ކޮވިޑް-19 އާއި ގުޅިގެން ވަންދޫގައި ވެސް އަމަލުކުރާނެ އުޞޫލުތަކެއް އާންމުކޮށްފި
ފިހާރަ އަދި ހޮޓާ ރެސްޓޯރެންޓްތަކުން އަމަލުކުރަންވީ ގޮތްތަކެއް ވަނީ އެކުލަވާލާފައި
ތ. ވަންދޫ؛ ކޮވިޑް-19 އާއި ގުޅިގެން ވަންދޫގައި ވެސް ވަނީ ހާއްސަ ފިޔަވަޅުތަކެއް އަޅާފައި
ތ. ވަންދޫގައި ދިރިއުޅޭ ފަރާތްތަކުގެ އާންމު ޞިއްޙަތު ރައްކާތެރިކުރުމުގެ ގޮތުން ޚާއްސަ ފިޔަވަޅުތަކެއް އަޅަން ނިންމައިފި އެެވެ.
ވަންދޫ ކައުންސިލުން ބުނީ މި ޙާލަތުގައި ޚިދުމަތްދޭ ތަންތަނާއި، ހޮޓާ ރެސްޓޯރެންޓް އަދި ފިހާރަތައް ހުޅުވާ ލެއްޕުމާއި ޚިދުމަތް ދިނުމުގައި އަމަލުކުރާނެ ގޮތުގެ އުޞޫލެއް އެކުލަވާލާފައިވާ ކަމަށެވެ. އެގޮތުން ދައުލަތުގެ މުވައްސަސާތަކާއި، ކުންފުނިތަކާއި، ޙިދުމަތް ފޯރުކޮށްދޭ ހުރިހާ ފަރާތްތަކުން ވެސް ރައްޔިތުންނަށް ފޯރުކޮށްދެން ޖެހޭ ޚިދުމަތްތައް ފޯރުކޮށްދޭން ވާނީ މި ޚާއްސަ ޙާލަތާއި ގުޅިގެން ދައުލަތުގެ ކަމާގުޅުން ހުރި މުވައްސަސާތަކުން އަންގާ ގޮތެއްގެ މަތިން ރައްކާތެރިކަމުގެ ފިޔަވަޅުތައް އަޅައިގެން ކަމަށެވެ.
އަދި ޚީދުމަތް ދިނުމުގައި ވީހާވެސް ބޮޑަކަށް އޮންލައިންކޮށް ޙިދުމަތް ދެވޭނެ އިންތިޒާމުތައް ހަމަޖެއްސޭތޯ ބަލަން ޖެހޭނެ ކަމަށް ބުނެފައިވެއެވެ. އަދި މުވައްޒަފުން ޚީދުމަތްދޭ މަރުކަޒަށް ނެރެގެން މަސައްކަތް ކުރަންޖެހޭ ޙާލަތެއް މެދުވެރި ވިނަމަވެސް ޙިދުމަތް ދޭންވާނީ ވީހާވެސް މަދު މުވައްޒަފުން ބޭނުންކޮށްގެން ރައްކާ ތެރިކަން ކަށަވަރުކޮށްގެން ކަމަށާއި، ހޮޓާ ރެސްޓޯރެންޓްތައް ހުޅުވައި ލައްޕަން ވާނީ ދައުލަތުގެ ކަމާގުޅޭ މުއައްސަސާތަކުން އަންގާ ގޮތެއްގެ މަތިން ކަމަށް ބުނެފައި ވެއެވެ.
އަދި ހޮޓާ ރެސްޓޯރެންޓް ތަކުން ކަނޑައެޅިފައިވާ ގަޑިތަކުގެ އިތުރުން ހުޅުވައި ޚިދުމަތް ދިނުމަކީ މަނާކަމެއް ކަމަށާއި، ވިޔަފާރި ޚިދުމަތް ފޯރުކޮށްދޭ ތަންތަނުގައި މަސައްކަތް ކުރާ އެންމެހާ ފަރާތްތަކުން ޚީދުމަތް ފޯރުކޮށްދޭން ވާނީ ރައްކާތެރިކަމުގެ ގޮތުން މާސްކް އަދި އަންގި ފަދަ ތަކެތި ބޭނުންކޮށްގެން ކަމަށް މި އުސޫލުގައި ވެއެެވެ. މީގެ އިތުރުން ވިޔަފާރި ޚިދުމަތް ފޯރުކޮށް ދޭ ފަރާތްތަކުން އެއްފަހަރާ 3 މީހުންނަށް ވުރެން ގިނައިން ޚީދުމަތް ފޯރުކޮށްދީގެން ނުވާނެ ކަމަށް ވެސް އަންގާފައި ވެއެވެ.
މީގެ އިތުރުން ޚިދުމަތް ފޯރުކޮށްދިނުމުގައި ވެސް ގައިދުރުކަން ބެހެއްޓުމާއި ވިޔަފާރި ކުރަން ބޭނުންވާ ފަރާތް ތަކަށް ޚާއްސަ ހުއްދަ ހިމެނޭ ކާޑެއް ޓާސްކް ފޯސްގެ ފަރާތުން ގޭބިސީތަކަށް ދޫކުރާނެ ކަމަށާއި، މިގޮތުން ކޮންމެ ގޭބިސީއަކަށް ވެސް ކާޑެއް ފޯރުކޮށްދޭނެކަމަށް ވަނީ ބުނެފައެވެ. އަދި ވިޔަފާރި ޚިދުމަތް ފޯރުކޮށްދޭ ފަރާތްތަކުން ޚިދުމަތް ފޯރުކޮށްދޭން ވާނީ އެ ކާޑު އޮންނަ ފަރާތްތަކަށް ކަމަށް އުޞޫލުގައި ބުނެފައެވެ.
އަދި ޑެލިވަރީ ޙިދުމަތް ފޯރުކޮށްދޭން ބޭނުންވާ ފަރާތްތަކަށް އެކަމަށް އެދި ޓާސްކް ފޯސް އަށް ހުށަހެޅުމުން ޓާސްކް ފޯސް އިން ބަލަން ޖެހޭ ކަންކަން ބެލުމަށް ފަހު އެފަރާތަކަށް ޑެލިވަރީ ކުރުމުގެ ޙުއްދަ ހިމެނޭ ޚާއްސަ ކާޑެއް ހަވާލު ކުރެވޭނެ ކަމަށް ބުނެފައި ވެއެވެ. އަދި ހުއްދަ ދޭ ފަރާތްތަކުން ޑެލިވަރީ ކުރާއިރު އަބަދުވެސް ވިޔަފާރި ކާޑު ފެންނަ ގޮތައް ހަރު ކުރެވިފައި ހުންނަން ވާނެ ކަމަށް މި އުސޫލުގައި ބުނެފައި ވެއެވެ.
މިޢުޞޫލާއި ޚިލާފު ވެއްޖެނަމަ، ނުވަތަ ނުކުރަން އަންގާފައިވާ ކަމެއް ކޮށްފިނަމަ ދޭނެ ވަކި އަދަބުތަކެއް ކަނޑައެޅިފައި ވެއެވެ. އެގޮތުން، އެކަމެއްގެ ކުޑަބޮޑުމިނަށް ބަލައި، ފުރަތަމަ ފަހަރު އެކަންކަން ނުކުރުމަށް ލިޔުމުން ނަޞޭޙަތް ދެވޭނެ ކަމަށާއި، ދެވަނަ ފަހަރަށް ތަކުރާރު ކޮށްފިނަމަ 100 ރުފިޔާއާއި 500 ރުފިޔާއާއި ދެމެދުގެ އަދަދަކުން ޖޫރިމަނާކުރުން އަދި ތިންވަނަ ފަހަރަށް ތަކުރާރު ކޮށްފިނަމަ 500 ރުފިޔާއާއި 1000 ރުފިޔާއާއި ދެމެދުގެ އަދަދަކުން ޖޫރިމަނާ ކުރުމުގެ ބާރު ކައުންސިލަށް ލިބިގެންވާ ކަމަށް ބުނެފައި ވެއެވެ. އަދި ތިންވަނަ ފަހަރަށް ކުށް ތަކުރާރު ކޮށްފިނަމަ 2000 ރުފިޔާއިން ޖޫރިމަނާ ކުރުމަށް ފަހު ޓާސްކްފޯސް އަދި ކައުންސިލުން ކަނޑައަޅާ ގޮތެއްގެ މަތިން ޢަމަލުކުރުމުގެ އިޚުތިޔާރު ކައުންސިލަށް ލިބިގެންވާ ކަމަށް ބުނެފައިވެއެވެ.
