގެންދިޔުން ވަނީ މަޑުޖައްސާލާފަ އެވެ. އަތޮޅު ތެރެއިން މާލޭގައި ތާށިވި މީހުންނަށް އަނބުރާ ރަށަށް ދެވޭނީ ސަރުކާރުން އަންގާ ތަނެއްގައި 14 ދުވަހުގެ ކަރަންޓީނުގެ މުއްދަތު ފުުރިހަމަ ކުރުމަށް ފަހުގަ އެވެ.
