ރާއްޖޭގެ އައި.ސީ.ޓީ ދާއިރާ އެކަށީގެންވާ މިންވަރަށް ތަރައްގީ ކުރެވިފައިވޭ: މިނިސްޓަރު މަލީހު
17 މެއި 2020 | އާދީއްތަ 16:37ރާއްޖޭގެ އެތެރޭގައި ވެސް ފައިބަރ ނެޓްވަރކްތައް ގާއިމްކުރެވިފައިވޭ
ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު
ރާއްޖޭގެ އައި.ސީ.ޓީ މާޙައުލަށް ބަލާލާއިރު، އެކަށީގެންވާ މިންވަރަކަށް ޚިދުމަތާއި އިންފްރާސްޓަރަކްޗަރ ތަރައްގީ ކުރެވިފައިވާ ކަމަށް ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެ އެވެ.
ދުނިޔޭގެ ޓެލެކޮމިއުނިކޭޝަން އަދި އިންފޮމޭޝަން ސޮސައިޓީ ދުވަހާ ގުޅިގެން މިނިސްޓަރު މަލީހު ދެއްވި ޚިތާބުގައި ވިދާޅުވީ ރާއްޖެއާއި ބޭރުދުނިޔެއާއި ސަބްމެރީން ފައިބަރ އޮޕްޓިކްކޭބަލުން ގުޅާލުމުގެ އިތުރުން ރާއްޖޭގެ އެތެރޭގައި ވެސް ފައިބަރ ނެޓްވަރކްތައް ގާއިމްކުރެވިފައިވާ ކަމަށެވެ.
މަލީހު ވިދާޅުވީ ދުވަހުން ދުވަހަށް ފައިބަރ ނެޓްވާރކާ ގުޅާލެވޭ ރަށްތައް އިތުރުވެ މިހާރު ރާއްޖޭގެ އާބާދީގެ ބޮޑުބަޔަކަށް ފައިބަރ ނެޓްވާރކް މެދުވެރިކޮށް ބްރޯޑްބޭންޑް އިންޓަރނެޓް ޚިދްމަތް ލިބޭ ކަމަށެވެ. ރާއްޖޭގެ އެންމެހާ ކަންކޮޅުތަކަށް މޯބައިލް ފޯނާއި 4ޖީ ގެ ޚިދްމަތް ފޯރާފައި ވާއިރު، އެންމެފަހުގެ 5ޖީ ޓެކްނޮލޮޖީގެ ޚިދްމަތްވެސް ރާއްޖޭގެ ފޯރުކޮށްދޭން ފަށާއިވާކަން މިނިސްޓަރު ފާހަގަކުރެއްވި އެވެ.
މިނިސްޓަރު މަލީހު ވިދާޅުވީ މި ކުޑަކުޑަ ރާއްޖޭގައި ވެސް ދެމެހެއްޓެނެވި ތަރައްގީގެ ލަޑުދަނޑިތައް ހާސިލު ކުރުމަށް އައި.ސީ.ޓީ ވަސީލަތްތަކުގެ މުހިއްމުކަން ބޮޑު ކަމަށާއި، މިފަދަ ލަޑުދަނޑިތައް ހާސިލު ކުރުމަށް މިވަސީލަތްތަކުގެ ބޭނުން އެންމެ އެދެވޭގޮތެއްގައި ހިފާނެގޮތްތައް ބަލާ، އެކި ދާއިރާތައް ތަރައްގީ ކުރުމަށް ސަރުކާރުން ދަނީ ކެޑިނޭޅި މަސައްކަތް ކުރަމުންދާ ކަމަށެވެ.
ކޮވިޑް-19ގެ މިހާލަތާ ބެހޭ ގޮތުން މިނިސްޓަރު މަލީހު ވިދާޅުވީ ހަނގުރާމައިގާ އެންމެ ބޮޑު ދިފާއީ ހަތިޔާރަކަށް ބޭނުން މިކުރެވެނީ އެކަކު އަނެކަކާ ބައްދަލު ނުވެ ގައިދުރުކޮށް ތިބުން ކަމަށާއި، ދުނިޔޭގެ ގިނަ ގައުމުތަކެކޭ އެއްފަދައިން ރާއްޖެ ވެސް ހުއްޓުމަކަށް އައިސް ލޮކްޑައުންގެ ހާލަތުގައި ކަމަށެވެ. އަދި ވިދާޅުވީ މުއާމަލާތެއް ކުރުމުގައި ވެސް، އިންޓަރނެޓް އާއި އެހެނިހެން އައި.ސީ.ޓީ ވަސީލަތްތަކުގެ ބޭނުން ކުރުން ބޮޑުވެފައިވާ ކަމަށެވެ.
އެގޮތުން ޖަލްސާތަކާއި އޮފީސްތަކުގެ އެންމެހާ މަސައްކަތްތައް ކުރެވެނީ އިންޓަރނެޓް މެދުވެރިކޮށް އޮންލައިން ޒަރިއްޔާއިން ކަމަށެވެ. ހަމައެހެންމެ، މި ނުރައްކާތެރި ރޯގާ ކޮންޓްރޯލްކުރުމުގައި ކުރަންޖެހޭ ގިނަ މަސައްކަތްތައްވެސް ކުރަނީ މިގޮތަށެވެ. އެހެން ގިނަ ގައުމުތަކެކޭއެއް ފަދައިން، ރާއްޖޭގައި ވެސް މިހާރު ވަނީ އޮންލައިން ކޮށް ޞިއްޙީ އަދި، ތައުލީމީ ޚިދުމަތްތައް ވެސް ފޯރުކޮށްދޭން ފަށާފައިވާ ކަމަށް މިނިސްޓަރު މަލީހު ވިދާޅުވި އެވެ.
މިނިސްޓަރު ވިދާޅުވީ މުވާސަލާތީ ޚިދްމަތްތައް ބޭނުންކުރާ މިންވަރު އެތައް ގުނައަކަށް އިތުރުވެފައިވާ މިދަނޑިވަޅުގައި، ސަރުކާރުގެ އެދުމާއި އެއްގޮތަށް، ރާއްޖޭގެ މުވާސަލާތީ ކުންފުނިތަކުން، ރަގަޅުފެންވަރެއްގައި ޚިދުމަތްތައްދީ އަދި ދަމަހަށްޓަން ކުރަމުން ގެންދާ ބުރަ މަސައްކަތްތަކެއް ކުރަމުންދާ ކަމަށެވެ. އަދި، ދިމާވެފައިވާ އިގްތިޞާދީ ދަތި ޙާލަތަށް ރިއާޔަތްކޮށް ރައްޔިތުންނަށް ލުއިތައް ލިބޭނޭ ގޮތަށް ޑޭޓާ އެލަވަންސް ތަކާއި ޑިސްކައުންޓްތައް ތައާރަފް ކޮށްފައިވާ ކަމަށެވެ. ދުނިޔަށް މި ދިމާވި ބޮޑު ޙާލަތައްފަހު ކުރިއަށް އޮތް ދުވަސްތަކުގައި މުވާސަލާތީ ޚިދްމަތްތަކުގެ ބޭނުން ހިފާނެ މިންވަރު އެތައް ގުނައަކަށް ގިނަ ވެގެންދާނެ ކަމަށް މިނިސްޓަރު ވިދާޅުވި އެވެ.
އައި.ސީ.ޓީ ދާއިރާއިން ރާއްޖެއަށް އިތުރު ތަރައްގީ ގެނެސް ދިނުމަށް ސަރުކާރުން ގިނަ މަސައްކަތްތައް ކުރާކަން ފާހަގަކުރައްވައި މިނިސްޓަރު މަލީހު ވިދާޅުވީ މުވާސަލާތީ ޚިދްމަތްތަކުގެ އެންމެ އެދެވޭ ފައިދާ ހޯދުމަށްޓަކައި ސަރުކާރުން ފޯރުކޮށްދޭ ޚިދްމަތްތައް އިތުރަށް ތަރައްގީކޮށް، އައި.ސީ.ޓީ މެދުވެރިކޮށް ރާއްޖޭގެ އެކި ކަންކޮޅުތަކުގައި ދިރިއުޅޭ އެންމެހާ ރައްޔިތުންނަށް ވެސް ފަސޭހަކަމާއެކު ޙިދުމަތް ލިބިދިނުމުގެ މަސައްކަތްތަކެއް ކުރަމުންދާ ކަމަށެވެ.
މުޖްތަމައިުގެ ލާބައާއި ފައިދާއަށް އައި.ސީ.ޓީ ގެ ވަޞީލަތްތައް، ރައްކާތެރިކަމާއިއެކު ބޭނުން ކުރުމަށް ވެސް މިނިސްޓަރު ވަނީ އިލްތިމާސްކޮށްފަ އެވެ.
