ކޮވިޑް-19ގެ މަސައްކަތުގައި އިސްސަފުގައި މަސައްކަތް ކުރާ މުވައްޒަފުންގެ މުސާރައިގެ އޮނިގަނޑަށް ބަދަލު ނާންނާނެ ކަމަށާއި، މުސާރައާއި އިނާޔަތްތައް ކުޑަ ނުކުރާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

ހޮނިހިރު ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު އިބްރާހީމް އަމީރު ވިދާޅުވީ، ދައުލަތުގެ ބައެއް މުވައްޒަފުންގެ މުސާރަތައް އިތުރަށް ކުޑަކުރުމަށް ސަރުކާރުން ނިންމާފައިވީ ނަމަވެސް، ކޮވިޑް-19ގެ އޮޕަރޭޝަންގެ މަސައްކަތްތަކުގެ އިސްސަފުގައި މަސައްކަތް ކުރާ އެއްވެސް މުވައްޒަފެއްގެ މުސާރަ ކުޑަނުކުރާނެ ކަމަށެވެ.

މިނިސްޓަރު އަމީރު ވިދާޅުވި ގޮތުގައި އިސްތިޘްނާވާ މުވައްޒަފުންނަކީ ނޭޝަނަލް ޑިޒާސްޓަރ މެނޭޖްމެންޓް މުވައްޒަފުން، ހެލްތު ޕްރޮޓެކްޝަން އެޖެންސީ މުވައްޒަފުން، ސިއްހީ ޚިދުމަތްދޭ މަރުކަޒުތަކާއި ހޮސްޕިޓަލްތަކުގެ މުވައްޒަފުންގެ ތެރެއިން ރައީސުލްޖުމްހޫރިއްޔާ އައްޔަނު ކުރާ މާގާމުތައް ފިޔަވައި އެހެން މުވައްޒަފުން، މޯލްޑިވްސް ނޭޝަނަލް ޑިފެންސް ފޯރސްގެ މުވައްޒަފުން، މޯލްޑިވްސް ޕޮލިސް ސަރވިސްގެ މުވައްޒަފުން ކަމަށެވެ.

އޭގެ އިތުރުން ކޮވިޑް-19އާ ގުޅިގެން އެކުލަވާލާފައިވާ ނޭޝަނަލް އެމެރޖެންސީ އޮޕަރޭޝަން ސެންޓަރުގައި މަސައްކަތް ކުރާ ފަރާތްތަކުގެ ތެރެއިން އެފަރާތެއް ނިސްބަތްވާ އިދާރާއަކުން އައްޔަނު ކުރުމުގެ ސަބަބުން، އެސެންޓަރުގައި ދުވާލެއްގެ މައްޗަށް މަދުވެގެން 6 ގަޑިއިރު މަސައްކަތްކުރާ މުވައްޒަފުން ވެސް އިސްތިޘްނާ ވެގެންދާނެ ކަމަށް މިނިސްޓަރު އަމީރު ވިދާޅުވިއެވެ.

ކޮވިޑް-19ގެ މިހާލަތާ ގުޅިގެން މިހާރު ސަރުކާރުުން ނިންމާފައި ވަނީ 20،000 (ވިހި ހާސް) އަށް ވުރެ މަތިން މުސާރަ ލިބޭ ދައުލަތުގެ މުވައްޒަފުންގެ މުސާރަތައް ކުޑަކުރުމަށެވެ. ނަމަވެސް ކޮވިޑް-19ގެ މަސައްކަތުގައި އިސްސަފުގައި ހަރަކާތްތެރިވާ މުވައްޒަފުންގެ މުސާރަ ކުޑަ ނުކުރާނެކަން އިއުލާނު ކޮށްފައި ވާއިރު، ކޮވިޑް-19އާ ދެކޮޅަށް އިސްސަފުގައި މަސައްކަތް ކުރާ މުވައްޒަފުންނަށް ޚާއްސަ އެލަވަންސެއްގެ ގޮތުގައި ދުވާލަކު، 500-250 ރުފިޔާއާ ދެމެދުގެ އަދަދެއް ދޭން ވެސް ސަރުކާރުން ނިންމާފައި ވެއެވެ.