ވެސްޓު ޕާކާ ދިމާލު ތޮށިގަނޑަށް ދޯންޏެއް އުރި، ފުނޑުފުނޑު ވެއްޖެ
ދޯންޏަކީ ކާށިދޫ ދޯންޏެއް
މިންވަރު ދޯނި: ބޭނުން ނުކުރެވޭ ވަރަށް ދޯނި ވަނީ ފުނޑު ފުނޑުވެފައި
މޫސުން ގޯސްވެ މާލޭ ވެސްޓް ޕާކާއި ދިމާލު އޮންނަ ތޮށިގަނޑަށް ދޯންޏެއް އުރި އެއްކޮށް ފުނޑު ފުނޑުވެއްޖެ އެވެ.
އެމްއެންޑީއެފުން ބުނީ، ހަތަރު މީހުންނާއެކު ކ. ކާށިދޫން މާލެ އަށް ދަތުރުކުރި ''މިންވަރު'' ނަމަކަށް ކިޔާ ދޯންޏެއް ހުއްޓިގެން މާލެ ސީޓީ (ވެސްޓް ޕާކް ސީވޯލް) ތޮށިގަނޑަށް އުރުނުކަމުގެ ރިޕޯޓު ހުކުރު ދުވަހު މެންދުރު އެކެއް ޖަހާ އެހާކަށް ހާއިރު ލިބުމާއެކު އެހީތެރިކަން ފޯރުކޮށްދީފައިވާ ކަމަށެވެ.
އެގޮތުން، އެ ދޯނީގައި ތިބި މީހުން ސަލާމަތުން އެއްގަމަށް އަރުވާފައިވާ ކަމަށާއި، އެމީހުންގެ ހާލު ރަނގަޅު ކަމަށް އެމްއެންޑީއެފުން މައުލޫމާތު ދެއެވެ.
އެމްއެންޑީއެފުން ބުނީ، އެ ދޯނީގައި ހުރި ތަކެއްޗަކީ ކާށިދޫން މާލެއަށް ގެނައި ތަކެތި ކަމަށެވެ. އުރުނު ދޯނި ވަނީ އެއްކޮށް ފުނޑު ފުނޑުވެފައެވެ.
ކުރިޔަށް އޮތް ގަނޑިތަކުގައި މޫސުން ލަފާ ކޮށްފައިވާ ގޮތުން ރާއްޖޭގެ ބޮޑުބަޔަކަށް ވިއްސާރަކޮށް އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހެނޭ އެވެ.
އުތުރު އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭއިރު އެހެން ހިސާބުތަކަށް ހުޅަނގު ދެކުނާއި ހުޅަނގުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ އެވެ. އަދި ވިލާގަނޑުގައި ގަޑިއަކު 45 މޭލާއި 50 މޭލާ ދެމެދުގެ ބާރުމިނަކަށް ވައިގަދަވުން އެކަށީގެންވާ ކަމަށް މޫސުމާއި ބެހޭ ޤައުމީ އިދާރާއިން ވަނީ ބުނެފައެވެ.
