އިންޓަ މިލާނުގެ ހުރިހާ ކުޅުންތެރިން ކޮރޯނާވައިރަހަށް ނެގެޓިވް

ކޮރޯނާވައިރަސް (ކޮވިޑް-19) އަށް އިންޓަ މިލާނުގެ ހުރިހާ ކުޅުންތެރިން ނެގެޓިވްވެފައިވާ ކަމަށް އެ ކްލަބުން ބުނެފި އެވެ.

ޖޫން މަހުގެ 13 ވަނަ ދުވަހު އިޓާލިއަން ލީގު އަލުން ފަށަން ކްލަބުތަކުން މީގެ ކުރިން ރުހުން ދީފައިވާއިރު، އިޓަލީގެ ސަރުކާރުން ވަނީ ހޯމަ ދުވަހުން ފެށިގެން ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ދީފައެވެ. އޭގެ ކުރިން މިމަހުގެ ހަތަރުވަނަ ދުވަހުން ފެށިގެން ކުޅުންތެރިންނަށް އެކަނި ތަމްރީނުތައް ހެދުމުގެ ހުއްދަ އިޓަލީގެ ސަރުކާރުން ވަނީ ދީފައެވެ.

ލީގު އަލުން ފަށަން ތައްޔާރުވަމުންދާތީ، އިންޓަގެ ހުރިހާ ކުޅުންތެރިންނާއި އޮފިޝަލުން ވަނީ ކޮވިޑް-19 އަށް ޓެސްޓު ކޮށްފައެވެ. އިންޓަ އިން ނެރުނު ބަޔާނެއްގައި ބުނެފައިވަނީ ހުކުރު ދުވަހުގެ ވަގުތެއްގައި އެ ކްލަބުގެ ހުރިހާ ކުޅުންތެރިންނާއި އޮފިޝަލުންގެ އިތުރަށް މެނޭޖްމަންޓުގެ މުވައްޒަފުންވެސް ވައިރަހަށް ޓެސްޓު ކޮށްފައިވާ ކަމަށާއި، ހުރިހާ ޓެސްޓެއްގެ ނަތީޖާ ނެގެޓިވް ވެފައިވާ ކަމަށެވެ. އެއާއެކު ކުޅުންތެރިން އެކުގައި ހޯމަ ދުވަހު ތަމްރީނުތަކަށް ނުކުމެފައިވާ ކަމަށް ވެސް ވަނީ ބުނެފައެވެ.

އިންޓަ މިލާނުން އެ ކްލަބުގެ ހުރިހާ ކުޅުންތެރިން ކޮވިޑް-19 އަށް ނެގެޓިވް ވެފައިވާކަން ހާމަކުރިއިރު، މީގެ ކުރިން އޭސީ މިލާނުންވެސް ވަނީ އެ ކްލަބުގެ ހުރިހާ ކުޅުންތެރިން ވައިރަހަށް ނެގެޓިވްވިކަން ހާމަކޮށްފައެވެ. އެކަމަކު ދާދި ފަހުން ޕާމާގެ ދެ ކުޅުންތެރިއަކާއި، ސަމްޕްޑޯރިއާގެ ހަތަރު ކުޅުންތެރިއަކާއި، ޓޮރީނޯގެ ކުޅުންތެރިއެއްގެ އިތުރުން ފިއޮރެންޓީނާގެ ތިން ކުޅުންތެރިއަކު ވަނީ ކޮވިޑް-19 އަށް ޕޮޒިޓިވް ވެފައެވެ.

ޖޫން މަހުގެ 13 ވަނަ ދުވަހު އިޓާލިއަން ލީގު ފަށަން ގިނަ ކްލަބުތަކުން ރުހުން ދީފައިވީ ނަމަވެސް، ލީގު އަލުން ފަށާނެ ތާރިޚެއް ފައިނަލް ކުރާނީ އިޓަލީގެ ސަރުކާރުން ރުހުން ދިނުމުންނެވެ.