ބޭއި އޮފް ބެންގާލް ގައި އުފެދޭ ތޫފާނުގެ ސީދާ އަސަރު ރާއްޖެއަށް ނުކުރާނެ: މެޓް
16 މެއި 2020 | ހޮނިހިރު 07:57ރާއްޖޭގެ ސަރަހައްދުތަކުގެ ވައި ގަދަވާނެ
ހުކުރު ދުވަހު އާދަޔާ ހިލާފަށް ވައިގަދަ ވުމާ ގުޅިގެން މާލޭގެ މަގުތަކުގައި ހުރި ބައެއް ގަސްވަނީ ވެއްޓިފައި
ބޭ އޮފް ބެންގާލް ގައި އުފެދިގެން އުޅޭ ކޮޅިގަނޑުގެ ބާރުގަދަވެ ޠޫފާނަކަށް ބަދަލުވި ނަމަވެސް، އެ ޠޫފާނުގެ ސީދާ އަސަރު ރާއްޖެއަށް ނުކުރާނެ ކަމަށް މޫސުމާ ބެހޭ ޤައުމީ އިދާރާއިން ބުނެފިއެވެ.
ރާއްޖެޓީވީގެ ކޮވިޑް-19 ޚާއްޞަ ކަވަރޭޖްގެ ތެރެއިން ދެއްވި އިންޓަވިއެއްގައި އެއިދާރާގެ އެސިސްޓެންޓް މީޓިއަރޮލޮޖިސްޓް ޢަބްދުﷲ ޙާފިޒު ވިދާޅުވީ ހުކުރު ދުވަހާ އަޅާބަލާއިރު ހޮނިހިރު ދުވަހު ވައިގެ ބާރުމިން މަޑުވެފައިވާ ކަމަށެވެ. ނަމަވެސް ބޭ އޮފް ބެންގާލް ގައި އުފެދިގެން އުޅޭ ކޮޅިގަނޑު ގާތްގަނޑަކަށް މެންދުރު ފަހު ތޫފާނަކަށް ބަދަލުވެގެންދާނެ ކަމަށާއި، އެވަގުތާ ކައިރި ކޮށްފައި ރާޢްޖޭގެ ހުރިހާ ހިސާބަކަށް ވައި ގަދަވާނެ ކަމަށް ހާފިޒު ވިދާޅުވިއެވެ.
ހުކުރު ދުވަހު ރާއްޖޭގެ ހުޅަނގު ބިތުގެ ވަރަށް ގިނަ އަދަދަށް ބޯ ވިއްސާރަ އުފެދިފައިވާކަން ފާހަގަކުރައްވައި ހާފިޒު ވިދާޅުވީ މިހާރު ރާއްޖޭގެ ހުޅަނގު ބިތުގައި އަދި ވިއްސާރަ ވިލާ އެހާ ބޮޑަށް އުފެދެން ނުފަށާ ކަމަށެވެ. ނަމަވެސް ހަވީރު ނުވަތަ މެންދުރު ފަހު ހުޅަނގު ބިތުގައި ހިސާބުތަކުގައި ވިއްސާރަ ވިލާ އުފެދިގެން ދާނެ ކަމަށެވެ.
ބޭ އޮފް ބެންގާލްގައި އުފެދޭ ޠޫފާނާ ބެހޭ ގޮތުން ޙާފިޒު ވިދާޅުވީ، ތޫފާނުގެ އެއްވެސް ސީދާ އަސަރެއް ރާއްޖެއަށް ނުކުރާނެ ކަމަށެވެ. ނަމަވެސް ނުސީދާ ގޮތުން ކުރާނެ އަސަރެއްގެ ގޮތުގައި ބެލެވެނީ ރާއްޖޭގެ ސަރަހައްދުގައި ފުދޭ ވަރަކަށް ވައި ގަދަވުން ކަމަށް ހާފިޒު ވިދާޅުވިއެވެ. އަދި މީގެ މިޞްރާބު ބޮޑަށް ހުންނާނީ ހުޅަނގު އުތުރަށް ކަމަށާއި، 17 ވަނަ ދުވަހު މިޞްރާބު ބަދަލުވެގެން ދާނީ އިރު އިތުރަށް ކަމަށް ޙާފިޒު ވިދާޅުވިއެވެ.
ޙާފިޒު ވިދާޅުވީ ރާޅުގެ އުސްމިން ހުކުރު ދުވަހާ އަޅާބަލާއިރު ތަންކޮޅެއް ދަށްވާނެ ކަމަށް އަންދާޒާ ކުރެވޭ ކަމަށެވެ. ހުކުރު ދުވަހު ރާޅުގެ އުސްމިން 8 ފޫޓަށް ވުރެ މަތީގައި އުޅުނު ނަމަވެސް ހޮނިހިރު ދުވަހު ރާޅުގެ އުސްމިން އުޅޭކަމަށް ލަފާ ކުރެވެނީ 4 ފުޓާއި 6 ފުޓާ ދެމެދު ކަމަށެވެ.
ޙާފިޒު ވިދާޅުވީ ރާއްޖޭގެ ހުރިހާ ހިސާބެއްގެ ކަނޑުތައް ގަދަވާނެ ކަމަށާއި، ވިލާގަނޑު އަންނަ ވަގުތު އިތުރަށް ކަނޑުތައް ގަދަވާނެ ކަމަށެވެ. އަދި ރާއްޖޭގެ ހުރިހާ ހިސާބަކަށް އުދައިގެ އަސަރު ކުރުމަކީ ވެސް އެކަށީގެންވާ ކަމަށް އޭނާ ވިދާޅުވިއެވެ.
ޙާފިޒު ވިދާޅުވީ ކުރިއަށް އޮތް ދެތިން ދުވަހު ރާއްޖޭގެ މޫސުން ގޯސްވާނެ ކަމަށާއި، ގުގުރުމާއެކު ވާރޭ ވެހުނު ކަމުގައި ވީ ނަމަވެސް ފެން ބޮޑުވެގެންދާ ވަރަށް ވާރޭ ވެހޭނެ ކަމަށް ލަފާ ނުކުރެއްވޭ ކަމަށެވެ.
މިދުވަސްވަރަކީ ރާއްޖޭގެ މޫސުން ގޯސް ދުވަސްވަރެއް ކަމަށްވާތީ ކަނޑުދަތުރު ކުރާ ފަރާތްތަކުން މޫސުމަށް ޚާއްޞަ ސަމާލުކަމެއް ދިނުމަށް ވަނީ އިލްތިމާސް ކޮށްފައެވެ.
