ކޮވިޑް-19 ނެތް ރަށްރަށުގައި ޖަމާއަތުގައި ނަމާދުކުރެވޭނެ އިންތިޒާމު ހަމަޖެއްސުމަށް ގޮވާލައިފި

ކޯވިޑް 19 ގެ އަސަރު ނެތް ރަށްރަށުގެ ޖަމާޢަތުގައި ނަމާދުކުރުމާއި ހުކުރު ނަމާދާއި ތަރާވީހު ނަމާދާއި ދަމުނަމާދު މިސްކިތްތަކުގައި ކުރެވޭނެ އިންތިޒާމު ހަމަޖެއްސުމަށް ޕީޕީއެމް/ޕީއެންސީ ގޮވާލައިފި އެވެ.

ކޮވިޑް-19 އާއި ދެކޮޅަށް ސަރުކާރުން އަޅަމުން އަންނަ ފިޔަވަޅުތަކުގެ ތެރެއިން، ޖަމާއަތުގައި ނަމާދުކުރުން މެދުކަނޑާލައިފައިވާއިރު، އިސްލާމިކް މިނިސްޓްރީން ވަނީ އެ މުއްދަތު މިމަހުގެ 28 ވަނަ ދުވަހަށް އިތުރުކޮށްފަ އެވެ.

Advertisement

ޕީޕީއެމް/ޕީއެންސީ ކޯލިޝަނުން ނެރުނު ބަޔާނެއްގައި ބުނީ މިއަހަރުގެ ރަމަޟާން މަސް އަލްވަދާޢު ކިއުމާއި ހަމައަށްގޮސްފައިވާއިރު، މިއަހަރުގެ ރަމަޟާން މަހު ރާއްޖޭގެ އެއްވެސް މިސްކިތެއްގައި ޖަމާޢަތުގައި ނަމާދު ކުރުމާއި، ތަރާވީހު ނަމާދު ކުރުމާއި، އަދި ދަމު ނަމާދު ކުރުން ފަދަ އަޅުކަންތައް ކުރިއަށް ގެންދިއުމަށް ހުރަސް އެޅިފައިވުމަކީ ކޯލިޝަންގެ ކަންބޮޑުވުން އިތުރުވާކަމެއް ކަމަށެވެ. އަދި ރާއްޖެ ފަދަ ސައްތައިން ސައްތަ އިސްލާމީ ޤައުމެއްގެ ހުރިހާ ރަށެއްގެ މިސްކިތްތައް ބަންދުކޮށްފައި ހުރުމަކީވެސް ދިވެހި ރައްޔިތުންނަށް އެކަމުގެ ސަބަބުން އަސަރު ކުރުވާކަމެއްކަމަށް ބަޔާނުގައި ބުނެފައި ވެއެވެ.

ޕީޕީއެމް/ޕީއެންސީގެ ބަޔާނުގައި އިތުރަށް ބުނެފައިވަނީ ކޯވިޑް 19 އާއި ގުޅިގެން ރާއްޖޭގެ މިސްކިތްތަކުގައި ޖަމާޢަތުގައި ނަމާދުކުރުން ހުއްޓުވާފައި އޮންނަތާ އެތައް ދުވަހެއް ވެފައިވަނިކޮށް، މި އަހަރުގެ ބަރަކާތްތެރި ރަމަޟާން މަހުގެ ފަހު 10 ގައިވެސް، ރާއްޖޭގެ މިސްކިތްތަކުގައި ފަރްޟު ނަމާދާއި ތަރާވީހު ނަމާދާއި ދަމުނަމާދު ޖަމާޢަތުގައި ކުރުން މަނާކޮށްފައި އޮތުމަކީ ރާއްޖޭގައި ތިބި އިސްލާމް ދީނަށް ލޯބިކުރާ، އެތައް ބަޔަކު ކަންބޮޑުވުން ފާޅުކުރަމުންދާކަމެއް ކަމަށެވެ. އަދި ކޯވިޑް-19 ރާއްޖެގައި ފެތުރެމުން ދިޔަނަމަވެސް، މި ވައިރަހުގެ އަސަރު އެއްވެސް މިންވަރަކަށް ކޮށްފައި ނުވާ ރަށްތައް ރާއްޖޭގައި ހުރިއިރު، އެރަށްތަކުގެ މިސްކިތްތައް ބަންދުކޮށް، އެ ރަށްރަށުގެ މިސްކިތްތަކުގެ ޖަމާޢަތުގައި ނަމާދުކުރުން ހުއްޓުވައިގެން ތިބެންޖެހޭ ސަބަބެއް އޮތްކަމަށް ޤަބޫލެއް ނުކުރާކަމަށް ކޯލިޝަންގެ ބަޔާނުގައި ބުނެފައި ވެއެވެ.

އެހެންކަމުން، ކޯވިޑް 19 ގެ އަސަރު ނެތް ރަށްރަށުގައި ރަމަޟާން މަހުގެ ފަހު ދުވަސްތަކުގައި ނަމަވެސް މިސްކިތްތައް ބޭނުން ކުރެވޭ ގޮތަށް ޢާންމުކޮށްހުޅުވާލުމަށް ގޮވާލަމަށް ގޮވާލައިފައި ވެއެވެ. އަދި އެފަދައިން ހުޅުވާލެވޭ ރަށްތަކުގެ މިސްކިތްތަކުގައި، ކޯވިޑް 19 ފެތުރުންހުއްޓުވުމަށްޓަކައި ސަމާލުކަން ދޭންޖެހޭ ކަންކަން ޢާންމުކޮށް އެނގޭނެ ގޮތަކަށް އިޢުލާނު ކުރެވި، އަދި ސާފުތާހިރުވުމަށް ވަސީލަތްތައް ފަސޭހައިން ލިބޭނެ އިންތިޒާމު ހަމަޖައްސައި، ރައްޔިތުންގެ ރައްކާތެރިކަމަށް މިސްތްތަކުގައި އަޅަންޖެހޭ ފިޔަވަޅުތައް ހަރުދަނާ ގޮތެއްގައި އިންތިޒާމުކުރެވި ހަމަޖެއްސުމަށް ވެސް ގޮވާލައިފައި ވެއެވެ.

ކޮވިޑް-19 ފެތުރުން ކޮންޓްރޯލްކުރުމަށްޓަކައި މުސްލިމް ގިނަ ޤައުމުތަކުގައި ވަނީ ޖަމާއަތުގައި ނަމާދުކުރުން ހުއްޓާލައިފަ އެވެ. ކޮވިޑް-19 ފެތުރުން ކޮންޓްރޯލްކުރުމަށް ސައުދީ ސަރުކާރުންވެސް ވަނީ ޖަމާއަތުގައި ނަމާދުކުރުމާއި، އުމަރާގެ އަޅުކަންވެސް މެދުކަނޑާލައިފަ އެވެ. އަދި އަދި ހަރަމްފުޅުގައި ވެސް މިހާރު އަޅުކަމުގައި އުޅެނީ އެ ތަނުގެ މުވައްޒަފުނަށެވެ.