ވީބީ ބްރަދާސްގެ މުވައްޒަފުންތަކެއް ޕޮޒިޓިވްވުމާ ގުޅިގެން ޚިދުމަތް ހުއްޓާލައިފި
15 މެއި 2020 | ހުކުރު 20:20ޕޮޒިޓިވްވި މުވައްޒަފުންގެ ހާލު ރަނގަޅު
ވީބީ މާޓް ޑިސްއިންފެކްޓް ކުރުމުގެ މަސައްކަތް ކުރަނީ
ވީބީ ބްރަދާސްގެ ފިހާރަތަކުގައި މަސައްކަތް ކުރާ 8 މުވައްޒަފަކު ކޮވިޑް19 އަށް ޕޮޒިޓިވްވުމާ ގުޅިގެން، އެ ކުންފުނީގެ ހުރިހާ ފިހާރައެއް ޚިދުމަތްތައް ވަގުތީ ގޮތުން މެދުކަނޑާލައިފިއެވެ.
ވީބީ ބްރަދާސް ޕްރައިވެޓް ލިމިޓެޑަކީ ފުޅާ ދާއިރާއެއްގައި ދިވެހިރާއްޖެއަށް ކާބޯތަކެތީގެ ބާވަތްތަކާއި އެނޫން ވެސް ދިވެހިންގެ ޢާންމު ދިރިއުޅުމުގައި ބޭނުންކުރާ ގިނަ ވައްތަރުތަކެއްގެ މުދާ އެތެރެކޮށް، މާލެ އާއި ރާއްޖޭގެ އެކި ކަންކޮޅު ތަކަށް ހޯލްސޭލް އަދި ރީޓެއިލް ކުރާ ކުންފުންޏެކެވެ.
ކޮވިޑް-19 ފެތުރުން ކޮންޓްރޯލް ކުރުމަށްޓަކައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މާލެ ސަރަހައްދު ފުރަބަންދުކުރުމުން ވެސް، އެޗްޕީއޭ އިން ކަނޑައަޅާފައިވާ ރައްކާތެރިކަމުގެ މިންގަނޑުތަކަށް ފެތޭ ގޮތަށް، ހުއްޓުމެއް ނެތި މިހާތަނަށް ވީބީގެ ފިހާރަ ތަކުން ޚިދުމަތް ދެމުން ގޮސްފައިވެއެވެ. އަދި ޚިދުމަތްތައް ފޯރުކޮށްދިނީ ރައްޔިތުންގެ އާންމު ދިރިއުޅުމާ ގުޅިލާމެހިފައިވާ ޚިދުމަތަކަށް ވާތީ، މިއީ މި ނާޒުކު ދަނޑިވަޅުގައި ގައުމީ ޒިންމާއެއްކަމުގައި ދެކިގެން ކަމަށް ވީބީން ބުނެފައި ވެއެވެ.
ނަމަވެސް، ވީބީ ބާޒާރު ފިހާރައިގައި މަސައްކަތްކުރާ މުވައްޒަފަކާއި ވީބީ ގަލޮޅު މާޓުގައި މަސައްކަތްކުރާ 3 މުވައްޒަފެއްގެ އިތުރުން، ވީބީ މާފަންނު މާޓުގައި ވަޒީފާއަދާކުރާ 4 މީހަކު ވަނީ ކޮވިޑް-19ށް ޕޮޒިޓްވެފައެވެ. މިކަމާއި ގުޅިގެން ވިޔަފާރީގެ ޚިދުމަތް ވަގުތީ ގޮތުން މެދުކަނޑާލުމަށް ފަހު، ކަމާބެހޭ ފަރާތްތަކަށް އެއްބާރުލުންދީ، އަދި ބަލީގެ އަސަރުކޮށްފައިވާ މުވައްޒަފުންގެ ކަންކަން ވަރަށް ގާތުން ބަލަމުންދާ ކަމަށް ވީބީ ބްރަދާސްއިން ބުނެއެވެ.
ވީބީ ބްރަދާސްއިން ބުނީ ކޮވިޑް-19ށް ޕޮޒިޓިވްވި ހުރިހާ މުވައްޒަފުންގެ ހާލުވެސް ރަނގަޅު ކަމަށެވެ.
ކުންފުނީގައި މަސައްކަތްކުރާ ޖުމްލަ 8 މުވައްޒަފަކު ކޮވިޑް-19ށް ޕޮޒިޓިވްވުމާ ގުޅިގެން ވިޔަފާރީގެ މުޅި އޮޕަރޭޝަން ވަގުތީ ގޮތުން މެދުކަނޑާލަން ޖެހިފައިވާއިރު، އެހާތަނަށް ނެގިފައި ހުރި ޑެލިވަރީ އޯޑަރުތަކަށް ވެސް މިދުވަސްވަރު ޚިދުމަތް ދެވޭނެ ގޮތެއް ނެތް ކަމަށް ވީބީ ބްރަދާސްއިން ބުނެއެވެ.
ވީބީ ބްރަދާސްއިން ބުނީ މިފުރުސަތުގައި، ޚިދުމަތްތައް މެދުކަނޑާލަން ޖެހުމާއި ގުޅިގެން ވިޔަފާރިތަކަށާއި އާންމު ރައްޔިތުންނަށް ގިނަގުނަ ދަތިތަށް ކުރިމަތިވާނެ ކަމަށެވެ.
މީގެ އިތުރުން ވީބީ އިން ބުނީ އެޗްޕީއޭ އާއި ކަމާއިބެހޭ އެހެނިހެން އިދާރާތަކާއި މަޝްވަރާކޮށްގެން، އަޅަންޖެހޭ ފިޔަވަޅުތައް އަޅައިގެން، ވީހާވެސް އަވަހަކަށް ޚިދުމަތްތައް އަލުންދެވޭނެ އިންތިޒާމްތައް ރާވަމުންދާ ކަމަށެވެ. އަދި އިތުރު ޓީމެއް ބޭނުންކުރުމާއި، ފިހާރަތައް ޑިސިންފެކްޓްކުރުމާއި އަދި މި ނޫންވެސް، ކަމާއިބެހޭ އިދާރާތަކުން ކަނޑައަޅާ މިންގަނޑުތަކާއި އިރުޝާދުތަކާއި އެއްގޮތްވާ ގޮތުގެ މަތިން، ކަސްޓަމަރުންގެ ސަލާމަތާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް ކެނޑިނޭޅި އަޅަމުންދާ ކަމަށެވެ.
ކޮވިޑް-19ން ރާއްޖެ ސަލާމަތްކުރުމަށް އެޗްޕީއޭ އާއި ނެޝެނަލް އިމަޖެންސީ އޮޕަރޭޝަންސް ސެންޓަރ އިން ކުރައްވަމުންދާ މަސައްކަތްތަކަށް ފުރިހަމަ އެއްބާރުލުން ދޭނެ ކަމަށް ވީބީ ބްރަދާސްއިން ބުނެއެވެ.
