ކޮވިޑް-19ގެެ މި ޙާލަތުގައި އާސަންދަ ސްކީމްގެ ދަށުން ޑެލިވަރީ ކޮށްދޭ ބޭސް ފިހާރަތަކާއި އޮންލައިން ކޮންސަލްޓޭޝަންގެ ޚިދުމަތްދޭ މަރުކަޒުތައް އިތުރު ކޮށްފި އެވެ.
އާސަންދައިން ބުނީ އިންދިރާ ގާންދީ މޭމޯރިއަލް ހޮސްޕިޓަލް (އައިޖީއެމްއެޗް) އަދި ވިލިމާލެ ހޮސްޕިޓަލުން އަލަށް ދޫކުރާ ބޭސް ސިޓީ ތަކުގެ ތެރެއިން އިލެކްޓްރޯނިކް ބޭސް ސިޓީ (އާސަންދަ ލޯގޯ ޖަހާފައިވާ ބޭސް ސިޓީ) ފިޔަވާ އެހެނިހެން ބޭސް ސިޓީ ތަކަށް ބޭސް ލިބޭނީ ހަމައެކަނި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ބޭސް ފިހާރަ ތަކުން ކަމަށެވެ.
އާސަންދައިން ބުނީ އާސަންދަ ޕޯޓަލް މެދުވެރިކޮށް ދޫކުރާ އިލެކްޓްރޯނިކް ބޭސް ސިޓީ ތަކަށް ބޭސް ދޫކުރާނީ އާސަންދަ އެންޕެނަލް ކުރެވިފައިވާ އެހެން ބޭސް ފިހާރަތަކުން ކަމަށެވެ.
ރައްޔިތުންނަށް ލުއި ފަސޭހަ ކޮށްދިނުމުގެ ގޮތުން އާސަންދައިން ކުރާ މަސައްކަތުގެ ދަށުން ޑެލިވަރީ ކޮށްދޭ ބޭސް ފިހާރަތަކާއި އޮންލައިން ކޮންސަލްޓޭޝަންގެ ޚިދުމަތްދޭ މަރުކަޒުތައް ވަނީ އިތުރު ކޮށްފައެވެ. އަދި އެ ބޭސް ފިހާރަތަކުން ބޭސް ގެޔަށް ގެންގޮސް ދިނުމުގެ ޚިދުމަތް ވެސް އާސަންދައިން ވަނީ ހަޖައްސައި ދީފައެވެ.
މި ހައްސާސް ދަނޑިވަޅުގައި ހުރިހާ ރައްޔިތުން ވެސް ބޭސް ހޯދަން ބޭނުންވާނަމަ ކޮންމެވެސް އެއް ފާމަސީއެއް އިޚުތިޔާރުކޮށް، ބޭސް ސިޓީ އެ ތަނަކަށް ފޮނުވުމަށް އާސަންދައިން ވަނީ އެދިފައެވެ.
