ކޮވިޑާއި ގުޅިގެން ވިޔަފާރިތަކަށް އެޅި ފިޔަވަޅުތަކަށް ލުއިތަކެއް ދޭން ނިންމައިފި

ކޮވިޑް-19 އާއި ގުޅިގެން ސަލާމަތާރި ރައްކާތެރިކަމުގެ ގޮތުން އެޅި ފިޔަވަޅުތަކުގެ ތެރެއިން އައްޑޫގެ ވިޔަފާރިތަކަށް އެޅި ފިޔަވަޅުތަކަށް ލުއިދޭން ސިޓީ ކައުންސިލުން ނިންމައިފި އެވެ.

އެގޮތުން، އައްޑޫގެ ސޯޝަލް ސަޕޯޓް ޑެސްކް (އެސްއެސްޑީ)ތަކުން ހުއްދަ ދޫކުރާ ފިހާރަތައް ކަނޑައެޅޭ ވަކި ވަގުތުތަކުގައި ހުޅުވުމުގެ ހުއްދަ ދޭން ވަނީ ނިންމާފަ އެވެ. މިގޮތުން ފިހާރަތައް ހުޅުވައިގެން ޚިދުމަތް ދެމުން ގެންދަން ވާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 08:00 އިން 15:00 އަށެވެ. އަދި ހުކުރު ދުވަހު ހެނދުނު 08:00 އިން 11:00 އަށް، އަދި މެންދުރު ފަހު 13:30 އިން 15:00ށް ކަމަށް ވަނީ އިއުލާނު ކޮށްފައެވެ. އަދި މިވަގުތުތައް ފިޔަވައި އެހެން ވަގުތުތަކުގައި އެއަވަށެއްގެ ސޯޝަލް ސަޕޯރޓު ޑެސްކުގައި ރަޖިސްޓްރީ ކޮށްފައިވާ ވިޔަފާރިތަކަށް ޑެލިވަރީގެ ޚިދުމަތް ދެވޭނެ ކަމަށްވެސް އައްޑޫ ސިޓީ ކައުންސިލުން މިކަން ހާމަކޮށް އާންމުކޮށްފައިވާ އިއުލާނުގައި ވެއެވެ.

މީގެ އިތުރުން، ވިޔަފާރިކުރުމުގެ ބޭނުމަށް އެއްއަވަށުން އަނެއް އަވަށަށް ދަތުރުފަތުރުކުރުމާއި ޢާއްމު ފަރާތްތަކުންނާއި ވިޔަފާރިތަކުން ވިޔަފާރިކުރުމުގައި އަމަލުކުރާނެގޮތުގެ ގައިޑްލައިނެއް ވެސް ވަނީ އާންމު ކޮށްފައެެވެ. އެސްއެސްޑީ ތަކުން ފިހާރަތައް ހުޅުވުމަށް ހުއްދަ ދިނުމުގައި ބަލާނީ ގައިޑްލައިންގައިވާ ވިޔަފާރިތަކުން ޢަމަލުކުރަން ޖެހޭ ކަންތައްތައް ފުރިހަމަކޮށްފައި ހުރިތޯ ކަމަށާއި އެހެންކަމުން އާއްމު ފަރާތްތަކުންނާއި ވިޔަފާރިތަކުން އާންމުކޮށްފައިވާ ގައިޑްލައިންގައިވާ ގޮތުގެމަތިން ޢަމަލުކުރުމަށް އައްޑޫ ސިޓީ ކައުންސިލުން އެދިފައި ވެއެވެ.

މި އިޢުލާނުގައިވާ ގޮތުގެމަތިން އެސްއެސްޑީ ތަކުގެ ހުއްދައާއެކު ފިހާރަތައް ހުޅުވަން ފަށާނީ މި ހިނގާ މެއި މަހުގެ 15 ވަނަ ދުވަހުން ފެށިގެން ކަމަށްވެސް އިއުލާނުގައި ވެއެވެ.

އައްޑޫ ސިޓީގެ ގުޅިފައިވާ ރައްތަކުގައި ދިރިއުޅޭ މީހުންނަށް އެއްރަށުން އަނެއް ވިޔަފާރި ބޭނުމަށް ދަތުރު ކުރެވޭނެ އިންތިޒާމު ވެސް ވަނީ ހަމަޖައްސާފައެވެ. އެގޮތުން ޕޮލިސް ޕޯޓަލް މެދުވެރިކޮށް ހުއްދަ ހޯދައިގެން އެއްރަށުން އަނެއް ރަށަށް ދެވޭނެ ކަމަށްވެސް އައްޑޫ ސިޓީ ކައުންސިލުން ބުނެއެވެ.

އެގޮތުން، ހިތަދޫގެ ރައްޔިތުން ހެނދުނު 9:00 އިން 3:00 އަށް މަރަދޫ، މަރަދޫފޭދޫ އަދި ފޭދުއަށް ދަތުރު ކުރެވޭނީ ހޮނިހިރު، ހޯމަ އަދި ބުރާސްފަތި ދުވަހުއެވެ. އަދި މިތިން ރަށުގެ ރައްޔިތުން ހިތަދުއަށް ދަތުރު ކުރެވޭނީ ހަމަ އެގަޑިތަކުގައި އާދީއްތަ އަންގާރަ އަދި ބުދަ ދުވަހުއެވެ.

ވިޔަފާރިތަކަށް ހުއްދަ ދިނުމުގައި ސިޓީ ކައުންސިލުން ޚާއްސަ އުސޫލުތަކެއް ވެސް ވަނީ ކަނޑައަޅާފައެވެ. އެގޮތުން ނިސްބަތުން ބޮޑު ފިހާރައަކަށް އެންމެ ގިނަވެގެން އެއްފަހަރާ ވަދެވޭނީ 4 ކަސްޓަމަރުންނަށެވެ. ނިސްބަތުން ކުޑަ ފިހާރައެއް ނަމަ އެންމެ ގިނަވެގެން އެއްފަހަރާ ވަދެވޭނީ 2 ކަސްޓަމަރުންނަށެވެ. މީގެ އިތުރުން ފިހާރައިގައި ހަރަކާތްތެރިވާ މުވައްޒަފުން ތިބެންވާނީ ޙިދުމަތްދޭ ގަޑީގައި އަބަދުވެސް މާސްކާއި އަންގި އަޅައިގެން ކަމަށް ސިޓީ ކައުންސިލުން އާންމުކޮށްފައިވާ ގައިޑްލައިންގައި ބުނެފައި ވެއެވެ.

މިީގެ އިތުރުން ފިހާރަތަކަށް ވިޔަފާރިކުރަންދާ ފަރާތްތަކުން މާސްކު އެޅުމަށާއި ކިއުގައި ތިބޭއިރުވެސް ގައިދުރުކަން ބެހެއްޓުމަށް ސަމާލުވުމަށް ސިޓީ ކައުންސިލުން ވަނީ އެދިފައެވެ.

އައްޑޫ ސިޓީއަށް ބޯކޮށް ވާރޭވެހި، 150 ގެއަކަށް ވެކިވަރުގެ ގެއްލުތަކެއް ވެފައިވާ ކަމަށާއި ހާލުގައި ޖެހުނު 400 އެއްހާ މީހުންނަށް އެހީތެރިކަން ފޯރުކޮށްދެމުންދާ ކަމަށްވެސް އައްޑޫ ސިޓީ ކައުންސިލުން ބުރާސްފަތި ދުވަހު ބުނެފައި ވެއެވެ.