ޓެލެ ކޮންފަރެންސިންގެ ޒަރީއާއިން ޝަރީއަތް ކުރިޔަށް ގެންދާނެ ގޮތް ޢާންމުކޮށްފި
19 މެއި 2020 | އަންގާރަ 11:40މިގަވާއިދަށް މިއަދުން ފެށިގެން އަމަލު ކުރެވޭނެ
އުއްތަމަ ފަނޑިޔާރު އަހުމަދު މުއުތަސިމް އަދުނާނު: ސުޕްރީމް ކޯޓަށާއި ޝަރުއީ ދާއިރާއަށް ހެޔޮ ބަދަލުތަކެއް އަންނަމުންދާކަން ވަނީ ފާހަގަކުރެވިފައި
ޞިއްޙީ ޚާއްޞަ ޙާލަތްތަކުގައި ސުޕްރީމް ކޯޓުގެ ޝަރީޢަތްތައް މުއާޞަލާތީ ވަޞީލަތްތައް ބޭނުންކޮށްގެން ދުރުން ކުރިއަށް ގެންދިއުމުގައި ޢަމަލުކުރާނެ ގޮތުގެ ޤަވާއިދެއް އަންގާރަ ދުވަހު ޢާންމުކޮށްފި އެވެ.
ސުޕްރީމް ކޯޓަށް ހުށަހަޅަން ބޭނުންވާ މައްސަލަތަކާއި މައްސަލަތަކާ ގުޅޭ ލިޔެކިޔުންތައް ކޯޓަށް ހުށަހަޅާނެ ގޮތާއި، މައްސަލަ ރަޖިސްޓްރީ ކުރުމުގައި ޢަމަލު ކުރެވޭނެގޮތާއި، މައްސަލައާ ގުޅޭ އިބްތިދާޢީ ބައްދަލުވުންތައް ބާއްވައި މައްސަލައިގެ ލިޔެކިޔުންތައް ޚަޞްމުންގެ މެދުގައި ބަދަލުކޮށް، ލިޔެކިޔުމާއި ބަޔާންތަކުގައި ސޮއިކުރުމުގެ ކަންކަން އިލެކްޓްރޯނިކް ވަޞީލަތްތައް މެދުވެރިކޮށް ކުރިއަށް ގެންދާނެ ގޮތް މި ޤަވާއިދުގައި ބަޔާންކޮށްފައި ވެއެވެ.
މީގެއިތުރުން، ޝަރީޢަތާ ގުޅިގެން ފޮނުވަންޖެހޭ ކޯޓު ޢަމުރު ފޮނުވޭނެ ގޮތާއި، ޝަރީޢަތުގެ މަޖިލީސްތައް އޮންލައިންކޮށް ކުރިއަށް ގެންދާނެ ގޮތާއި، މައްސަލަ ނިމުނު ގޮތުގެ ރިޕޯޓު ދޫކުރުމުގައި ޢަމަލު ކުރެވޭނެ ގޮތުގެ އިތުރުން، ޝަރީޢަތާ ގުޅުން ހުރި އެނޫންވެސް މުޢާމަލާތްތައް މުއާޞަލާތީ ވަޞީލަތްތައް ބޭނުންކޮށްގެން ކުރިއަށް ގެންދާނެގޮތް މި ޤަވާއިދުގައި ހިމެނެއެވެ.
ސުޕްރީމް ކޯޓުން ބުނީ މި ޤަވާއިދަށް ި މި ހިނގާ މެއި މަހުގެ 19 ވަނަ ދުވަހުން ފެށިގެން ޢަމަލުކުރަން ފެށުމާއެކު، ސުޕްރީމް ކޯޓަށް ހުށަހެޅޭ މައްސަލަތަކުގެ ޝަރީޢަތްތައް މެދުކެނޑުމެއް ނެތި ކުރިއަށް ގެންދިއުމުގެ އިންތިޒާމު ހަމަޖެހިގެން ދާނެތީ، ޞިއްޙީ ކުއްލި ނުރައްކަލުގެ ޙާލަތާ ގުޅިގެން ސަރުކާރުގެ އޮފީސްތައް ނުހުޅުވާ ދުވަސްތައް ސުޕްރީމް ކޯޓުގައި މައްސަލަ އިސްތިޢުނާފު ކުރުމުގައި ނުގުނާގޮތަށް އޮތްއޮތުން ނިމުމަކަށް އަންނާނެ ކަމަށެވެ.
މިގޮތުން، 2020 ޖޫން 01 ވަނަ ދުވަހުން ފެށިގެން، ޢާންމުކޮށް ކަނޑައެޅިފައިވާ އުޞޫލާ އެއްގޮތަށް ސުޕްރީމް ކޯޓުގައި މައްސަލަތައް އިސްތިޢުނާފު ކުރުމުގެ މުއްދަތު ގުނަން ފެށޭނެ ކަމަށްވެސް ސުޕްރީމް ކޯޓުން ބުނެއެވެ.
ސުޕްރީމް ކޯޓުން ބުނީ، މި ޤަވާއިދަށް ޢަމަލުކުރަން ފެށުމާއެކު، އެ ކޯޓަށް ހުށަހަޅާ މައްސަލަތައް ފޮނުވާނީ registry@supremecourt.gov.mv އީ-މެއިލް އަށް އަށެވެ. ހުށަހެޅޭ މައްސަލަތަކާ ގުޅިގެން ކުރަންޖެހޭ މުޢާމަލާތްތައް ކުރަމުން ގެންދާނީ އީ-މެއިލް، ފޯނު އަދި އެނޫންވެސް އިލެކްޓްރޯނިކް ވަޞީލަތްތައް މެދުވެރިކޮށްގެން ކަމަށެވެ.
ކޮންމެހެން ކޯޓަށް ހާޒިރުވެގެން ނޫނީ ކުރިއަށް ގެންދެވެން ނެތް ޝަރީޢަތްތައް ފިޔަވައި އެނޫން ޝަރީޢަތްތައް ކުރިއަށް ގެންދިއުމަށް ހަމަޖެހިފައި ވަނީ ޓެލެ-ކޮންފަރެންސިންގ ވަޞީލަތެއް ކަމުގައިވާ Microsoft Teams މެދުވެރިކޮށް ކަމަށްވެސް ސުޕްރީމް ކޯޓުން ބުނެއެވެ.
ސުޕްރީމް ކޯޓުން ބުނީ، އެ ކޯޓަށް ހުށަހެޅިފައިވާ އެއްވެސް މައްސަލައަކާ ގުޅިގެން ހުށަހަޅަން ބޭނުންވާ ޝަކުވާއެއް އޮތްކަމުގައި ވާނަމަ، އީ-މެއިލް މެދުވެރިކޮށް އެ ޝަކުވާއެއް ކޯޓަށް ހުށަހެޅޭނެ ކަމަށެވެ. އަދި މި ޤަވާއިދަށް ޢަމަލުކުރަން ފެށުމާއެކު، ކޯޓުން އެކި ފަރާތްތަކަށް ފޮނުވަން ޖެހޭ ލިޔެކިޔުންތަކާއި، ޤަޟިއްޔާ ނިމުނުގޮތުގެ ރިޕޯޓު ފަދަ ލިޔެކިޔުންތައް ފޮނުވަމުން ގެންދާނީ އީ-މެއިލް ނުވަތަ އެނޫންވެސް މުއާޞަލާތީ ވަޞީލަތްތައް މެދުވެރިކޮށްގެން ކަމަށެވެ. އަދި މައްސަލަ ހުށަހެޅުމާ ބެހޭގޮތުން ނުވަތަ ކަމެއް ސާފުކުރަން ބޭނުންވާ ފަރާތްތަކުން ސުޕްރީމް ކޯޓުގެ ފޯނު ނަންބަރު 3007318 އަށް ގުޅާލުމުން އެކަން ހަމަޖައްސައިދޭނެ ކަމަށްވެސް ސުޕްރީމް ކޯޓުން ބުނެއެވެ.
