ކޮވިޑް-19ގެ ހާލަތަށް ރަށް ވަނީ ތައްޔާރުވެފައި: މުލީ ކައުންސިލް
16 މެއި 2020 | ހޮނިހިރު 12:35ރައްކާތެރިވުމުގެ ގޮތުން ޚާއްސަ ފިޔަވަޅުތަކެއް ވަނީ އަޅާފައި
މުލީގެ ރައްޔިތުން ތަކެއް ވެސް ވަނީ މާލެސިޓީ ލޮކްޑައުން ކުރުމާ ގުޅިގެން ވަނީ ތާށިވެފައި
މ. މުލީން ކޮވިޑް-19ށް ޝައްކު ކުރެވޭ މީހަކު ފެނިއްޖެނަމަ، ސާމްޕަލް ނެގުމާއެކު، އެކަމާއި ގުޅުންހުރި އެހެނިހެން މަސައްކަތް ކުރެވޭނެ އިންތިޒާމުތައް ހަމަޖެހިފައިވާ ކަމަށް އެރަށުގެ ކައުންސިލުން ބުނެފިއެވެ.
ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި އިންޓަވިއުއެއްގައި ކައުންސިލްގެ ރައީސް އަހުމަދު ޝާތިރު ވިދާޅުވީ ހޮސްޕިޓަލް، ޓާސްކް ފޯސް، ސޯޝަލް ސަޕޯޓް ޑެސްކް އަދި ކައުންސިލްއާ ގުޅިގެން ގިނަ މަސައްކަތްތަކެއް ކުރަމުންދާ ކަމަށެވެ.
ޝާތިރު ވިދާޅުވީ މި ހާލަތަށް އެކަށީގެންވާ ވަރަށް ރަށުގެ ހޮސްޕިޓަލުގައި ޞިއްޙީ ޙިދުމަތް ދޭނެ އާލާތްތައް އެބަހުރި ކަމަށެވެ. ނަމަވެސް އިތުރަށް ބޭނުންވާ އާލާތްތައް ހޯދުމުގެ މަސައްކަތް ކުރަމުންދާކަން ޝާތިރު ފާހަގަކުރެއްވިއެވެ.
ރަށުގެ ރައްޔިތުންގެ ރައްކާތެެރި ކަމަށް ގިނަ ފިޔަވަޅުތަކެއް އަޅާފައިވާކަން ފާހަގަކުރައްވާ ޝާތިރު ވިދާޅުވީ މާލެއިން އަންނަ އެއްވެސް މީހަކު ރަށަށް ނާރުވާނެ ކަމަށެވެ. އަދި އަތޮޅުގެ އެހެން ރަށަކުން ޑޮކްޓަރަށް ދެއްކުމަށް މުއްޔަށް އެރޭނީ އެރަށެއްގެ ޞިއްޙީ މަރުކަޒުގެ ޑޮކްޓަރު މުލީގެ ހޮސްޕިޓަލަށް އެކަން އަންގާ އެ އިންތިޒާމު ހަމަޖެއްސުމުން ކަމަށެވެ.
މުއްޔަށް އެރުމަށް ދޫކުރާ ޚާއްޞަ ހުއްދައާއެކު ރަށަށް އަރާ އެހެން އަތޮޅުތަކުގެ ނުވަތަ ރަށްރަށުގެ މީހުންނަށް ވެސް ރަށު ތެރެއަށް ނުކުމެ އެހެން ތަންތަނަށް ނުދެވޭނެ ކަމަށް ޝާތިރު ވިދާޅުވިއެވެ.
ޝާތިރު ވިދާޅުވީ މާލެސިޓީ ލޮކްޑައުން ކުރުމާއި ގުޅިގެން މާލޭގައި އެރަށުގެ ރައްޔިތުންތަކެއް ތާށިވެފައިވާ ކަމަށެވެ. ރަށަށް އައުމަށް ނަން ނޯޓު ކުރުމަށް ހުޅުވާލި ފުރުޞަތުގައި 20 މީހަކު ނަންނޯޓު ކޮށްފައިވާ ކަމަށާއި، އޭގެ ތެރެއިން 10 މީހަކު މިހާރު ޓްރާންސިޓް ކަރަންޓީން ފެސިލިޓީއަށް ގެންދެވިފައިވާ ކަމަށް އޭނާ ވިދާޅުވިއެވެ.
ޝާތިރު ވިދާޅުވީ މ. އަތޮޅު މެދުފުށީ އައިލެންޑް ރިސޯޓު ކަރަންޓީން ފެސިލިޓީއެއްގެ ގޮތުގައި ހަމަޖެހިފައިވާ ކަމަށް ޓޫރިޒަމް މިނިސްޓްރީން ހާމަކޮށްފައި އޮތް ނަމަވެސް އެކަން ކައުންސިލަށް އަދި އަންގާފައި ނުވާ ކަމަށެވެ. އަދި އެތަނަށް މީހުން ގެންދިއުމުގެ މަސައްކަތެއް ނުކުރާ ކަމަށާއި، ކަރަންޓީނަށް ގެންދިޔަ މީހުން ވެސް ގެންދިޔައީ އެހެން ކަރަންޓީން ފެސިލިޓީއަކަށް ކަމަށް އޭނާ ވިދާޅުވިއެވެ.
ރަށުގެ ޢާންމު ޙާލަތައް އަލިއަޅުއްވާލައްވާ ޝާތިރު ވިދާޅުވީ ކާޑުގެ ބާވަތްތައް އެބަހުރި ކަމަށާއި، ދަތިތަކެއް އަދި ކުރިމަތި ނުވާ ކަމަށެވެ. އަދި ދިގު މުއްދަތަށް ބޭސް ބޭނުން ކުރާ މީހުންނާއި، އުމުރުން ދުވަސްވީ މީހުންގެ ދަފުތަރެއް އެކުލަވާލާ އެމީހުންގެ ޙާލަތު ވަރަށް ގާތުން މޮނިޓަރ ކުރަމުންދާ ކަމަށް އޭނާ ވިދާޅުވިއެވެ. އަދި ވިދާޅުވީ ރަށުގައި ދިރިއުޅޭ ބިދޭސީންގެ ޙާލަތު ވެސް މޮނިޓަރ ކުރަމުންދާ ކަމަށެވެ.
