ހިގުއައިން އެނބުރި އިޓަލީ އަށް

އިޓާލިއަން ލީގު އަލުން ފެށުމަށް ތައްޔާރުވަމުން ދާތީ ޔުވެންޓަސް އަށް ކުޅެމުން އަންނަ އާޖެންޓީނާގެ ފޯވަރޑް ގޮންޒާލޯ ހިގުއައިން އެނބުރި އިޓަލީގެ ޓިއުރިންއަށް ހިނގައްޖެއެވެ.

ނޮވެލް ކޮރޯނާވައިރަސް (ކޮވިޑް-19) ގެ މެދުކަނޑާލި އިޓާލިއަން ލީގު ޖޫން މަހުގެ 13 ވަނަ ދުވަހު އަލުން ފަށަން ކްލަބުތަކުން ރުހުން ދީފައި ވާއިރު، މީގެ ކުރިން އިޓަލީގެ ސަރުކާރުން ވަނީ އަންނަ ހޯމަ ދުވަހުން ފެށިގެން ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ދީފައެވެ. އަދި މީގެ ކުރިން މި މަހުގެ ހަތަރުވަނަ ދުވަހު ވަނީ ކުޅުންތެރިން އެކަނި ތަމްރީނުތައް ހެދުމުގެ ހުއްދަ ދީފައެވެ. އެއާއެކު ޔުވެންޓަސް އިން ވަނީ އެޓީމުގެ ބޭރު ކުޅުންތެރިން އެނބުރި ޓިއުރިން އަށް އައުމަށް އަންގާފައެވެ.

މަންމަ ބަލިވުމުން ހިގުއައިން އާޖެންޓީނާ އަށް ގޮސްފައި ވަނީ މާރޗު މަހުގެ 19 ވަނަ ދުވަހު އެވެ. އަދި އާޖެންޓީނާގައި ހުރެ ހެދި ޓެސްޓު ތަކުން ހިގުއައިން ވަނީ ކޮވިޑް-19 އަށް ނެގެޓިވް ވެފައެވެ. ހުކުރު ދުވަހުގެ ވަގުތެއްގައި ހުގުއައިން އެނބުރީ އިޓަލީގެ ޓިއުރިން އަށް ދިޔައިރު، އޭނާ 14 ދުވަސް ވަންދެން ކަރަންޓީނު ކުރާނެއެވެ.

މީގެ ކުރިން ޔުވެންޓަސްގެ ޕޯޗުގަލް ފޯވަރޑް ކްރިސްޓިއާނޯ ރޮނާލްޑޯ އާއި ފްރާންސްގެ މިޑްފީލްޑަރު އެޑްރިއެން ރަބިއޯ ވަނީ އެނބުރި ޓިއުރިން އަށް ގޮސްފައެވެ. އިޓާލިއަން ލީގު އަލުން ފެށުމަށް ތައްޔާރުވަމުން ދާއިރު، ޖޫން މަހުގެ 13 ވަނަ ލީގު އަލުން ފަށަން ސަރުކާރުން ރުހުން ދޭނެ ކަމަށް ރިޕޯޓުތައް ބުނެއެވެ.

އިޓާލިއަން ލީގުގައި ބާކީ އޮތް ބައިގައި، 8 ޓީމަކުން 13 މެޗު ކުޅެން ޖެހޭއިރު، ބާކީ ޓީމުތަކަށް އޮތީ 12 މެޗެވެ.

އިޓާލިއަން ލީގު މެދުކަނޑާލިއިރު، އެންމެ ފަހުގެ ޗެމްޕިއަން ޔުވެންޓަސް އޮތީ ތާވަލުގެ އެއްވަނައިގައި 26 މެޗުން 63 ޕޮއިންޓާއެކުގައެވެ. ދެވަނައިގައި އޮތް ލާޒިއޯއަށް 26 މެޗުން ލިބިފައި ވަނީ 62 ޕޮއިންޓެވެ.