މޯލްޑިވްސް ސޭފް ޓޫރިޒަމް ގައިޑްލައިން، ދިރާސާ ކުރުމަށް ކޮމެޓީއަށް
މޯލްޑިްވސް ސޭފް ޓޫރިޒަމް ގައިޑްލައިންގެ ފުރަތަމަ ދެލިކޮޕީ ދިރާސާ ކުރުމަށް ފޮނުއްވީ އިގްތިޞާދީ ކޮމެޓީއަށް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަދި ޓޫރިޒަމް މިނިސްޓަރ އަލީ ވަހީދު، ކޮރަލް ފެސްޓިލް އިވެންޓްގެ ތެރެއިން: މޯލްޑިވްސް ސޭފް ޓޫރިޒަމް ގައިޑްލައިން އެކުލަވާލާފައިވަނީ ކަމާބެހޭ ގިނަ ފަރާތ
ފަތުރުވެރިކަން އަލުން ހުޅުވާލާއިރު އަމަލުކުރަން ހަދާފައިވާ "މޯލްޑިވްސް ސޭފް ޓޫރިޒަމް ގައިޑްލައިން (އެމްއެސްޓީޖީ)"ގެ ފުރަތަމަ ދެލިކޮޕީ، ރައްޔިތުންގެ މަޖިލީހުގެ އިގްތިޞާދީ ކޮމެޓީއަށް ދިރާސާ ކުރުމަށް ފޮނުވައިފި އެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ޓޫރިޒަމް މިނިސްޓަރ އަލީ ވަހީދު މަޖިލީހުގެ ރައީސް، ރައީސް މުހައްމަދު ނަޝީދުއަށް ފޮނުއްވާފައިވާ ސިޓީ އިއްވުމަށް ފަހު، މިނިސްޓަރ އަލީ ވަހީދުގެ އެ ސިޓީއާއެކު އެމްއެސްޓީޖީގެ ފުރަތަމަ ދެލިކޮޕީ ދިރާސާ ކުރުމަށް އިގްތިޞާދީ ކޮމެޓީއަށް ފޮނުވާކަމަށް މަޖިލީހުގެ ރައީސް ވިދާޅުވި އެވެ.
ޓޫރިޒަމް މިނިސްޓަރ އަލީ ވަހީދުގެ ސިޓީފުޅުގައި ވިދާޅުވެފައި ވަނީ، ކޮވިޑް-19 ގެ ސަބަބުން ރާއްޖޭގެ ބޯޑަރ ބަންދުކުރުމާއި ގުޅިގެން ރާއްޖޭގެ ފަތުރުވެރިކަން ހުއްޓުމަކަށް އައިސްފައިވާ ކަމަށެވެ. އަދި ފަތުރުވެރިކަން އަލުން ފެށުމަކީ ރާއްޖޭގެ އިގްތިޞާދަށް ކޮންމެހެންވެސް މުހިއްމު ކަމެއްކަމަށް ޓޫރިޒަމް މިނިސްޓްރީންނާއި ފަތުރުވެރިކަމުގެ ސިނާއަތުގެ އެންމެހާ ފަރާތްތައް އިއްތިފާޤުވާ ކަމަށެވެ.
އެހެންކަމުން ރާއްޖޭގެ ފަތުރުވެރިކަން އަލުން ފެށުމަށްޓަކައި "މޯލްޑިވްސް ސޭފް ޓޫރިޒަމް ގައިޑްލައިން (އެމްއެސްޓީޖީ)"ގެ ފުރަތަމަ ދެލިކޮޕީ އެކުލަވާލާފައިވާ ކަމަށެވެ. މިގައިޑްލައިން އެކުލަވާލުމުގައި ދުނިޔޭގެ އެހެނިހެން ގައުމުތަކުގައި މިކަމުގައި ގެންގުޅޭ މިންގަނޑުތަކަށާއި ޑަބްލިޔުއެޗްއޯގެ ގައިޑްލައިންތަކާއި ޔޫއެން-ޑަބްލިޔުޓީއޯގެ ލަފަޔާއި އިރުޝާދު، އަދި މިނޫނަސް އާންމު ސަލާމަތާއި ރައްކާތެރިކަން ކަށަވަރު ކުރުމަށް ބޭނުންވާ މިންގަނޑުތަކަށް ބަލާފައިވާނެ ކަމަށްވެސް ޓޫރިޒަމް މިނިސްޓަރ އަލީ ވަހީދު މަޖިލީހުގެ ރައީސްއަށް ފޮނުއްވި ސިޓީގައި ވިދާޅުވެފައި ވެއެވެ.
އެމްއެސްޓީޖީ ފުރަތަމަ ދެލިކޮޕީއަށް ރައްޔިތުންގެ މަޖިލީހުން ހުށަހަޅަން ބޭނުންވާ ކަންކަން، މިމަހުގެ 25 ވަނަ ދުވަހުގެ ކުރިން ޓޫރިޒަމް މިނިސްޓްރީއާ ހިއްސާ ކޮށްދެއްވުމަށް މިނިސްޓަރ އަލީ ވަހީދު، އެދިވަޑައިގަންނަވާފައިވާތީ، މަޖިލީހުގެ ރައީސް، ރައީސް ނަޝީދު ވެސް ވަނީ، މިއަދުން މިއަދަށް އެމްއެސްޓީޖީގެ ފުރަތަމަ ދެލިކޮޕީ ދިރާސާ ކުރުމުގެ މަސައްކަތް އިގްތިޞާދީ ކޮމެޓީން ފައްޓަވާ ދެއްވުމަށާއި، އަދި ކަމާބެހޭ ފަރާތްތަކުގެ މަޝްވަރާ މިކަމުގައި ހޯއްދެވުމަށް އެދިވަޑައިގަންނަވާފަ އެވެ. އަދި މިނިސްޓަރ އެދިވަޑައިގެންނެވި ތާރީޚުގެ ކުރިން މިމަސައްކަތް ނިންމަވާ ދެއްވުމަށް ވެސް މަޖިލީހުގެ ރައީސް އިގްތިޞާދީ ކޮމެޓީންގެ ކިބައިން އެދިވަޑައިގެންނެވި އެވެ.
މި ގައިޑްލައިންގައިވާ ގޮތުން ކޮންމެ ފަތުރުވެރިއެއްގެ އަތުން 100 ޑޮލަރުގެ ވިސާ ފީއެއް ނަގަން ވަނީ ހިމަނާފަ އެވެ. މީގެ އިތުރުން ވިސާ ދޭނީ މަދުވެގެން ރާއްޖޭގައި 14 ދުވަސް ހޭދަ ކުރާ ފަތުރުވެރިންނަށް ކަމަށާއި، އެމީހަކު ހުންނަން ޖެހޭނީ އެންމެ ތަނެއްގައި ކަން ވާންޖެހޭނެ ކަމަށް ބުނެފައި ވެއެވެ.
މި ގައިޑްލައިންގައި ޗާޓަރު ފުލައިޓްތަކާއި ޕްރައިވެޓް ޖެޓް އަދި ފަތުރުވެރިކަމުގެ ޚިިދުމަތްދޭ ބޭރުގެ ކަނޑު އުޅަނދު ފަހަރަށް ވެސް ވަކި ކަންތައްތަކެއް ވަނީ ހިމަނާފަ އެވެ. އެގޮތުން ޗާޓަރު ފުލައިޓް އަދި ޕްރައިވެޓް ޖެޓްތަކުން ލޭންޑިންގ ފީއެއްގެ ގޮތުގައި 50،000 ޑޮލަރު ނަގަން ހިމަނާފައި ވެއެވެ.
އޭގެ އިތުރުން، ރާއްޖޭގެ ކަނޑުގެ ސަރަހައްދަށް ވަންނަ ފަތުރުވެރިކަމުގެ ހިދުމަތްދޭ ކަނޑު އުޅަނދުތަކުން 10،000 ޑޮލަރުގެ ފީއެއް ނެގުމާއި، ސަރުކާރުން ވަކި އެއްޗެއް އަންގަންދެން ކުރޫސް ލައިނާތައް އައުން މަނާވާނެ ކަމަށް ބުނެފައި ވެއެވެ. މީގެ އިތުރުން ފަތުވެރިން އުޅަނދަށް އެރުވުމައި ބޭލުމުގެ ކަންކަން ހަމަޖެހިފައި އޮންނަން ޖެހޭނީ ސޭފް ޓުއަރިޒަމް އަށް ހާއްސަވާ އެއަރޕޯޓެއްގައި ކަމަށް ވަނީ ބުނެފަ އެވެ.
