އާއިލާތަކަށް އެހީވުމަށް ޔުނިސެފުން، ރެޑްވޭވް މެދުވެރިކޮށް، ޖެންޑަރ މިނިސްޓްރީ އަށް އެހީވެއްޖެ

ކޮވިޑް-19 އާއި ގުޅިގެން ހާލުގައިޖެހޭ އާއިލާތަކަށް އެހީތެރިވުމަށް ޖެންޑަރ މިނިސްޓްރީން ކުރަމުންދާ މަސައްކަތްތަކަށް ރެޑްވޭވް މެދުވެރިކޮށް ޔުނިސެފުން އެހީތެރިކަން ފޯރުކޮށްދީފި އެވެ.

ޔުނިސެފުން ރެޑްވޭވަށް ފޮނުވާފައިވާ ސިޓީގައި ބުނެފައިވަނީ ކާބޯތަކެތީގެ 7000 ޕެކޭޖް ފޯރުކޮށްދެވޭ ވަރަށް 838،657 (އަށް ލައްކަ ތިރީސްއަށް ހާސް ހަސަތޭކަ ފަންސާސް ހަތް) ރުފިޔާ ރެޑްވޭވެއް ދިނުމަށް ނިންމާފައިވާ ކަމަށެވެ. މިފައިސާ ސީދާ ޖަމާކުރެވޭނީ ރެޑްވޭވްގެ އެކައުންޓަށް ކަމަށާއި ނަމަވެސް ފައިސާ ޖަމާކުރެވޭނީ އިންވޮއިސް އާއި ކާބޯތަކެތީގެ ޕެކޭޖްތައް ބޭނުންވާ ފަރާތްތަކަށް ފޯރުކޮށްދިންކަމުގެ ޔަގީންކަން ޖެންޑަރ މިނިސްޓްރީން ދިނުމުން ކަަމަށެވެ.

އަދި މިފަދަ ދަނޑިވަޅެއްގައި ރެޑްވޭވުން ފޯރުކޮށްދެމުންދާ އެހީތެރިކަން ބަލައިގަންނަ ކަމަށްވެސް ޔުނިސެފުން ބުނެފައި ވެއެވެ.

ޔުނިސެފްގެ އެހީތެރިކަމާއިއެކު، ޖެންޑަރ މިނިސްޓްރީން އަންނަނީ ކޮވިޑް-19 އާ ގުޅިގެން ހާލުގައި ޖެހޭ ފަރާތްތަކަށް އެހީތެރިކަން ފޯރުކޮށް ދެމުންނެވެ. އެގޮތުން ބޯހިޔާވަހިކަން ނުލިބި މަގުމަތިވާ އާއިލާތަކަށް ބޯހިޔާވަހިކަން ފޯރުކޮށްދިނުމުގެ އިތުރުން ކާބޯތަކެތީގެ އެހީތެރިކަންވެސް ޖެންޑަރ މިނިސްޓްރީން އަންނަނީ ދެމުންނެވެ.