ފްރޮންޓްލައިންގެ ޚިދުމަތްތެރިން ޕޮޒިޓިވްވި ނަމަވެސް މަސައްކަތަށް ބުރުލެއް ނާރާނެ: މަބްރޫކް

ކޮވިޑް-19 ގެ މިޙާލަތުގައި އިސް ސަފުގައި މަސައްކަތް ކުރަމުން އައި ޚިދުމަތްތެރިން ތަކެއް ކޮވިޑް-19ށް ޕޮޒިޓިވްވީ ނަމަވެސް މަސައްކަތަށް ބުރޫ ނާރާނެ ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވެއްޖެއެވެ.

އާދިއްތަ ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ އިސް ސަފުގައި މަސައްކަތް ކުރާ މީހުންނަކީ ބައްޔަށް ހުށަހެޅިގެން މަސައްކަތް ކުރާ މީހުން ކަމަށާއި، ސަލާމަތާ ރައްކާތެރިކަމުގެ ފިޔަވަޅު އަޅައިގެން އެ މީހުން މަސައްކަތް ކުރި ކަމުގައި ވިޔަސް، ބަލި ޖެހުމުގެ ފުރުޞަތު އެބަ އޮތް ކަމަށެވެ. އަދި ވިދާޅުވީ 'ކޮމިއުނިޓީ ސްޕްރެޑް' އާއެކު އިސް ސަފުގައި ޙަރަކާތްތެރިވާ ޚިދުމަތްތެރިން ތެރެއިން ކޮވިޑް-19ށް ޕޮޒިޓިވްވާނެކަމަށް ލަފާކުރެވިފައިވާ ކަމަށެވެ.

Advertisement

މަބްރޫކް ވިދާޅުވީ މިހާތަނަށް ރާއްޖެއިން ކޮވިޑް-19ށް ޕޮޒިޓިވްވި މީހުން ތެރެއިން 199 މީހުންނަކީ އިސް ސަފުގައި މަސައްކަތް ކުރަމުން އައި މީހުން ކަމަށާއި، މި މީހުންނަކީ އެކި އިދާރާތަކުގެ މުވައްޒަފުން ކަމަށެވެ. މީގެ ތެރޭގައި ޞިއްޙީ ޚިދުމަތްތެރިންގެ އިތުރުން، އެހެނިހެން ދާއިރާތަކުގެ މުވައްޒަފުން ހިމެނޭ ކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ އިސްސަފުގައި މަސައްކަތް ކުރާ ޚިދުމަތްތެރިން ކޮވިޑް-19ށް ޕޮޒިޓިވް ވާއިރު، ޓީމުގެ މެންބަރުން މަދުވާނެ ކަމަށެވެ. ނަމަވެސް މަަސައްކަތްތައް ކުރިއަށްދާނެ ކަމަށާއި، މާކުރިން އެކަމުގެ ޕްލޭންތައް ހެދިފައިވާ ކަމަށް މަބްރޫކް ވިދާޅުވިއެވެ. އަދި މަސައްކަތަށް ބުރޫނާރާނެ ކަމަށް ވިދާޅުވިއެވެ.

އެގޮތުން ކޮންމެ އޯގަނައިޒޭޝަނަކުން ވެސް އަމިއްލަ ޚާއްޞާ ޕްލޭނެއް އެކުލަވާލާ މުވައްޒަފުންތަކެއް ޕޮޒިޓިވްވާ ޙާލަތުގައި އެތަން ފޫބައްދާނެ ގޮތުގެ ޕްލޭން ވެސް އެކުލަވާލައިފައިވާ ކަމަށެވެ.

މާލެ ސިޓީގައި ހަލުވި މިނެއްގައި ކޮވިޑް-19 ފެތުރެމުން ދާއިރު، ރާއްޖެއިން މިހާތަނަށް 1000ށް ވުރެ ގިނަ މީހުން ވަނީ މި ވައިރަސްއަށް ޕޮޒިޓިވް ވެފައެވެ.