23 ރަށެއްގައި އެކަށީގެންވާ ވަރަށް ޕީޕީއީ އެއް ނެތް: އެޗްއާރްސީއެމް
18 މެއި 2020 | ހޯމަ 07:21ރަށްރަށުން 334 މީހުންގެ ވަޒީފާ ވަނީ ގެއްލިފައި
ރައްކާތެރި ކަމުގެ ގޮތުން ސިއްހީ ހިދުމަތްތެރިން ތަކެއް ޕީޕީއީ އަޅައިގެން
23 ރަށެއްގައި އެކަށީގެންވާ ވަރަށް ޕަރސަނަލް ޕްރޮޓެކްޓިވް އިކިއުޕްމެންޓް (ޕީޕީއީ) ނެތްކަމަށް އެ ރަށްރަށުގެ ކައުންސިލުން އަންގާފައިވާ ކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ބުނެފި އެވެ.
ކޮވިޑް-19 އާ ގުޅިގެން އިންސާނީ ޙައްޤުތަކުގެ ޙާލަތު ދެނެގަތުމަށް އެޗްއާރްސީއެމުން ވަނީ މި މަހުގެ އެކަކުން ހަތަކަށް 27 ރަށު ކައުންސިލަކުން ފޯރުކޮށްދިން މަޢުލޫމާތުތަަކުގެ މައްޗަށް ބިނާކޮށް، ފާހަގަވާ މުހިންމު ކަންކަން ލިސްޓެއްގެ ސިފައިގައި ޢާންމު ކޮށްފަ އެވެ.
އެގޮތުން އެ ރިޕޯޓު އެކުލަވާލީ މުއްދަތުގައި ހަތް ރަށެއްގައި މީހުން ކަރަންޓީނު ކުރެވިފައިވާ ކަމަށާއި، ނުވަ ރަށެއްގައި މީހުން ހޯމް އައިސޮލޭޝަންގައި ބަހައްޓާފައިވާ ކަމަށް ކައުންސިލްތަކުން މަޢުލޫމާތު ދީފައިވާ ކަމަށް އެޗްއާރްސީއެމުން ބުންޏެވެ.
އަދި އެކަށީގެންވާ މިންވަރަށް ރަށުން ކާބޯތަކެތި ނުލިބޭ ކަމަށް ދެ ރަށަކުން ފާހަގަކޮށްފައިވާ ކަމަށާއި، އަދި ރަށުގެ ރައްޔިތުންނަށް ވާ ވަރަށް ރަށުގައި އެއްމަސް ދުވަހުގެ ކާބޯތަކެތި ރައްކާކުރެވިފައި ނެތްކަމަށް ނުވަ ރަށެއްގެ ކައުންސިލުން ފާހަގަކޮށްފައިވާ ކަމަށް އެޗްއާރްސީއެމުން ބުންޏެވެ.
މި ޙާލަތުގައި ކާބޯތަކެތީގެ އަގު އުފުލިފައި ވާކަމަށް ހަ ރަށަކުން ފާހަގަކޮށްފައި ވާއިރު، އޭގެ ތެރެއިން ދެ ރަށަކުން ފާހަގަކޮށްފައި ވަނީ ކާބޯތަކެތީގެ އަގު އުފުލިފައި ވަނީ ސަރުކާރުން ކަނޑައަޅާފައިވާ އަގަށްވުރެ މަތިން ކަމަށް އެޗްއާރްސީއެމްގެ ބަޔާނުގައި ބުނެފައި ވެއެވެ.
އެ ކޮމިޝަނުން ބުނީ، ކޮވިޑް-19 އާ ގުޅިގެން 14 ރަށަކުން ޖުމުލަ 334 މީހުންގެ ވަޒީފާ ގެއްލިފައިވާ ކަމަށް އެ ރަށްރަށުން އެޗްއާރްސީއެމް އަށް މަޢުލޫމާތު ދީފައިވާ ކަމަށެވެ.
